މައްކާގައި ހާލުގައި ޖެހިފައި ތިބި ދިވެހިން ހުކުރުދުވަހު ރާއްޖެ ގެނައުމަށް މަސައްކަތްކުރަނީ

އަމިއްލަ ގްރޫޕެއްގެ ހަވާލުގައި އުމްރާއަށްް ގޮސް، ރާއްޖެ ނާދެވި ހާލުގައި ޖެހިފައި ތިބި ދިވެހިން ރާއްޖެ ގެނައުމުގެ މަސައްކަތް ކުރައްވަމުން ގެންދަވާކަމަށް ސަރުކާރުން ވިދާޅުވެއްޖެއެވެ.

ޕީއެސްއެމް ނިއުސްއަށް މައުލޫމާތު ލިބިފައިވާ ގޮތުގައި މައްކާގައި ހާލުގައި ޖެހިފައި ވަނީ އަލްޙިޖްރު ކިޔާ ކުންފުންޏެއްގެ ޙަވާލުގައި ޢުމްރާއަށް ދިޔަ 24 ދިވެއްސެކެވެ.

އިސްލާމީ ކަންތައްތަކާއި ބެހޭ ވަޒީރު ޑރ.މުޙައްމަދު ޝަހީމް ޢަލީ ސަޢީދު ވިދާޅުވީ، މޯލްޑިވްސް ޙައްޖި ކޯޕަރޭޝަންގެ އެހީތެރިކަމާއެކު މައްކާގައި ހާލުގައި ޖެހިފައި ތިބި ދިވެހިން މިމަހުގެ 10 ވަނަ ދުވަހު މާލެ ގެނައުމުގެ މަސައްކަތް ކުރައްވަމުންދާކަމަށެވެ. އެހެންނަމަވެސް އެމީހުން ތިބި ހޮޓަލުން ނިކުންނަން ޖެހޭތީ، އެމީހުން މާލެ އައުމަށް ހަމައަށް ކެއިންބުއިމާއި ހުރުމުގެ އިންތިޒާމުތައް ޙައްޖު ކޯޕަރޭޝަނުން ހަމަޖައްސަވާދެއްވާނެކަމަށް ވަޒީރު ވިދާޅުވިއެވެ. ވަޒީރު ވިދާޅުވީ ޢުމްރާވެރިންގެ ތެރޭގައި 12 އަހަރުގެ 3 ކުޑަކުއްޖަކުވެސް ހިމެނޭކަމަށެވެ.

މޯލްޑިވްސް ޙައްޖު ކޯޕަރޭޝަން ވަރުގަދަ ކަމާއެކު ވުޖޫދުގައި އޮންނަންޖެހެނީ ކީއްވެގެންކަން ޙާލުގެ ދުލުން ނުކިޔައިދޭތޯ؟ ހައްޖު ކޯޕަރޭޝަނާ މެދު ދިވެހިން އުފާވާންވާނެ..❤️❤️@schakyyl https://t.co/z0F53bN83p

— Mohamed Shaheem Ali Saeed (@Mohamedshaheem1) January 8, 2025

ސަރުކާރުން ވިދާޅުވީ އުމްރާވެރިންނަށް ބޭނުންވާ އެހީތެރިކަން ފޯރުކޮށްދިނުމުގެ މަސައްކަތް ހައްޖު ކޯޕަރޭޝަނުން ކުރައްވަމުން ގެންދަވާއިރު އެމީހުންގެ ޙާލު ރަނގަޅުކަމަށެވެ. އަދި ޙާލުގައި ޖެހޭ އެއްވެސް ދިވެއްސަކަށް އަޅާނުލާ ދޫނުކޮށްލައްވާނެ ކަމުގެ ޔަގީންކަން ދެއްވާކަމަށްވެސް ސަރުކާރުން ވިދާޅުވެއެވެ.

މި މައްސަލަ ދިމާވީ ޢުމްރާއަށް ދިޔަ މީހުން މާލެ އައުމަށް ޓިކެޓް ނަގަން ހުރި ފައިސާ އެ އުމްރާ ކުންފުނިން އެހެން ކަންކަމަށް ޚަރަދުކުރުމުންކަމަށް މަޢުލޫމާތު ލިބެއެވެ. ޢުމްރާއަށް މީހުން ގެންދިޔުމުގައި އިހުމާލުވާ ކުންފުނިތަކާމެދު އުސޫލުގެ ދަށުން ފިޔަވަޅު އަޅުއްވާނެކަމަށް އިސްލާމީ ކަންތައްތަކާބެހޭ ވުޒާރާއިން ވަނީ މީގެކުރިން ވިދާޅުވެފައެވެ.