ހޯނޑެއްދޫ މަސް ފެކްޓްރީގެ މައްސަލަ ޙައްލުކުރާނީ ރައްޔިތުންނަށް ފުރިހަމަ މަންފާ ލިބޭގޮތަށް: ރައީސް

ހުވަދު އަތޮޅު ދެކުނުބުރީ ހޯނޑެއްދޫގައި އަމިއްލަ ކުންފުންޏަކުން އަޅާފައިވާ މަސް ފެކްޓްރީގެ މައްސަލައިގަ ކައުންސިލާ ރައްޔިތުން އަދި މަސްވެރިގެ އޮތް ކަންބޮޑުވުމަށް ޙައްލު ހޯއްދަވައިދެއްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެއެވެ.

ރައީސް މިހެން ވިދާޅުވީ ހުވަދު އަތޮޅަށް ކުރައްވަމުންގެންދަވާ ދަތުރުފުޅުގެތެރެއިން ހޯނޑެއްދޫ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.

އައިސްޕްލަންޓަކާއި މަސް ފެކްޓްރީއެއް ހިންގުމަށް ހޯންޑެއްދޫން 13.5 ހެކްޓްރުގެ ބިމެއް ދޫކޮށްފަ އޮންނަތާ ވިއްސަކަށް އަހަރު ވަނީ ވެފައެވެ. ނަމަވެސް މިހާތަނަށްވެސް އެތަނުގެ ޚިދުމަތް އޮތީ ނުފެށި ހުއްޓިފައެވެ. މި މަސައްކަތް ހަވާލުކޮށްފައި އޮތީ ހޮރައިޒަން ފިޝަރީޒްއާއެވެ.

މި މަސައްކަތް ނުނިމި އަދި ޚިދުމަތް ނުފެށި އޮތުމުގެ ކަންބޮޑުވުން ރަށުގެ ކައުންސިލާ އަދި ރައްޔިތުންވެސް ވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއާއި ޙިއްސާކުރައްވާފައެވެ.
ހޯނޑެއްދޫގެ ރައްޔިތުންނާ ބައްދަލުކުރެއްވުމަށް ބޭއްވި ރަސްމިއްޔާތުގައި ރައީސުލްޖުމްހޫރިއްޔާ ވިދާޅުވީ މަޝްރޫޢު ފުރިހަމަވާނީ މަސައްކަތްތައް މުޅިން ނިމި އޭގެ މަންފާ މަސްވެރިންނާ، މަސްވެރިންކަމުގެ ސިނާޢާތަށް އަދި ރައްޔިތުންނަށް ލިބިގެންކަމަށެވެ. ރައީސް ވިދާޅުވީ އެ މަސައްކަތް ކުރާ ކުންފުންޏާއެކު ހެދިފައިވާ އެގްރިމަންޓްގެދަށުން ދިމާވެފައިވާ މައްސަލައަށް ދާއިމީ ޙައްލެއް ލިބެންޖޭނެކަމަށް ޤަބޫލުކުރައްވާކަމަށެވެ. އަދި އެކަމަށް ޙައްލު ލިބޭނެކަން ކަށަވަރުކޮށްދެއްވާކަމަށް ރައީސުލްޖުމްހޫރިއްޔާ ވިދާޅުވިއެވެ.

"މިކަމުން މިހާރު ރަށަށް އަދި ސިނާޢަތަށްވެސް އެކަށީގެންވާ މަންފާއެއް ނުލިބެ. އެ ބިމުން އެންމެ ރަނގަޅު ނަފާ ލިބޭނެގޮތްތައް ބަލާ، ރައްޔިތުން ބޭނުންވާ ނަތީޖާ ނެެރެދޭނަން. ރައްޔިތުންނަށް އެންމެ ފައިދާވާގޮތަށް، މައްސަލައަށް ދާއިމީ ޙައްލެއް ހޯދައިދޭނަން." ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވިއެވެ.

ރައީސް ވަނީ ހޯނޑެއްދޫގެ އިޙްތިޞާސުން، ރަށަށް މަންފާ ލިބޭގޮތަށް ފަޅު ރަށެއް ހަމަޖައްސަވައިދެއްވުމަށް މަސައްކަތް ކުރައްވަމުންދާކަމަށް ވިދާޅުވެފައެވެ. އެ މަސައްކަތް އޭޖީއާއެކު ކުރިއަށްގެންދާކަމަށާއި، ފަތުރުވެރިކަމާއި އިތުރު އިޤްތިޞާދީ މަންފާ ރަށަށް ހޯދޭނެކަމަށް ރައީސް ވިދާޅުވިއެވެ.

ރައީސް ވިދާޅުވީ ހޯނޑެއްދޫ އަދި މަޑަވެލީގައި ބޯހިޔާވަިކަމުގެ މަޝްރޫޢު ހިންގުމަށްވެސް ބަޖެޓުގައި ހިމަނުއްވާފައިވާކަމަށެވެ. އަދި ޒަމާނީ ފެންވަރަށް މަގުތައް ތަރައްޤީކުރުމުގެ މަސައްކަތްތައްވެސް ކުރިއަށް މިއޮތް 2 އަހަރުތެރޭގައި ކުރިއަށްގެންދަވާނެކަމަށެވެ.

މީގެއިތުރުން ރަށުގެ ސިއްޙީ މަރުކަޒު 24 ގަޑިއިރަށް ޚިދުމަތްދޭ ތަނަކަށް ބަދަލުކުރުމަށް ބޭނުންވާ ބަދަލުތައް ގެނައުމާއި އަދި ތަޢުލީމީ ދާއިރާ ކުރިއެރުވުމަށްވެސް މަސައްކަތްތައް ކުރައްވާނެކަމަށް އެމަނިކުފާނު ވިދާޅުވިއެވެ.