އިނގިރޭސި ޕްރިމިއަރ ލީގުގައި ރޭ ފުލަމް އާއި އިޕްސްވިޗް ޓައުން ބައްދަލުކުރި މެޗު 2-2 ގެ ނަތީޖާއަކުން އެއްވަރުވެއްޖެއެވެ.
ފުލަމްގެ ކްރެވަން ކޮޓޭޖްގައި ހަތާވީސް ހާހަށްވުރެ ގިނަ މީހުންގެ ކުރިމަތީގައި ކުޅުނު މި މެޗު އެއްވަރުވެފައިވާއިރު, ފުލަމް މިހާތަނަށް ކުޅެފައިވާ 20 މެޗުން އެ ޓީމަށް ލިބިފައިވާ 30 ޕޮއިންޓާއެކު އެ ޓީމު އޮތީ ތާވަލުގެ 9 ވަނައިގަ އެވެ. އިޕްސްވިޗް ޓައުން އޮތީ 16 ޕޮއިންޓާއެކު އަދިވެސް ރެލިގޭޝަން ޒޯނުގަ އެވެ.
ފުލަމް އިން މި މެޗުގައި ރަގަޅު ކުޅުމެއް ދެއްކި ނަމަވެސް މެޗުގެ 38 ވަނަ މިނިޓުގައި އިޕްސްވިޗުގެ ސަމީ ސްމޮޑީކްސް ވަނީ ލަނޑެއް ޖަހާ އެ ޓީމަށް ކުރި ހޯދަދީފަ އެވެ.
މެޗުގެ ފުރަތަމަ ހާފު 1-0 ގެ ނަތީޖާއަކުން ކުރީގައި އޮވެ އިޕްސްވިޗު ނިންމާލި ނަމަވެސް ދެވަނަ ހާފު ފެނިގެން ގޮސްފައިވަނީ ފޯރިގަދަ ކުޅުމަކާއެކުގަ އެވެ. އެގޮތުން މި ހާފުގައި ރެފްރީ ވަނީ ތިން ޕެނަލްޓީ ދީފަ އެވެ.
ފުލަމްގެ ރައުލް ޖިމިނޭޒް ވަނީ މެޗުގެ 69 ވަނަ މިނިޓުގައި އެ ޓީމަށް ލިބުނު ޕެނަލްޓީ އަކުން ލަނޑެއް ޖަހާ މެޗުގެ ނަތީޖާ އެއްވަރުކޮށްފަ އެވެ. މި ޕެނަލްޓީ ދިނުމުގެ ކުރިން ފުރަތަމަ ރެފްރީ ކުޅުން ކުރިއަށް ގެންދިއުމަށް އިޝާރާތް ކުރި ނަމަވެސް ވީޑިއޯ ބެލުމަށްފަހު ވަނީ ޕެނަލްޓީ އެއް ދީފަ އެވެ.
އަދި 71 ވަނަ މިނިޓުގައި އިޕްސްވިޗަށް ލިބުނު ޕެނަލްޓީ އަކުން ލިއާމް ޑެލަޕް ވަނީ އިތުރު ލަނޑެއް ކާމިޔާބުކޮށް މި މެޗުގައި ދެވަނަ ފަހަރަށް އެ ޓީމަށް ކުރި ހޯދަދީފަ އެވެ.
ނަމަވެސް މެޗުގެ ފަހު މިނިޓުގައި ރެފްރީ ވަނީ މެޗުގެ ތިންވަނަ ޕެނަލްޓީ ފުލަމް އަށް ދީފަ އެވެ. އިތުރު ވަގުތުގެ ކުޅުމުގައި ފުލަމް އަށް ދިން މި ޕެނަލްޓީވެސް ކާމިޔާބުކޮށްފައިވަނީ ރައުލް ޖިމިނޭޒް އެވެ.
ފުލަމް އަށް ދެ ޕެނަލްޓީ މެޗުގެ ރެފްރީ ދިން ނަމަވެސް ފުލަމްގެ ކޯޗު ވަނީ މެޗަށްފަހު ރެފްރީގެ ނިންމުންތަކާއިމެދު ހިތްހަމަނުޖެހުން ފާޅުކޮށްފަ އެވެ.