ރައީސް ހުށަހެޅުއްވީ މެމްބަރުންގެ އަދަދު މަދުނުކޮށް، ކައުންސިލްތަކުގެ ޚަރަދުކުޑަކުރެވޭނެ ގޮތްތަކެއް

ކައުންސިލަރުންގެ އަދަދު މަދުނުކޮށް، ލޯކަލް ކައުންސިލްތަކުގެ ޚަަރަދު ކުޑަކުރެވޭނެ ގޮތްތަކެއް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ހުށައަޅުއްވައިފިއެވެ.

ލޯކަލް ކައުންސިލްތަކުގެ ޚަަރަދު ކުޑަކުރެވޭނެ ގޮތްތަކެއް އާއްމުންގެ ޚިޔާލަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ހުށަހެޅުއްވީ ހުވަދޫ އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން ގދ. ފިޔޯރީ ރައްޔިތުންނާއި ބައްދަލުކުރައްވާ ދެއްކެވި ވާހަކަފުޅުގައެވެ.

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވީ، ކައުންސިލްތަކުގެ ޚަރަދު ކުޑަކުރެއްވުމުގެ ގޮތުން އެމަނިކުފާނަށް ފެނިވަޑައިގަންނަވާ ބައެއް ކަންކަން މީގެކުރިން ރައްޔިތުންނާއި ހިއްސާކުރައްވާފައިވާކަމަށެވެ. އެގޮތުން ކައުންސިލަރުންގެ އަދަދު މަދުކުރުމަށް ހުށަހެޅުއްވިކަމަށާއި، ނަމަވެސް އެކަމުގެ ސަބަބުން ރައްޔިތުންގެ ބައިވެރިވުން ކުޑަވުމުގެ ކަންބޮޑުވުން ބައެއް ފަރާތްތަކުން ފާޅުކުރެއްވިކަން ރައީސުލްޖުމްހޫރިއްޔާ ފާހަގަކުރެއްވިއެވެ.

ރައީސުލްޖުމްހޫރިއްޔާ ވިދާޅުވީ އެކަންބޮޑުވުންތަކަށް ހައްލު ލިބޭގޮތަށް ކައުންސިލްތަކުގެ ޚަރަދު ކުޑަކުރެވޭނެކަމަށެވެ. އެގޮތުން ކައުންސިލްތަކަށް އިންތިޚާބުކުރާ ބޭފުޅުންގެ ތެރެއިން ރައީސާއި ނައިބު ރައިސްއަށް އެކަނި ފުލްޓައިމް ވަޒީފާ ގޮތުގައި މުސާރަ ލިބޭގޮތަށް ހަމަޖެއްސުމަށްފަހު، ދެން ތިއްބަވާ މެމްބަރުންނަށް ބައިވެރިވާ ކޮންމެ ބައްދަލުވުމަކަށް އެލަވަންސް ދޭ ގޮތަށް ހަމަޖެހިއްޖެނަމަ ޚަރަދުތައް ކުޑަވާނެކަމަށެވެ.

President Dr @MMuizzu meets with the residents of Fiyoari Island, South Huvadhu Atoll, to listen to their concerns and discuss the island’s developmental priorities. During the meeting, he outlined key initiatives, shared plans to address pressing issues, and reaffirmed his… pic.twitter.com/WsXlaEqve9

— The President's Office (@presidencymv) January 7, 2025

ރައީސުލްޖުމްހޫރިއްޔާ ވިދާޅުވީ ހަމަ މިއުސޫލުން އަންހެނުންގެ ތަރައްޤީއަށް މަސައްކަތް ކުރާ ކޮމިޓީއާއި ސިޓީ ކައުންސިލްތަކަށް މެމްބަރުން އައްޔަންކުރާއިރުވެސް ޢަމަލުކުރެވިދާނެކަމަށެވެ. އަދި މިއީ ދުނިޔޭގެ ކުރިއަރާފައިވާ ޤައުމުތަކުގައިވެސް މިކަން ކުރަމުންދާ ގޮތްކަން ފާހަގަކުރައްވާ އޭގެ ސަބަބުން ސިޓީތަކާއި ރަށްރަށުގައި ކުރިއަށްގެންދަންޖެހޭ ތަރައްޤީގެ މަޝްރޫޢުތަކަށް ޚަރަދު ކުރުމުގެ މަގުފަހިވާނެކަން އެމަނިކުފާނު ފާހަގަކުރެއްވިއެވެ.

ރައީސުލްޖުމްހޫރިއްޔާ ވިދާޅުވީ މިއީ ރައްޔިތުންގެ ޚިޔާލާއި މަޝްވަރާގެ މަތިން ކުރެވޭނެކަމެއްކަމަށެވެ. އެހެންކަމުން މިކަމުގައި ޢާއްމުންދެކޭ ގޮތް ހިއްސާކުރެއްވުމަށް ރައީސުލްޖުމްހޫރިއްޔާ އެދިވަޑައިގެންނެވިއެވެ.