އެންމެ ފަހުގެ ޗެމްޕިއަން ބ. އޭދަފުށި ބަލިކޮށް، ލ. ގަމުން ގޯލްޑަން ފުޓްސަލް ޗެރިޓީ ޝީލްޑް ދިފާއުކޮށްފިއެވެ. ރާއްޖޭގައި ބާއްވާ ފުޓްސަލްގެ އެންމެ ފޯރިގަދަ އެއް މުބާރާތް ކަމަށްވާ "ގޯލްޑަން ފުޓްސަލް ޗެލެންޖް 2025" ފެށުމުގެ ގޮތުން ކުޅުނު ޗެރިޓީ ޝީލްޑް މެޗު ގަމުން ކާމިޔާބުކޮށްފައިވަނީ 1-0 ގެ ނަތީޖާއަކުންނެވެ.
މި މޮޅާއެކު 2023 ވަނަ އަހަރު ޗެމްޕިއަން، ގަމުން ޗެރިޓީ ޝީލްޑް ދިފާއުކުރިއިރު، މިދިޔަ އަހަރުގެ ޝީލްޑުވެސް އުފުލާލާފައިވަނީ އެ ޓީމުންނެވެ. އެގޮތުން އެ ފަހަރުގެ ޝީލްޑް މެޗުގައި ތ. ތިމަރަފުއްޓާ ވާދަކޮށް ގަމުން ވަނީ 3-2 ގެ ނަތީޖާއަކުން މެޗު ކާމިޔާބުކޮށްފައެވެ. އަދި މިދިޔަ އަހަރުގެ މުބާރާތުގެ ފައިނަލުގައިވެސް އޭދަފުއްޓާއި ގަން ވާދަކުރިއިރު، އެ މެޗު 4-2 ގެ ނަތީޖާއަކުން ކާމިޔާބުކޮށް އޭދަފުށިން ވަނީ ފުރަތަމަ ފަހަރަށް ރާއްޖޭގެ ޗެމްޕިއަންކަން ހޯދާފައެވެ.
ހުޅުމާލޭ ރެހެންދި ފުޓްސަލް ދަނޑުގައި މިރޭ ކުޅުނު މެޗުގައި ފެނިގެންދިޔަ ހަމައެކަނި ލަނޑު ގަމަށް ކާމިޔާބުކޮށްދިނީ އަބްދުﷲ ޖުނައިދެވެ. މިއީ ގޯލްޑަން ފުޓްސަލް ޗެލެންޖުން ޝީލްޑް މެޗު ބޭއްވި ތިންވަނަ ފަހަރެވެ. މި ފަހަރުގެ ޗެރިޓީ ޝީލްޑް މެޗުން މޮޅުވި ގަމަށް ލިބުނު 25،000 ރުފިޔާ ވަނީ ފަލަސްތީނުގެ ޣައްޒާ ރައްޔިތުންނަށް ހަދިޔާކޮށްފައެވެ.
ޗެރިޓީ ޝީލްޑް މެޗަށްފަހު މާދަމާރޭ ގޯލްޑަން ފުޓްސަލް ޗެލެންޖުގެ މެޗުތައް ފެށިގެންދާއިރު، މި ފަހަރުގެ މުބާރާތުގައި 129 ޓީމު ވަނީ ވާދަކުރާނެއެވެ.
ގޯލްޑަން ފުޓްސަލް އެސޯސިއޭޝަނުން އެންމެ ފުރަތަމަ މި މުބާރާތް ބޭއްވީ 2015 ވަނަ އަހަރުއެވެ. އޭގެ ފަހުން މި މުބާރާތް ނުބޭއްވި ދިޔައީ، ކޮވިޑް-19 ގެ ސަަބަބުން އައި މެދުކެނޑުމާ ހެދިއެވެ. މި މުބާރާތުގެ ޗެމްޕިއަންކަން މިހާތަނަށް ހޯދާފައިވަނީ ތިން ފަހަރު މުބާރާތް ކާމިޔާބުކޮށްފައިވާ ތިމަރަފުއްޓާއި، ގަމާއި، އޭދަފުއްޓާއި، ބ. ހިތާދޫ އާއި، މާފަންނު އަދި ހެންވޭރުންނެވެ.