ކައުންސިލްތަކަށް ޚާއްސަކޮށްގެން ތައިލެންޑްގައި ފަތުރުވެރިކަމުގެ ރޯޑް ޝޯއެއް ބާއްވަނީ

ތައިލެންޑްގެ ވެރިރަށް ބެންކޮކްގައި ކައުންސިލްތަކަށް ޚާއްސަކޮށްގެން ފަތުރުވެރިކަމުގެ ރޯޑް ޝޯއެއް ބޭއްވުމަށް ނިންމައިފިއެވެ. މި ރޯޑް ޝޯ ބާއްވަނީ އެމްއައި އެޑްވަޓައިޒިންގެ ފަރާތުންނެވެ. އެ ކުންފުނިން ބުނީ މި ރޯޑް ޝޯގެ އެންމެ މުހިންމު އެއް ބޭނުމަކީ ރާއްޖޭގެ ތަފާތު މަންޒިލްތައް އިޝްތިހާރުކުރުންކަމަށެވެ.

މި ރޯޑް ޝޯ ބޭއްވުމަށް ހަމަޖެހިފައިވަނީ ސެންޓްރަލް ވޯލްޑް ޝޯޕިން މޯލް ތެރޭގައެވެ. އެމްއައި އެޑްވަޓައިޒިން އިން ބުނީ މި ޝޮޕިން މޯލްއަކީ ބެންކޮކްގެ އެންމެ މަޤްބޫލު އެއް މޯލްކަމަށެވެ. އެގޮތުން ކޮންމެ ދުވަހަކުވެސް ގިނަ އަދަދަކަށް މީހުން އެ މޯލްއަށް ޒިޔާރަތްކުރާ ކަމަށް އެމްއައިއިން ބުނެއެވެ.

މި ރޯޑް ޝޯ ބޭއްވުމަށް ހަމަޖެހިފައިވަނީ މިމަހުގެ 23 އިން 25 އަށެވެ. މި ރޯޑް ޝޯއަކީ ރާއްޖޭގެ ފަތުރުވެރިކަން ހާއްސަކޮށް ގެސްޓުހައުސްތައް އިޝްތިހާރުކޮށް ޕްރޮމޯޓުކުރުމަށް ލިބޭ ރަނގަޅު ފުރުސަތެއްކަމަށް އެމްއައި އެޑްވަޓައިޒިންގުން ބުނެއެވެ.

އެމްއައި އެޑްވަޓައިޒިންއިން ބުނީ މިހާރުވެސް މި ރޯޑް ޝޯގައި 13 ރަށެއްގެ ކައުންސިލުން ބައިވެރިވެފައިވާކަމަށެވެ. އޭގެތެރޭގައި މާފުށި، މަތިވެރި، ދިއްފުށި، ފުލިދޫ، ހިއްމަފުށި، އަދި ހިންނަވަރު ފަދަ ކައުންސިލްތައް ހިމެނެއެވެ.

ތައިލެންޑްގެ މީޑިއާތަކުގައި މި އިވެންޓް އިޝްތިހާރުކޮށް ގިނަ އިންވެސްޓަރުންގެ ޝައުގުވެރިކަން މިކަމަށް އުފެއްދޭނެ ގޮތްތައް ބަލައި، އިންވެސްޓަރުންނާއި ކައުންސިލްތަކާއި ސީދާ ގުޅިގެން ކުރެވޭނެ ކަންކަންވެސް މި އިވެންޓްގެ ސަބަބުން ފަހިވެގެންދާނެކަމަށް އެމްއައި އެޑްވަޓައިޒިންއިން ބުނެއެވެ.