އާޖެންޓީނާގެ ގައުމީ ޓީމްގެ ޖާޒީގައި ދެން ނުފެންނާނެކަމަށް ކެޕްޓަން ލަޔަނެލް މެސީ ބުނެފިއެވެ. 29 އަހަރުގެ މެސީ މިހެން ބުނެފައިވަނީ ކޮޕަ އެމެރިކާ ފުޓްބޯޅަ މުބާރާތުގެ ފައިނަލްގައި ޗިލީ އަތުން ބަލިވި މެޗަށްފަހުއެވެ.
ކްލަބް ފެންވަރުގައި ބޮޑެތި ކާމިޔާބީތަކެއް ހޯދާފައިވާ މެސީއަށް ގައުމީ ޓީމާއިއެކު މާ ބޮޑު ކާމިޔާބެއް ހޯދިފައެއް ނުވެއެވެ. ބޮޑު ހަތަރު މުބާރާތުގެ ފައިނަލުގައި އާޖެންޓީނާ ވާދަކުރި ނަމަވެސް، އެއް ފަހަރުވެސް މެސީއަށް ތަށި އުފުލާލެވިފައެއް ނުވެއެވެ. އެންމެ ފަހުން ޗިލީ އަތުން ކޮޕަ އެމެރިކާ ފުޓްބޯޅަ މުބާރާތުގައި އެޓީމްވީ ބައްޔަކީ ޖެހިޖެހިގެން ތިން މުބާރާތުގެ ފައިނަލްގައި އެޓީމްވީ ތިންވަނަ ބައްޔެވެ. 2014ވަނަ އަހަރުގެ ވޯލްޑްކަޕްގެ ފައިނަލްގައި ޖަރުމަން އަތުން ބަލިވިއިރު، 2015ވަނަ އަހަރާއި، 2016ވަނަ އަހަރުގެ ކޮޕަ އެމެރިކާ ފުޓްބޯޅަ މުބާރާތުގެ ފައިނަލްގައި އާޖެންޓީނާ ބަލިވީ ޗިލީ އަތުންނެވެ. މެސީ ބުނީ ގައުމީ ޓީމަށް އޭނާއަށް ވަރަށް މަސައްކަތްކޮށްދެވިއްޖެކަމަށާއި، ދެން އިތުރަށް ނުވާނެކަމަށެވެ.
" ފައިނަލަކުން ބަލިވުމަކީ ގަބޫލުރަން ދަތި ހިތާމައެއް، ގިނަ ފަހަރު މި ހިތާމައާއި ކުރިމަތިލާން ޖެހިއްޖެ. ދެން އިތުރަކަށް އާޖެންޓީނާ ޖާީގައި ނުފެންނާނެ" މެސީ ބުންޏެވެ.
މެސީވަނީ ގައުމީ ޓީމަށް 113 މެޗް ކުޅެދީ55 ގޯލް ޖަހާދީފައެވެ. ނިމިގެންދިޔަ ކޮޕާ އެމރިކާގައި މެސީ ޖެހި ގޯލްތަކާއެކު އޭނާ ވެފައިވަނީ މިހާތަނަށް އާޖެންޓީނާއަށް އެންމެ ގިނަ ލަނޑު ޖަހައިދިން ކުޅުންތެރިޔާއަށެވެ.
ރޭ ކޮޕާ އެމެރިކާ ފުޓްބޯޅަ މުބާރާތުގެ ފައިނަލުން އާޖެންޓީނާ ބަލިވީ ނަތީޖާ ނެރުމަށް ޖެހި ޕެނަލްޓީގައެވެ. އާޖެންޓީނާގެ ފުރަތަމަ ޕެނަލްޓީ މެސީ ފޮނުވާލި ނަމަވެސް ބޯޅަ ދިޔައީ ގޯލާ އަމާޒު ނުވެ ބޭރަށެވެ.