އެމްޓީސީސީގެ ހުރިހާ މަޝްރޫޢެއް ފެންނަ ޑޭޝް ބޯޑެއް ތަޢާރަފްކޮށްފި

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮންޕެނީ، އެމްޓީސީސީން ކުރިއަށް ގެންދާ މަޝްރޫޢުތަކުގެ ތަފްސީލް ހިމެނޭ ޑޭޝް ބޯޑެއް އެކުންފުނިން ތަޢާރަފްކޮށްފިއެވެ.

"އެމްޓީސީސީ ޕްރޮޖެކްޓްސް"ގެ ނަމުގައި ތަޢާރަފްކުރި މިޑޭޝް ބޯޑުން އެކުންފުނިން ހިންގާ މަޝްރޫޢުތަކުގެ ތަފްސީލު ބެލޭނެއެވެ. އަދި ރަށްރަށުގައި ހިންގާ މަޝްރޫޢުތަކާ ގުޅޭ ބައެއް މަޢުލޫމާތުތަކާއި އެ މަޝްރޫޢުތަކުގެ މަސައްކަތް ގޮސްފައިވާ ހިސާބުވެސް ބަލާލެވޭނެއެވެ. އެގޮތުން މަޝްރޫޢުގެ ބާވަތާއި ސްކޯޕާއި އަގު އަދި ނިމިފައިވާ ޕަސެންޓު އެނގެން ހުންނާނެކަމަށް އެމްޓީސީސީން ވިދާޅުވިއެވެ.

އެމްޓީސީސީ ޕްރޮޖެކްޓްސްގައި ޢާންމުކޮށްފައިވާ މަޢުލޫމާތަށް ބަލާއިރު، އެމްޓީސީސީއާ 152 މަޝްރޫޢެއް ހިންގުމަށް ހަވާލުކޮށްފައިވެއެވެ. އޭގެ ތެރެއިން މަސައްކަތް މިހާރު ހިނގަމުންދަނީ 59 މަޝްރޫޢެއްގެއެވެ. އަދި އެކި ސަބަބުތަކާހުރެ ހުއްޓިފައިވާ 48 މަޝްރޫޢަކާއި ނުފަށާ 45 މަޝްރޫޢެއްވާކަމަށް ވެބްސައިޓުގައިވާ މަޢުލޫމާތުގައިވެއެވެ.

އެމްޓީސީސީން ވިދާޅުވީ މިޑޭޝް ބޯޑު ތަޢާރަފްކޮށްފައިވަނީ އެމްޓީސީސީގެ މެނޭޖިންގ ޑިރެކްޓަރ އަޙްމަދު ސަޢުދީގެ އިސްނެންގެވުމާއި އިރުޝާދުގެ ދަށުން ކަމަށެވެ. އަދި މިފަދަ ޑޭޝް ބޯޑެއް ތަޢާރަފް ކުރުމުގެ މަޤްޞަދަކީ އެމްޓީސީސީން ރާއްޖޭގެ އެކި ކަންކޮޅުތަކުގައި ހިންގާ މަޝްރޫޢުތަކު އެންމެ ފަހުގެ މަޢުލޫމާތު ދިވެހި ރައްޔިތުންނަށް ދެފުށް ފެންނަ ގޮތަށް ފަސޭހައިން ބެލޭނެ ގޮތް ހެދުމެވެ.

We are excited to introduce the MTCC Project Dashboard—a bold leap forward in transparency and accessibility! 🌐

Stay connected like never before and track the progress of our development projects in real time. Wherever you are, whenever you want, experience how we’re shaping… pic.twitter.com/9YSDCt4Jb7

— MTCC Plc (@MTCCPlc) January 7, 2025

ނިމުނު ސަރުކާރުން އެމްޓީސީސީއާ ގިނަ މަޝްރޫޢުތަކެއް ހަވާލުކޮށްފައިވީނަމަވެސް ސަރުކާރު ބަދަލުވީއިރު މީގެ ތެރެއިން 50 މަޝްރޫޢެއްގެ މަސައްކަތް ސަރުކާރު ބަދަލުވިއިރުވެސް ނުފަށާކަމަށް ސަރުކާރުންވަނީ ވިދާޅުވެފައެވެ. އަދި މީގެ ތެރެއިން ބައެއް މަޝްރޫޢުތަކުގެ ޢަމަލީ މަސައްކަތް މިސަރުކާރުން މިހާރުވަނީ ފަށާފައެވެ.

އެމްޓީސީސީއަކީ ރާއްޖޭގެ ރަށްރަށުގައި ޢުމްރާނީ ތަރައްޤީއާ ގުޅުންހުރި ގިނަ މަޝްރޫޢުތަކެއް ހިންގަމުންދާ ކުންފުންޏެކެވެ.