މައްކާގައި ތާށިވެފައިވާ އުމްރާވެރިންގެ ހާލު ސަރުކާރުން ދަނީ ގާތުން ބަލަމުން: ވަޒީރު ޑރ. ޝަހީމް

ދިވެހި ޢުމްރާވެރިންތަކެއް، ރާއްޖެ ނާދެވި މައްކާގައި ތަށީވުމާއި ގުޅިގެން އެކަން ވަރަށް ގާތުން ބަލަމުންދާކަމަށް އިސްލާމީ ކަންތައްތަކާބެހޭ ވަޒީރު ޑރ.މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

ޕީއެސްއެމް ނިއުސްއަށް މަޢުލޫމާތު ދެއްވަމުން އިސްލާމީ ކަންތައްތަކާބެހޭ ވަޒީރު ޑރ.މުޙައްމަދު ޝަހީމް ޢަލީ ސަޢީދު ވިދާޅުވީ، ޢުމްރާއަށް މީހުން ގެންދިޔުމުގެ ހުއްދަ އޮންނަ ކުންފުންޏެއްގެ ޙަވާލުގައި ޢުމްރާއަށް ދިޔަ ދިވެހީންތަކެއް ރާއްޖެއަށް ނާދެވި މައްކާގައި ތާށިވެފައިވާކަން އިސްލާމީ ކަންތައްތަކާބެހޭ ވުޒާރާގެ ސަމާލުކަމަށް އައިސްފައިވާކަމަށެވެ. އަދި އެކަން ވަރަށް ގާތުން ބައްލަވަމުން ގެންދަވާކަމަށް ވަޒީރު ވިދާޅުވިއެވެ.

ވަޒީރު ވިދާޅުވީ ޢުމްރާއަށް މީހުން ގެންދާ ކުންފުނިތަކުން އެކުންފުނިތަކުގެ ހަވާލުގައި ޢުމްރާއަށް ދާ ފަރާތްތަކުގެ ޒިންމާ ފުރިހަމައަށް ނަގަންވާނެކަމަށާއި ކުންފުނިތަކުން އަދާކުރަންޖެހޭ މަސްއޫލިއްޔަތު އަދާކުރުމަކީ ގަވާއިދާއި އުސޫލުގެ ތެރެއިން ކޮންމެހެން ކުރަންޖެހޭކަމެއްކަމަށެވެ. އަދި ޢުމްރާއަށް ގެންދިޔުމަށް މީހުންގެ އަތުން ފައިސާ ނެގުމަށްފަހު އެފައިސާ އެހެންކަންކަމަށް ބޭނުންކުރުމަށްފަހު، ޢުމްރާވެރިން ޙާލުގައި ޖެހުމަކީ ވަރަށް ބޮޑު މައްސަލައެއްކަމަށް ވަޒީރު ވިދާޅުވިއެވެ.

ވަޒީރު ވިދާޅުވީ ދިވެހިންނަށް އެހީތެރިކަން ބޭނުންވާ ދަނޑިވަޅުގައި ދިވެހި ސަރުކާރުން އަބަދުވެސް އިސްކުރާނީ ދިވެހި ރައްޔިތުންގެ ސަލާމަތާއި ރައްކާތެރިކަންކަމަށެވެ. އަދި ރާއްޖެ ނާދެވިފައި ތިބި މީހުން އަނބުރާ ރާއްޖެ ގެނައުމަށް ކޮށްދެވެން އޮތް ހުރިހާ މަސައްކަތެއް ކުރައްވާނެކަމަށްވެސް ވަޒީރު ވިދާޅުވިއެވެ.

މަޢުލޫމާތު ލިބިފައިވާގޮތުގައި މައްކާ ތާށިވެފައިވަނީ އަލްޙިޖްރު ނަމަކަށް ކިޔާ ކުންފުންޏެއްގެ ޙަވާލުގައި ޢުމްރާއަށް ދިޔަ 24 ދިވެއްސެކެވެ. އަދި މި މައްސަލަ ދިމާވީ ޢުމްރާއަށް ދިޔަ މީހުން މާލެ އައުމަށް ޓިކެޓް ނަގަން ހުރި ފައިސާ އެ ކުންފުނިން އެހެންކަންކަމަށް ޚަރަދުކުރުމުންކަމަށްވެސް މަޢުލޫމާތު ލިބެއެވެ.

ޢުމްރާއަށް މީހުން ގެންދިޔުމުގައި އިހުމާލުވާ ކުންފުނިތަކާމެދު އުސޫލުގެ ދަށުން ފިޔަވަޅު އަޅުއްވާނެކަމަށް އިސްލާމީ ކަންތައްތަކާބެހޭ ވުޒާރާއިން ވަނީ މީގެކުރިން ވިދާޅުވެފައެވެ.