އަހަރުގެ މިހާތަނަށް ބައި ލައްކައަށްވުރެ ގިނަ ފަތުރުވެރިން، އެންމެ ކުރީގައި ރަޝިއާ

މިއަހަރުގެ މިހާތަނަށް ރާއްޖެއަށް ބައި ލައްކައަށްވުރެ ގިނަ ފަތުރުވެރިން ޒިޔާރަތްކޮށްފައިވާކަމަށް ތަފާސްހިސާބުތަކުން ދައްކައިފިއެވެ. ރާއްޖެއަށް މިހާރު އެންމެ ގިނަ ފަތުރުވެރިން އަންނަނީ ރަޝިއާއިންނެވެ.

ތަފާސްހިސާބުތައް ދައްކާގޮތުން އަހަރުގެ ފުރަތަމަ 11 ދުވަހު ރާއްޖެއަށް 69,553 ފަތުރުވެރިން ވަނީ ޒިޔާރަތްކޮށްފައެވެ. މިއީ މިދިޔަ އަހަރުގެ މި މުއްދަތާއި އަޅާބަލާއިރު %10 އިތުރުވުމެކެވެ. މިދިޔަ އަހަރުގެ މި މުއްދަތުގައި ރާއްޖެ އައިސްފައިވަނީ 63،156 ފަތުރުވެރިންނެވެ.

މިއަހަރުގެ ފުރަތަމަ 11 ދުވަހަށް ބަލާއިރު އެންމެ ގިނަ ފަތުރުވެރިން ރާއްޖެ އައިސްފައިވަނީ ޖަނަވަރީ 11 ވަނަ ދުވަހުއެވެ. އެދުވަހު ރާއްޖެއަށް 8،090 ފަތުރުވެރިން ވަނީ އައިސްފައެވެ. އަހަރުގެ މިހާތަނަށް ރާއްޖެއަށް ކޮންމެ ދުވަހަކުވެސް 5،000 އަށްވުރެ ގިނަ ފަތުރުވެރިން އައިސްފައިވެއެވެ.

ރާއްޖެއަށް އެންމެ ގިނައިން ފަތުރުވެރިން އައި 5 ޤައުމު:

* ރަޝިއާ – 11،367 ފަތުރުވެރިން
* އިޓަލީވިލާތް – 8،499 ފަތުރުވެރިން
* އިނގިރޭސިވިލާތް – 5،537 ފަތުރުވެރިން
* ޖަރުމަނުވިލާތް – 4،369 ފަތުރުވެރިން
* އިންޑިއާ – 3،241 ފަތުރުވެރިން

މިދިޔަ އަހަރަކީ ރާއްޖެއަށް ރެކޯޑް އަދަދަކަށް ފަތުރުވެރިން ޒިޔާރަތްކުރި އަހަރެކެވެ. މިދިޔަ އަހަރު ރާއްޖެއަށް 2 މިލިޔަނަށްވުރެ ގިނަފަތުރުވެރިން ވަނީ ރާއްޖެ ޒިޔާރަތްކޮށްފައެވެ. ސަރުކާރުގެ އަމާޒަކީ މި އަހަރު ރާއްޖެއަށް 2.2 މިލިޔަން ފަތުރުވެރިން ގެނައުމެވެ.