ރައީސުލްޖުމްހޫރިއްޔާ ހުވަދުއަތޮޅުގެ 9 ރަށަކަށް ކުރެއްވި ދަތުރުފުޅު ނިންމަވާލައްވައިފި

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހުވަދުއަތޮޅުގެ 9 ރަށަކަށް ކުރެއްވި ދަތުރުފުޅު ނިންމަވާލައްވައިފިއެވެ. އެމަނިކުފާނުގެ މި ދަތުރުފުޅަކީ 3 ދުވަހުގެ މުއްދަތަކަށް ކުރެއްވި ދަތުރުފުޅެކެވެ.

މި ދަތުރުފުޅުގައި އެމަނިކުފާނުވަނީ ގދ. އަތޮޅުގެ 5 ރަށަކަށާއި، ގއ. އަތޮޅުގެ 4 ރަށަކަށް ވަޑައިގެންފައެވެ. މި ދަތުރުފުޅުގެ ތެރެއިން ގދ. އަތޮޅުން ރައީސް ވަޑައިގަތީ ހޯނޑެއްދޫ، ނަޑެއްލާ، ވާދޫ، ފިޔޯރީ އަދި ރަތަންފަންދޫއަށެވެ. ގއ. އަތޮޅުން އެމަނިކުފާނު ވަޑައިގަތީ، ކަނޑުހުޅުދޫ، ނިލަންދޫ، މާމެންދޫ އަދި ދެއްވަދޫއަށެވެ.

ރައީސުލްޖުމްހޫރިއްޔާގެ މި ދަތުރުފުޅުގެ ތެރެއިން އެމަނިކުފާނު ވަނީ ހޯނޑެއްދޫގައި ކުރިއަށްގެންދިޔަ ފެނާއި ނަރުދަމާގެ ޚިދުމަތް އިފްތިތާޙްކޮށްދެއްވާފައެވެ. އަދި ހޯނޑެއްދޫ، ނަޑެއްލާ، ކަނޑުހުޅުދޫގައި ބޭންކް އޮފް މޯލްޑިވްސް، ބީއެމްއެލްގެ އޭޓީއެމް ބެހެއްޓުމަށްޓަކާ އެ 3 ރަށުގެ ކައުންސިލްތަކާއި ބީއެމްއެލްއާ ދެމެދު އެއްބަސްވުމުގައި ސޮއިކުރުމުގެ ރަސްމިއްޔާތުތައް ޝަރަފުވެރިކޮށްދެއްވާފައެވެ. މިއީ ރާއްޖޭގެ ހުރިހާ ރަށެއްގައި އޭޓީއެމް ބެހެއްޓުމަށް އެމަނިކުފާނު ވެޑައިގެންފައިވާ ވަޢުދުފުޅުގެ ދަށުން ވެވުނު އެއްބަސްވުންތަކެކެވެ.

ހުވަދުއަތޮޅަށް ކުރެއްވި މި ދަތުރުފުޅުގެ ތެރެއިން ރައީސުލްޖުމްހޫރިއްޔާ ވަޑައިގެންނެވި 9 ރަށުގެވެސް ރައްޔިތުންނާ އެމަނިކުފާނު ވަނީ ބައްދަލުކުރައްވާފައެވެ. މި ބައްދަލުކުރެއްވުންތަކުގައި ރައީސުލްޖުމްހޫރިއްޔާ ދެއްކެވި ވާހަކަފުޅުތަކުގައި މި ރަށްތަކުގެ ތަރައްޤީއާއި ކުރިއެރުމަށް ކައުންސިލްތަކާއި ރައްޔިތުން އެންމެ ބޮޑަށް ބޭނުންވާ ކަންކަމުގައި ކުރިއަށްދެވޭނެ ގޮތްތަކާއި، އެކަމުގައި ސަރުކާރުން ގެންގުޅުއްވާ ސިޔާސަތުތައް ވަނީ ހިއްސާކުރައްވާފައެވެ. އަދި ރިޔާސީ އިންތިޚާބުގެ ކެމްޕޭނު ތެރެއިން އެމަނިކުފާނު އެ ރަށްތަކަށް ވެވަޑައިގެންފައިވާ ވަޢުދުފުޅުތައް ފުއްދަވައިދެއްވާނެކަމުގެ ޔަޤީންކަން އެމަނިކުފާނު ވަނީ ދެއްވާފައެވެ.

ވަކިން ޚާއްސަކޮށް ހުވަދުއަތޮޅަކީ ރާއްޖޭގެ ނިސްބަތުންވެސް މަސްވެރިކަން އެންމެ ފުޅާ ދާއިރާއެއްގައި ކުރަމުންދާ އެއް ސަރަޙައްދައްވުމުން މަސްވެރިކަމުގެ ދާއިރާއިން އެމަނިކުފާނު ވެވަޑައިގެންފައިވާ ވަޢުފުދުޅުތައް ފުއްދަވައިދެއްވާ، މަސްވެރިންގެ އަޑު އަހައި، ކަންބޮޑުވުންތަކަށް ހައްލު ހޯއްދަވައިދެއްވާނެކަމަށް އެމަނިކުފާނު ވަނީ ވިދާޅުވެފައެވެ.

ރައީސްގެ މިދަތުރުފުޅު ނިންމަވައިލެއްވުމުގެ ކުރިން ވަނީ ގއ. ކޫއްޑޫގައި މިފްކޯއިންހިންގާ ބައެއް އޮޕަރޭޝަންތައް ކުރިއަށްދާގޮތް ބައްލަވާލައްވައި، މަސްވެރިންނާއިވެސް ބައްދަލުކުރައްވާފައެވެ.

ރައީސުލްޖުމްހޫރިއްޔާ އަތޮޅުތަކަށް ކުރައްވާ ދަތުރުފުޅަކީ ރައްޔިތުންނާއި ގާތުން މަސައްކަތްކުރެއްވުމަށްޓަކާ އެމަނިކުފާނު ފަށްޓަވާފައިވާ ސިލްސިލާ ދަތުރުފުޅެކެވެ. އެގޮތުން މިހާތަނަށް 190 އަށްވުރެ ގިނަ ކައުންސިލާއި އެމަނިކުފާނު ވަނީ ބައްދަލުކުރައްވާފައެވެ. 2024 ވަނަ އަހަރު ފެއްޓެވި މިދަތުރުފުޅުތަކުގެ ތެރެއިން އެމަނިކުފާނުގެ އަމާޒަކީ ރާއްޖޭގައި މީހުން ދިރިއުޅޭ ހުރިހާ ރަށަކަށް ވަޑައިގެން ރައްޔިތުންގެ ހާލު ގާތުން ބެއްލެވުމެވެ.