ކަނޑުހުޅުދޫގައި އަންނަ އަހަރު, ބިން ހިއްކުމުގެ މަޝްރޫޢެއް ކުރިއަށްގެންދާނެ: ރައީސް
-
ބިން ހިއްކާ ނިމުމުން ހައުސިން މަޝްރޫޢެއް ކުރިއަށްގެންދާނެކަމަށް ވިދާޅުވި
-
ސިއްޙީ މަރުކަޒުގެ ޚިދުމަތް 24 ގަޑިއިރަށް ބަދަލުކުރުމުގެ މަސައްކަތް ކުރައްވާނެކަމަށް ވިދާޅުވި
ގއ.ކަނޑުހުޅުދޫގައި ބިން ހިއްކުމުގެ މަޝްރޫޢެއް އަންނަ އަހަރު ކުރިއަށްގެންދަވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިހެން ވިދާޅުވީ ގއ.ކަނޑުހުޅުދޫ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.
ކަނޑުހުޅުދޫ ރައްޔިތުންނާ ބައްދަލުކުރައްވާ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ އެރަށަށް ސަރުކާރުން ކޮށްދެއްވާނެ ކަންކަން އިޢުލާންކުރައްވާފައެވެ. އެގޮތުން ކަނޑުހުޅުދޫ ބަނދަރުގެ ޖާގައިގެ ދަތިކަން ހައްލުކުރުމަށް މަސައްކަތް ކުރައްވާނެކަމުގެ ޔަޤީންކަން ރައީސް ވަނީ ދެއްވާފައެވެ. އަދި އެރަށު ސްކޫލް ހޯލުގެ މަސައްކަތް ކުރިއަށްނުގޮސް ލަސްވާ މައްސަލަވެސް ހައްލުކޮށްދެއްވައި ޖާގަ އިތުރުކުރުމުގެ މަސައްކަތް ކުރައްވާނެކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.
މީގެއިތުރުން ކަނޑުހުޅުދޫގައި އަންނަ އަހަރު ބިން ހިއްކުމުގެ މަޝްރޫޢެއް ކުރިއަށްގެންދަވާނެކަމަށްވެސް ރައީސުލްޖުމްހޫރިއްޔާ ވިދާޅުވިއެވެ. އަދި ބިން ހިއްކާ ނިމުމުން ބޯހިޔާވަހިކަމުގެ މަޝްރޫޢެއްވެސް ކުރިއަށްގެންދަވާނެކަމަށް އެމަނިކުފާނު ވިދާޅުވިއެވެ.
"ބިން އިތުރުކޮށްގެން އިތުރަށް ހައުސިން ޔުނިޓްވެސް އެޅޭނީ. މިއަހަރުގެ ތެރޭގައި ފެށޭނެކަމަށް ޤަބޫލެއް ނުކުރެވޭ. އަންނަ އަހަރުގެ ބަޖެޓްގެ ތެރެއިން ބިން ހިއްކުމުގެ މަޝްރޫޢެއް ކުރިއަށްގެންދާނެ. ހިއްކާ ނިމުނީމަ އަންނަ އަހަރު ނޫނީ ޖެހިގެން އަންނަ އަހަރު ރޯ ހައުސް މަޝްރޫޢެއް ކުރިއަށްގެންދެވޭނެ." ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.
މިއަހަރުގެ ބަޖެޓުގައި ސިއްޙީ ދާއިރާއަށާއި ތަޢުލީމީ ދާއިރާއަށް އިސްކަންދޭކަން ފާހަގަކުރައްވާ ރައީސް ވަނީ އެރަށުގެ ސިއްޙީ މަރުކަޒަށް ދިމާވެފައިވާ ދަތިތައް ހައްލުކޮށްދެއްވުމަށް މަސައްކަތް ކޮށްދެއްވާނެކަމަށްވެސް ވިދާޅުވިއެވެ. އެގޮތުން އެރަށު ސިއްޙީ މަރުކަޒު 24 ގަޑިއިރަށް ޚިދުމަތްދޭ ތަނަކަށް ބަދަލުކުރެއްވުމަށް ކުރަންޖެހޭ މަސައްކަތްތައް ކުރިއަށްގެންދަވާނެކަމަށް ވިދާޅުވިއެވެ. އަދި ކަނޑުހުޅުދޫ ފުޓްސަލް ދަނޑުގައި ފެންސްޖެހުމުގެ އިތުރުން ފުޓްބޯޅަ ދަނޑު އެތްލެޓިކްސްއަށް ބޭނުންކުރެވޭގޮތަށް ބަދަލުކުރައްވާނެކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.