ގޭގައި ހުރެގެން ޑިޓޮކްސް ފަރުވާ ލިބޭނެ އައުޓް ޕޭޝަންޓް ޓްރީޓްމެންޓް ނިޒާމެއް ޤާއިމްކުރަނީ

މަސްތުވާތަކެތިން އަރައިގަތުމަށްދެވޭ ޑިޓޮކްސިފިކޭޝަންގެ ފަރުވާ އަމިއްލަ ރަށުގެ ގޭގައި ތިބެގެން ލިބިގަތުމުގެ ނިޒާމު ޤާއިމްކުރުމުގެ މަސައްކަތް މަހެއްހާ ދުވަހުގެ ތެރޭގައި ފައްޓަވާނެކަމަށް ނެޝަނަލް ޑްރަގް އެޖެންސީގެ ސީއީއޯ ލުބްނާ ޒާހިރު ވިދާޅުވެއްޖެއެވެ.

ލުބްނާ މިހެން ވިދާޅުވީ ޑިޓޮކްސިފިކޭޝަން ފަރުވާގެ ނިޒާމާ ބެހޭގޮތުން ޕީއެސްއެމް ނިއުސްއަށް ދެއްވި ޚާއްސަ ބަސްދީގަތުމެއްގައެވެ.

ޕީއެސްއެމް ނިއުސްއަށް ދެއްވި ބަސްދީގަތުމުގައި ދާޚިލީ ސަލާމަތާއި ފަންނިއްޔާތާ ބެހޭ ވުޒާރާގެ ސްޓޭޓް މިނިސްޓަރ އަދި ނެޝަނަލް ޑްރަގް އެޖެންސީގެ ސީއީއޯ ލުބްނާ ޒާހިރު ވިދާޅުވީ ވޭތުވެދިޔަ 1 އަހަރު ދުވަހުގެ ތެރޭގައި ކުރެވުނު މަސައްކަތްތަކާއެކު މަސްތުވާތަކެތިން އަރައިގަތުމަށް ވަރަށް ގިނަ ބަޔަކަށް ފަރުވާދޭން ފަށާފައިވާ ކަމަށެވެ.

"ސަރުކާރު ބަދަލުވިއިރު ސެންޓަރުތަކުގައި ތިބީ އެންމެ 30 މީހުން. މަގުމަތީގައި ތިބި އެތައް ބަޔަކު ފަރުވާގެ ތެރެއަށް ވައްދާފައި ވަނީ. އަމިއްލައަށް ބޭނުންވެގެން ފަރުވާ ހޯދަން ބޭނުންވާ މީހުންގެ އަދަދުވެސް މިހާރު މާ ގިނަ. ޑްރަގް ކޯޓުން ޙުކުމްކުރުމުންވެސް އެތައް ބަޔަކަށް ފަރުވާ ދޭން ޖެހިފައިވޭ." ލުބްނާ ވިދާޅުވިއެވެ.

ލުބްނާ ވިދާޅުވީ ރީހެބިލިޓޭޝަން ސެންޓަރުތަކަށް ފަރުވާއަށް ދިއުމުގެ ކުރިން ޑިޓޮކްސިފިކޭޝަން މަރުޙަލާއެއް ނިންމަންޖެހޭ ކަމަށެވެ. ޑިޓޮކްސިފިކޭޝަނަކީ އިންސާނާގެ ހަށިގަނޑުގައި މަސްތުވާތަކެތީގެ ވިހަ ދުއްވާލުމަށް ދެވޭ ފަރުވާއެވެ. ރާއްޖޭގައި މިކަން ކުރަނީ ބޭހެއް ދީގެންނެވެ. މިކަންކުރުމަށް 14 ދުވަހުގެ މުއްދަތެއް ހޭދަވާނެއެވެ.

