ދުނިޔޭގެ އެއްވަނަ ފިރިހެން ޓެނިސް ކުޅުންތެރިޔާ ޔަނިކް ސިނާ މަނާ ބޭހަށް ޕޮޒިޓިވްވެފައިވާ މައްސަލައިގެ އަޑުއެހުންތައް އަންނަ އެޕްރީލު މަހު ފެށުމަށް ހަމަޖެހިފައިވާ ކަމަށް ކޯޓް އޮފް އާބިޓްރޭޝަން ފޯ ސްޕޯޓްސް (ކާސް) އިން ބުނެފިއެވެ.
މިދިޔަ އަހަރުގެ މާޗު މަހު ނެގި ދެ ޓެސްޓަކުން ސިނާ ޕޮޒިޓިވް ވެފައިވާއިރު، ސިނާއަށް ވަނީ ޕްރޮވިޝަނަލް ސަސްޕެންޝަނެއް އޭރު ދީފައެވެ. ނަމަވެސް އޭނާ ދިޔައީ އެ ސަސްޕެންޝަނުގައި ހުރެ ހުރިހާ މުބާރާތެއްގައި ވާދަކުރަމުންނެވެ.
އަދި އޮގަސްޓް މަހު އޮތް އަޑުއެހުމެއްގައި ސިނާ މަނާ ބޭހަކަށް ޕޮޒިޓިވްވި ސަބަބު ކިޔައިދިނުމުން އޭނާ ވަނީ އެ ސަސްޕެންޝަނުން ސަލާމަތްވެފައެވެ. ނަމަވެސް ވޯލްޑް އެންޓިޑޯޕިން އެޖެންސީ (ވާޑާ) އިން ވަނީ އެ މައްސަލަ ކާސްގައި މިދިޔަ ސެޕްޓެމްބަރު މަހު އިސްތިއުނާފު ކޮށްފައެވެ.
މި މައްސަލައިގެ އަޑު އެހުންތައް އަންނަ އެޕްރީލު މަހަށް ތާވަލުކޮށްފައިވާއިރު، ކާސް އިން ނެރެފައިވާ ބަޔާނެއްގައި ބުނެފައިވަނީ އެއްވެސް ފަރާތަކުން މި އަޑުއެހުންތައް ހުޅުވާލައިގެން ބޭއްވުމަށް އެދިފައިނުވާތީ އަޑުއެހުންތައް ކުރިއަށް ގެންދާނީ ސިއްރު ބައްދަލުވުންތަކެއްގެ ގޮތުގައި ކަމަށެވެ.
މަނާ ބޭހަށް ދެ ފަހަރު ހެދި ޓެސްޓުތަކުންވެސް ޕޮޒިޓިވްވި ނަމަވެސް ސިނާއަށް ކުޅުމުގެ ފުރުސަތު ދިނުމާ ގުޅިގެން ބައެއް ޓެނިސް ކުޅުންތެރިންވަނީ އެކަމަށް ވަރަށް ބޮޑަށް ފާޑު ކިޔާފައެވެ. އެގޮތުން ނޯވަކް ޖޯކޮވިޗް ވަނީ ކުޅުންތެރިންގެ މެދުގައި ތަފާތު ކުރުންތައް ގެންގުޅޭ ކަމަށް ބުނެ ވަރަށް ބޮޑަށް ފާޑު ކިޔާފައެވެ.
މި މައްސަލައިގައި ސިނާ ގޯހެއް ހަދާފައިވާ ކަމަށް ކާސް އިން ނިންމައިފިނަމަ، އޭނާއަށް ދެ އަހަރު ދުވަހުގެ ސަސްޕެންޝަނެއް އަންނާނެ އެވެ. އަދި މިދިޔަ ދުވަސްތަކުގައި އޭނާ ކާމިޔާބުކޮށްފައިވާ މުބާރާތްތައްވެސް އަތުލެވޭނެ އެވެ.
ކާސްއިން ސިނާގެ އަޑުއެހުންތައް ތާވަލުކޮށްފައި މިވަނީ އޮސްޓްރޭލިއަން އޯޕަން ޓެނިސް މުބާރާތަށް އޭނާ ތައްޔާރުވަމުން ދަނިކޮށެވެ. މި މުބާރާތް އެންމެ ފަހުންވެސް ކާމިޔާބުކޮށްފައިވަނީ ސިނާ އެވެ.