ރައީސް އެދިވަޑައިގެންނެވީ ވަޢުދުތައް ފުއްދަވާނެކަމަށް އުއްމީދުކުރެއްވުމާއެކު ޔަގީންވެސް ކުރެއްވުމަށް!

އެމަނިކުފާނު ވެވަޑައިގެންނެވި ވަޢުދުތައް ފުއްދަވައިދެއްވާނެކަމަށް އުއްމީދުކުރެއްވުމާއެކު ޔަގީންވެސް ކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެދިވަޑައިގެންފިއެވެ.

އެމަނިކުފާނު މިގޮތަށް އެދިވަޑައިގެންނެވީ ރައްޔިތުންނާ ބައްދަލުކުރެއްވުމަށް ކުރައްވަމުން ގެންދަވާ ދަތުރުފުޅުގެ ތެރެއިން ހުވަދުއަތޮޅަށް ކުރެއްވި ދަތުރުފުޅު ނިންމަވާލައްވައި ނޫސްވެރިންނަށް މައުލޫމާތު ދެއްވަމުންނެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ ރައްޔިތުންނާ ބައްދަލުކުރެވި ރައްޔިތުން ބޭނުންވާ ކަންކަން އެނގިގެންދިއުމަކީ ލިބިވަޑައިގަންނަވާ ހިތްހަމަޖެހުމެއް ކަމަށެވެ. އަދި ސީދާ ރައްޔިތުންނާ ބައްދަލުކުރައްވައި މަޝްވަރާކުރެއްވުމުގެ ސަބަބުން ސަރުކާރުން ހިންގާ މަޝްރޫޢުތައް ކުރިއަށްގެންދެވޭނީ ރައްޔިތުން ބޭނުންވާގޮތަށް ކަމުގެ ޔަގީންކަން ލިބިވަޑައިގަންނަވާ ކަމަށްވެސް ވިދާޅުވިއެވެ.

ރައީސް ވިދާޅުވީ ރައްޔިތުން ތިބީ ވަރަށް ގިނަ އުއްމީދުތަކާއެކުގައި ކަމަށާއި އެ އުއްމީދުތައް ހަގީގަތަކަށް ހައްދައިދެއްވާނެ ކަމަށެވެ. އަދި އެމަނިކުފާނު ރައްޔިތުންނަށް ވެވަޑައިގަންނަވާ ވައުދުތައް ފުއްދަވާނެ ކަމަށް ރައްޔިތުން ޔަގީންކުރެއްވުމަށް އެދިވަޑައިގަންނަވާ ކަމަށެވެ.

"މާލޭގައި ހުރެ ސިޓީއަކުން ނުވަތަ ކޮންމެވެސް ރިކުއެސްޓެއްގެ ތެރެއިން އަންނަ ކަންކަމުގެ ތެރެއިން އެއްކަމަކީ ލަސްވުން. އަނެއްކަމަކީ ވަރަށް ގިނަ ފަހަރު ރައްޔިތުން ބޭނުންވާގޮތް ނުވެފައޮވޭ. އަޅުގަނޑު މިއީ އެތައް އަހަރެއްގެ ތަޖުރިބާއިން އެކި ހައިސިއްޔަތުން މަސައްކަތްކޮށްފަ ހުރީމަ އަޅުގަނޑަށް ފެނިފައި ހުރިތަން މިއެކި އޭންގަލްތަކުން. އެހެންވީމަ އަޅުގަނޑަށް ގަބޫލުކުރެވެނީ ސީދާ ރައްޔިތުން ގާތަށް އައިސްގެން ކަންކަން އޮޅުންފިލުވީމަ ވަރަށް ބޮޑަށް ހަމަ ފަސޭހަވެގެންދެއޭ،" ރައީސް ވިދާޅުވިއެވެ.

ރައީސް ވިދާޅުވީ މި ސަރުކާރުން އެކުލަވާލައްވާފައިވާ ބަޖެޓު މިއަހަރު ތަންފީޒުކުރައްވާއިރު މިއަހަރާއި އަންނަ އަހަރު ވެގެންދާނީ އެމަނިކުފާނު ރާއްޖޭގެ ރަށްތަކަށް ވެވަޑައިގެންފައިވާ ވައުދުތަކުގެ މަސައްކަތްތައް ފެށިގެންދާނެ ދެ އަހަރަށް ކަމަށެވެ. އަދި މި ވައުދުތައް ފުއްދަވާނީ ރައްޔިތުންގެ މަޝްވަރާއާއެކު ރައްޔިތުން ބޭނުންވާ ގޮތަށް ކަމަށްވެސް އެމަނިކުފާނު ވިދާޅުވިއެވެ.