ލުބްނާ ވިދާޅުވީ މަސްތުވާތަކެތީގެ ފަރުވާއަށް ދިއުމަށް ކިޔުގައި މަޑުކުރަންޖެހި، ކިޔު ބޮޑުވަނީ ޑިޓޮކްސިފިކޭޝަން ފަރުވާ ދިނުމަށް އޮންނަ ޖާގަ ނެތުމުން ކަމަށެވެ. އޭނާ ވިދާޅުވީ މިވަގުތު ޑިޓޮކްސިފިކޭޝަން ފަރުވާ ދިނުމަށްޓަކައި އޮތީ 25 އެއްހާ ޖާގަކަމަށެވެ. އެހެންކަމުން ދިގުކިއުގައި ތިބެން ނުޖެހި ފަރުވާ ލިބޭނެގޮތް ހެދުމުގެ ގޮތުގައި ސެންޓަރަކަށް ނޮގޮސް، އަމިއްލަ ރަށުގެ ގޭގައި ހުރެގެން ޑިޓޮކްސިފިކޭޝަން ފަރުވާ ލިބިގަނެވޭނެ އައުޓް ޕޭޝަންޓް ޓްރީޓްމެންޓް ނިޒާމެއް ޤާއިމްކުރުމުގެ މަސައްކަތްކުރަމުން އަންނަކަމަށް ލުބްނާ ވިދާޅުވިއެވެ. އެގޮތުން މި ނިޒާމު ޤާއިމުކުރާ ފުރަތަމަ ރަށުގައި ކުރިއަށް އޮތް މަހެއްހާ ދުވަހުގެ ތެރޭގައި އައުޓް ޕޭޝަންޓް ޑިޓޮކްސިފިކޭޝަން ނިޒާމު ޤާއިމްކުރެވޭނެކަމަށް ލުބްނާ ވިދާޅުވިއެވެ. މި ނިޒާމު ޤާއިމްކުރާނެ ފުރަތަމަ ރަށެއް އަދި ހާމަކުރައްވާފައެއް ނުވެއެވެ.

"ކޮމިއުނިޓީ ޑިޓޮކްސް ފެށުމަށް ނަރުހުންނާއި ޑޮކްޓަރުން ތަމްރީންކުރަންޖެހޭ. އަދި ރާއްޖޭގެ ރަށްރަށުގައި ކައުންސެލިންދޭ މީހުންވެސް ބިނާކުރުމަށް މަސައްކަތްކުރާނަން. ނެޝަނަލް އިންސްޓިޓިއުޓް ފޮރ ރިސަރޗް އެންޑް އެޑިކްޝަން ސްޓަޑީސް އިންސްޓިޓިއުޓެއް އެބަހުރި އެންޑީއޭގައި. އެތަން މެދުވެރިކޮށް ތަމްރީންކުރާނީ." ލުބްނާ ވިދާޅުވިއެވެ.

ލުބްނާ ވަނީ އައުޓް ޕޭޝަންޓް ޑިޓޮކްސިފިކޭޝަން ނިޒާމެއް ޤާއިމްކުރުމުގެ އިތުރުން ސެންޓަރުގައި ބައިތިއްބައިގެން ފަރުވާ ދިނުމަށް އޮންނަ ޖާގަ އިތުރުކުރުމަށްވެސް މަސައްކަތްކުރަމުންދާކަން ފާހަގަކުރައްވާފައެވެ. އެގޮތުން މިހާރު ކުރަމުންދާ މަސައްކަތްތަކާއެކު ޑިޓޮކްސް ފަރުވާދިނުމަށް ސެންޓަރުގެ ޖާގަ 50 އަށް އިތުރުކުރެވޭނެކަން ލުބްނާ ފާހަގަކުރެއްވިއެވެ.

ރީހެބިލިޓޭޝަން ސެންޓަރުތަކުގައި ފަރުވާ ދޭން ފަށާނީ ޑިޓޮކްސިފިކޭޝަންގެ ފަރުވާއަށްފަހުއެވެ. ލުބްނާ ވިދާޅުވީ މިވަގުތު ރާއްޖޭގައި ހުރި މައި ރީހެބިލިޓޭޝަން ސެންޓަރު، ކ.ހިންމަފުށީ ސެންޓަރުގައި 170 އެއްހާ މީހުންނަށް ފަރުވާ ދެވޭނެ ކަމަށެވެ. އަދި ރަށްރަށުގައި ހުރި ކޮމިއުނިޓީ ސަރވިސް ސެންޓަރުތަކުގައި 400 އެއްހާ މީހުންނަށް ފަރުވާދެވޭނެކަމަށްވެސް ލުބްނާ ވިދާޅުވިއެވެ.

ކޮމިއުނިޓީ ސަރވިސް ސެންޓަރުތައް ހުންނަ ތަންތަނުގެ ތެރޭގައި ގދ. ތިނަދޫއާއި އައްޑޫ ހުޅުމީދޫއާއި އައްޑޫ ހިތަދޫއާއި ފުވައްމުލައް ހިމެނެއެވެ.

މަސްތުވާތަކެތީގެ ފަރުވާގެ ކިޔުގައި މިވަގުތު 109 މީހުން އެބަ ތިބިކަމަށް އެންޑީއޭއިން ވިދާޅުވެއެވެ.