ސްޕެނިޝް ސުޕަރ ކަޕްގައި ރޭ މަޔޯކާ އާއި ދެކޮޅަށް ރެއާލް މެޑްރިޑް ކުޅުނު މެޗު 3-0 ގެ ނަތީޖާއަކުން ރެއާލް މެޑްރިޑް ކާމިޔާބުކޮށްފި އެވެ.
ސައުދި އަރަބިއްޔާގެ ޖިއްދާގެ ކިންގް އަބްދުالله ސިޓީ ސްޓޭޑިއަމްގައި ކުޅުނު މި މެޗުގެ ފުރަތަމަ ހާފުގައި އެއްވެސް ޓީމަކަށް ލަނޑެއް ކާމިޔާބު ކުރެވިފައިނުވި ނަމަވެސް މި މެޗުގައި ރެއާލް މެޑްރިޑް އިން ވަނީ ރަގަޅު ކުޅުމެއް ދައްކާ އިދިކޮޅު ޓީމުގެ ގޯލަށް ނުރައްކާތެރި ގިނަ ހަމަލަތަކެއް ފޮނުވާލާފަ އެވެ.
އެގޮތުން ރެއާލް މެޑްރިޑްގެ ފޯވަޑް ކިލިއަން އެމްބާޕޭ އާއި ރޮޑްރިޑިގޯ އަށް ލިބުނު ފުރުސަތުތައް ފާހަގަކޮށްލެވެ އެވެ.
މި މެޗުގައި ރެއާލް މެޑްރިޑް އިން ޖެހި ފުރަތަމަ ލަނޑު މެޗުގެ 63 ވަނަ މިނިޓުގައި އެ ޓީމަށް ކާމިޔާބު ކޮށްދީފައިވަނީ ޖޫޑް ބެލިންހަމް އެވެ. މިއީ އޭނާ އެންމެ ފަހުން ރެއާލް މެޑްރިޑަށް ކުޅުނު ނުވަ މެޗުގައި ޖެހި ހަތްވަނަ ގޯލެވެ.
މެޗުގެ އިތުރު ވަގުތުގައި މަޔޯކާގެ ވަލްޖެންޓް އަތުން ބައިކޮޅަށް ލަނޑެއް ވަދެފައިވަނިކޮށް އިތުރު ވަގުތުގެ ފަސްވަނަ މިނިޓުގައި ރޮޑްރިގޯ ވަނީ އިތުރު ލަނޑެއް ކާމިޔާބުކޮށް މެޗުގެ ނަތީޖާ 3-0 އަށް ބަދަލުކޮށްފަ އެވެ.
ޖުމްލަ ހަތަރު ޓީމު ވާދަކުރާ މި މުބާރާތުގެ ފައިނަލުގައި ރެއާލް މެޑްރިޑާއި ދެކޮޅަށް ނިކުންނާނީ ވާދަވެރި ބާސެލޯނާ އެވެ. ބާސެލޯނާ އިން މި މުބާރާތުގެ ފައިނަލުގެ ޖާގައެއް ހޯދާފައިވަނީ 2-0 ގެ ނަތީޖާއަކުން އެތްލެޓިކް ކްލަބް ބަލިކުރުމަށްފަހުގަ އެވެ.
ސެމީ ގައި ބާސެލޯނާ އެތްލެޓިކް އާއި ދެކޮޅަށް ކުޅުނު އިރު އެ ޓީމުގެ ޑެނީ އޮލްމޯ އެ ކްލަބުގައި ރަޖިސްޓަރީ ކުރުމާއި ގުޅޭ ގޮތުން އުފެދިފައިވާ މައްސަލަތަކާއިއެކު އޭނާއަށް އެ މެޗުގައި ކުޅެވިފައެއް ނުވެއެވެ. ނަމަވެސް މިހާރު އެ މައްސަލަ ސްޕެއިންގެ އެފްއޭ އާއި ދެކޮޅަށް ކޯޓުން ނިންމާފައިވާއިރު ބާސެލޯނާގެ ކުޅުންތެރިއެއްގެ ގޮތުގައި އޮލްމޯ އަނެއްކާވެސް ރަޖިސްޓަރީ ކުރުމުގެ ފުރުސަތުވަނީ ލިބިފަ އެވެ. އެހެންކަމުން މި މުބާރާތުގެ ފައިނަލުގައި އޭނާއަށް ކުޅުމުގެ ފުރުސަތު ވަނީ ލިބިފަ އެވެ.
އަންނަ އާދީއްތަ ދުވަހު މި މުބާރާތުގެ ފައިނަލް މެޗު ކުޅުމަށް ހަމަޖެހިފައިވާއިރު ބާސެލޯނާ އާއި ރެއާލް މެޑްރިޑް އެންމެ ފަހުން ބައްދަލުކޮށްފައިވަނީ ސްޕެނިޝް ލަލީގާގައި މިދިޔަ އަހަރުގެ އޮކްޓޯބަރ މަހު އެވެ. އެ މެޗުން ބާސެލޯނާ ވަނީ ވަރަށް ފަސޭހަކަމާއެކު 4-0 ގެ ނަތީޖާއަކުން މޮޅުވެފަ އެވެ.
ސްޕެނިޝް ސުޕަރ ކަޕް ބާސެލޯނާ އިން 14 ފަހަރު ކާމިޔާބު ކޮށްފައިވާއިރު ރެއާލް މެޑްރިޑަށް މި މުބާރާތް ކާމިޔާބު ކުރެވިފައިވަނީ 13 ފަހަރެވެ.