މެންބަރުންނާއެކު ކުރީގެ ރައީސުންނާއި ފަނޑިޔާރުންގެ އިނާޔަތްތަކަށްވެސް ބަދަލު ގެންނަންޖެހޭ: ޝުޖާޢު

ރައްޔިތުންގެ މަޖިލީހުގެ މެންބަރުކަން ކުރައްވާފައި ތިއްބެވި ބޭފުޅުންނާއެކު ކުރިން ވެރިކަން ކުރައްވާފައި ތިއްބެވި ބޭފުޅުންނާއި ފަނޑިޔާރުންގެ އިނާޔަތްތަކަށްވެސް ބަދަލު އަންނަންޖެހޭ ކަމަށް ގަބޫލުކުރައްވާ ކަމަށް ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އިބްރާހިމް ޝުޖާޢު ވިދާޅުވެއްޖެއެވެ.

ޝުޖާޢު މިހެން ވިދާޅުވި ދިވެހިރާއްޖޭގެ އަޑުން ގެނެސްދޭ، "އަހާށޭ ބުނާނަން" ޕްރޮގްރާމުގައި އެހުންތެރިން ފޮނުވާފައިވާ ސުވާލުތަކަށް ޖަވާބުދެއްވަމުންނެވެ.

ބާރަށު ދާއިރާގެ މެންބަރު އިބްރާހިމް ޝުޖާޢު ވިދާޅުވީ ރައްޔިތުންގެ މަޖިލީހުގެ މެންބަރުންގެ މުސާރަ ކުޑަކުރުމާ ގުޅޭ ގޮތުން މަޝްވަރާކުރެވޭ ދުވަހެއްގައި އަބަދުވެސް މުސާރަ ކުޑަކުރުމަށް ވަކާލާތު ކުރައްވާނެ ކަމަށެވެ. އަދި އޭރުވެސް، މިހާރުވެސް މަޖިލީހުގެ މެންބަރަކު މެންބަރުކަމުން ވަކިވެއްޖެނަމަ އިންޝުއަރެންސް ލިބެން ޖެހޭކަމަށް ގަބޫލުނުކުރައްވާ ކަމަށާއި މެންބަރުންނަށް ދައުރު ހަމަވުމުން ލިބޭ މާލީ އިނާޔަތް ލިބެންޖެހޭ ކަމަށްވެސް ގަބޫލުނުކުރައްވާ ކަމަށެވެ.

ނަމަވެސް އެބަދަލު އަންނަންޖެހޭނީ މެންބަރުންނަށް އެކަނި ނޫން ކަމަށާއި ދައުލަތުގެ ހުރިހާ ބާރަކަށްވެސް އެ ބަދަލު އަންނަންޖެހޭ ކަމަށް ޝުޖާޢު ވިދާޅުވިއެވެ. އެގޮތުން، ދުނިޔޭގެ އެކި ޤައުމުތަކުގައި ވެރިކަން ކުރައްވާފައިވާ ބޭފުޅުންނަށް އިނާޔަތްތައް ލިބިވަޑައިގަންނަވާއިރު އަމަލުކުރައްވާނެ އުސޫލުތަކެއްވެސް ކަނޑައެޅިފައި އޮންނަކަމަށާއި ނަމަވެސް ރާއްޖޭގައި އެފަދަ އުސޫލެއް ނެތި އިނާޔަތްތައް ލިބޭކަން ޝުޖާޢު ފާހަގަކުރެއްވިއެވެ. އެހެންވެ، ހަމައެކަނި ރައްޔިތުންގެ މަޖިލީހުގެ މެންބަރުންނަށް އެފަދަ އިނާޔަތްތައް އުވިގެންދާގޮތަށް އޮތުމަކީ ހަމަޖެހޭ އުސޫލެއް ކަމަށް ގަބޫލުފުޅުނުކުރައްވާ ކަމަށް ޝުޖާޢު ވިދާޅުވިއެވެ.

"ފަނޑިޔާރުން ލިބެންޖެހޭ މާލީ އިނާޔަތްތަކާއި ހުރިހާ އެއްޗެއް އޭނަ ރިޓަޔަރ ވީމަވެސް ލިބޭގޮތަށް އޮވެފައި. ވެރިކަން ކުރާ މީހާއަށް އޭނާ ރިޓަޔަރ ކުރެއްވީމަ ނުވަތަ ވަކިވީމަ ހުރިހާ އެއްޗެއް ލިބިފަ، ރައްޔިތުންގެ މަޖިލީހުގެ މެންބަރުންނަށް މިހުރިހާ އެއްޗެއް އިސްތިސްނާވުން ނުވަތަ ވަކިވެގެންދާގޮތަށް އޮތީމަ ސިސްޓަމް ހަމަނުޖެހެނީ. އެހެންވީމަ ބާރަށު ދާއިރާގެ މެންބަރުގެ ހައިސިއްޔަތުން މިއަދު އަޅުގަނޑު ގަބޫލުކުރަނީ އަދި އޭރުވެސް އަޅުގަނޑު ގަބޫލުކުރީ ކަލެކްޓިވް ސޮލިއުޝަނެކޭ މިއަށް އަންނަންޖެހޭނީ،" ޝުޖާޢު ވިދާޅުވިއެވެ.

ޝުޖާޢު ވިދާޅުވީ ރައީސްކަން ކުރައްވާފައިވާ ބޭފުޅުންނާއި ފަނޑިޔާރުކަން ކުރައްވާފައިވާ ބޭފުޅުންގެ އިނާޔަތްތަކާގުޅޭ ވާހަކަތައް ނުދެކެވޭ ކަމަށާއި ދެކެވެނީ ހަމައެކަނި މެންބަރުންގެ މުސާރައާއި އިނާޔަތްތަކުގެ ވާހަކަތައް ކަމަށެވެ. ނަމަވެސް މުޅި ސިސްޓަމަށް ހެޔޮ ބަދަލެއް އަންނަންޖެހޭ ކަމަށާއި އެ ބަދަލު ނުގެނެސް ދައުލަތުން އުފުލަން ޖެހިފައިވާ ބުރައަށް ހައްލެއް ނުލިބޭނެ ކަމަށްވެސް ޝުޖާޢު ވިދާޅުވިއެވެ.