ޗެމްޕިއަންސް ޓްރޮފީ ކްރިކެޓް މުބާރާތުގައި ވާދަކުރާ ބަނގްލަދޭޝް ޓީމުން ތަޖުރިބާކާރު އޯލް ރައުންޑަރު ޝާކިބް އަލް ހަސަން ބާކީކޮށް ޓީމު ފައިނަލްކޮށްފި އެވެ.
ބަނގްލަދޭޝް ކްރިކެޓް ބޯޑުން އެކުލަވާލި 15 ކުޅުންތެރިންގެ ޓީމުން ޝާކިބް ބާކީކުރިއިރު 37 އަހަރު ކުޅުންތެރިޔާ އަކީ މިދިޔަ އޮކްޓޫބަރު މަހު އެކުލަވާލި ޓީމުގެ މުހިންމު މެމްބަރެކެވެ. ނަމަވެސް މިދިޔަ މަހު ކުޅުނު މެޗުތަކުގައި ބޯލިން އަށް މަކަރު ހެދުމުގެ ކުށުގައި އޭނާ އަށް ވަނީ އިންގްލޭންޑް އަދި ވޭލްސް ކްރިކެޓް ބޯޑުން ފިޔަވަޅު އަޅައިފަ އެވެ. އެކަމަކު ބަނގަލްދޭޝް ޓީމުގައި ޗެމްޕިއަންސް ޓްރޮފީ މުބާރާތުގައި އޭނާ ލައްވައި ކުޅުވުމާ މިކަމާ އެއްވެސް ގުޅުމެއް ނެތެވެ.
މި ފަހަރުގެ ޓީމުން ޝާކިބްގެ އިތުރުން ބާކީކުރި މަޝްހޫރު ކުޅުންތެރިއަކީ ތަމީމް އިގްބާލެވެ. އޭނާ އަކީ 2017 ވަނަ އަހަރުގެ ޗެމްޕިއަންސް ޓްރޮފީގެ ސެމީ ފައިނަލަށް ބަނގްލަދޭޝް ގެންގޮސްދިނުމުގައި މުހިންމު ދައުރެއް އަދާކުރި ކުޅުންތެރިއެކެވެ. ޓީމުން އޭނާ އުނިކުރީ ގައުމީ ޓީމަށް ކުޅެން ދިން ފުރުސަތު ދޫކޮށްލައި ގައުމީ ޓީމަށް ކުޅުން ހުއްޓާލަން ނިންމުމުންނެވެ.
""އަހަރެން ޝުކުރު އަދާކުރަން ޓީމުގެ ސިލެކްޓަރުންނަށް. އެމީހުންނަށް އަދިވެސް އަހަރެން މޮޅަށް ކުޅެފާނެ ކަމަށް ހީވެ ފުރުސަތު ދިނުމުން. އެކަމަކު އަހަރެން މިވަގުތު ވިސްނަނީ އިންޓަނޭޝަނަލް ކްރިކެޓާ ދުރަށްދާން،" ތަމީމް ބުންޏެވެ.ތަމީމް ބުންޏެވެ
ތަޖުރިބާކާރު ދެ ކުޅުންތެރިން ކަމަށްވާ ވިކެޓް ކީޕަރު މުޝްފިގާރު ރާހިމް އާއި އޯލް ރައުންޑަރު މުހައްމުދިﷲ ވަނީ ޓީމުގައި ހިމެނާފަ އެވެ. ވެސްޓް އިންޑީޒާއެކު ނޮވެމްބަރު ކުޅެން ނުދެވުނު ޝަންޓޯ އަށް ވެސް ޓީމުން ޖާގަދީފައިވެ އެވެ.
މުބާރާތުގައި ބަނގްލަދޭޝް ހިމެނެނީ ގްރޫޕް އޭގަ އެވެ. މި ގްރޫޕުގައި ހިމެނެނީ ނިއުޒީލޭންޑާއި އިންޑިޔާ އާއި މުބާރާތް ބާއްވާ ގައުމު ޕާކިސްތާނެވެ. ފުރަތަމަ މެޗުގައި ފެބްރުއަރީ މަހުގެ 20ގައި ބަނގްލަދޭޝް ނުކުންނާނީ އިންޑިޔާއާ ދެކޮޅަށެވެ.