މެރިޓައިމް ދާއިރާއިން ކިޔަވަން ބޭނުންވާ ފަރާތްތަކަށް އެމްއެސްއެސްގެ ސްކޮލަރޝިޕް

ރާއްޖޭގެ މެރިޓައިމް ދާއިރާ ފުޅާކޮށް ތަރައްޤީކުރުމަށް ކުރެވެމުންދާ މަސައްކަތުގެ ދަށުން، މޯލްޑިވްސް ސްޓޭޓް ޝިޕިންގް، އެމްއެސްއެސްއިން މެރިޓައިމް ދާއިރާއިން ސްކޮލަރޝިޕްގެ 2 ފުރުސަތެއް ހުޅުވާލައިފިއެވެ.

އެމްއެސްއެސްގެ ސްކޮލަރޝިޕް ޕްރޮގްރާމް، 'ކަލާސީން'ގެ ދަށުން ހުޅުވާލާ މި ސްކޮލަރޝިޕް ފުރުސަތުގައި މެލޭޝިއާގައި ޑިޕްލޮމާ ފެންވަރަށް ކިޔެވުމުގެ ފުރުސަތު ލިބިގެންދާނެއެވެ. އެގޮތުން ޑިޕްލޮމާ އިން މެރިން އިންޖީއަރިންގ ގެ އެއް ފުރުސަތާއި، ޑިޕްލޮމާ އިން ނޯޓިކަލް ސްޓަޑީސް ގެ އެއް ފުރުސަތުވަނީ ހުޅުވާލާފައެވެ.

މި ކޯސްތަކަށް ކަނޑައަޅާފައިވާ ޝަރުތުތަކުގެތެރޭގައި އޯ-ލެވެލް 5 މާއްދާއިން ފާސްވެފައިވުމާއި، ސިއްހީ އެއްވެސް މައްސަލައެއް ހުރި ފަރާތަކަށް ނުވުމާއި، ލޮލުގެ ފެނުމުގައި އެއްވެސް މައްސަލައެއް އުޅޭ ފަރާތަކަށް ނުވުން ހިމެނެއެވެ.

އެމްއެސްއެސްއިން ވިދާޅުވީ މި ސްކޮލަރޝިޕްގެ މުއްދަތަކީ 3 އަހަރާއި 4 މަސް ދުވަސްކަމަށެވެ. ކޯސް ފުރިހަމަ ކުރުމަށްފަހު އެމްއެސްއެސްގައި 18 މަސް ދުވަސްވަންދެން މަސައްކަތްކުރަންޖެހޭނެ ކަމަށް އެމްއެސްއެސްއިން ވިދާޅުވިއެވެ. ސްކޮލަރޝިޕަށް އެދި ހުށަހެޅުމުގެ ސުންގަޑިއަކީ މިމަހުގެ 21 ވަނަ ދުވަހެވެ.

ޤައުމީ ޝިޕިންގް ކުންފުނި އެމްއެސްއެސް އުފެދުމަށްފަހު ރާއްޖޭގެ ޝިޕިންގް ދާއިރާ ހަރުދަނާ ކުރުމަށް ގިނަ މަސައްކަތްތަކެއް ދަނީ ކުރަމުންނެވެ. އެގޮތުން ކުންފުނިން މީހުން ބިނާ ކުރުމަށް ކުރާ މަސައްކަތުގެ އިތުރުން ކުންފުނީގެ ދަތުރުތައް އިތުރުކޮށް ވިޔަފާރި ފުޅާކުރުމަށްވެސް ދަނީ ގިނަ މަސައްކަތްތަކެއް ކުރަމުންނެވެ.