ޞައްޙަ ނޫން ފޯމުތަކުގެ މައްސަލަ ޕީއެންސީންވެސް ބަލަނީ، އެދެނީ ޝަކުވާއެއް އޮތްނަމަ ހުށަހެޅުމަށް

ޕީޕަލްސް ނެޝަނަލް ކޮންގްރެސް، ޕީއެންސީއަށް މެންބަރުން ވެއްދުމުގައި ޞައްޙަ ނޫން ފޯމުތަކެއް އިލެކްޝަންސް ކޮމިޝަނަށް ހުށަހެޅިފައިވާ މައްސަލަ އެ ޕާޓީންވެސް ބަލަމުންދާކަމަށް ޕީއެންސީން ބުނެފިއެވެ.

މިކަމާގުޅިގެން ޕީއެންސީން ނެރުނު ނޫސްބަޔާނުގައި ބުނީ އެ ޕާޓީއަށް މެންބަރުން އިތުރުކުރުމަށް މުޅި ރާއްޖެއަށް ހުޅުވާލެވިގެން ޕާޓީގެ އެކްޓިވިސްޓުންނާއި، ހެޔޮއެދޭ ފަރާތްތަކުގެ ބައިވެރިވުމާއެކު ހިންގި "މެންބަރޝިޕް ޑްރައިވް" ގައި ޕާޓީއަށް ހުށަހެޅުނު އެތައްހާސް ފޯމެއް، އެ ޕާޓީގެ ފަރާތުން އިލެކްޝަންސް ކޮމިޝަނަށް ހުށަހެޅިފައިވަނިކޮށް، މަދުން ނަމަވެސް ޞައްޙަ ނޫން ފޯމުތަކެއް ހުށަހެޅިފައިވާކަން އެ ޕާޓީއަށް ފާހަގަކުރެވިފައިވާކަމަށެވެ.

ޕީއެންސީން ބުނީ "މެންބަރޝިޕް ޑްރައިވް" އަކީ ރާއްޖޭގައި މިހާތަނަށް އެއްފަހަރާ އެންމެ ގިނަ ޢަދަދަކަށް ސިޔާސީ ޕާޓީއަކަށް މެންބަރުން ވަނުމަށް ފޯމު ހުށަހެޅުނު އެއް ހަރަކާތްކަމަށެވެ. އަދި ޕާޓީގެ އިލެކްޝަންސް ޕޯޓަލް މެދުވެރިކޮށް އެ ފޯމުތައް އަޕްލޯޑުކުރަމުންދިޔަ ނަމަވެސް، ޕާޓީއަށް ލިބޭ ފޯމުތަކުގެ ޞައްޙަކަން ކަށަވަރުކުރުމުގެ ޤާބިލުކަން އެ ޕާޓީގައި ނެތުމުން، ފޯމެއްގެ ޞައްޙަކަމާމެދު ސުވާލު އުފެދޭ ހިސާބަކީ އިލެކްޝަންސް ކޮމިޝަނަށް ފޯމު ހުށަހެޅުމުގެ މަރުޙަލާކަމުގައިކަމަށެވެ. ގިނަ ޕާޓީ އެކުލެވޭ ވާދަވެރި ސިޔާސީ މާޙައުލެއް ރާއްޖޭގައި ވުޖޫދުކުރެވުނު ހިސާބުން ފެށިގެން މިއަދާ ހަމަޔަށްވެސް ރާއްޖޭގައި ވަޞީލަތްތައް ހުރިގޮތުން މިކަމަކީ އެ ޕާޓީއަށް އެކަނިއޮތް ގޮންޖެހުމެއް ނޫންކަމަށްވެސް ޕީއެންސީން ބުނެއެވެ.

މިހާތަނަށް އެކި ފަރާތްތަކުން ޞައްޙަ ނޫން ފޯމުތަކެއް ޕީއެންސީގެ ނަމުގައި އިލެކްޝަންސް ކޮމިޝަނަށް ހުށަހަޅާފައިވާކަން ބަޔާންކޮށް އެ ކޮމިޝަނާއި، ފުލުހުންނަށް ޝަކުވާތަކެއް ހުށަހެޅިފައިވާތީ، އެ ދެ މުއައްސަސާއިން އެ މައްސަލަތައް ބަލަމުންދާކަން އަންގާފައިވާކަމަށް ޕީއެންސީން ވަނީ ބުނެފައެވެ. އަދި އެ ޕާޓީގެ ފަރާތުންވެސް މިފަދަ ފޯމުތައް ހުަށަހެޅިފައިވާގޮތް ބަލަމުންދާކަމަށާއި، ކޮންގްރެސް ޕާޓީގެ ފަރތާތުން އެ ދެ މުއައްސަސާއަށް މިކަން ބެލުމުގައި ފުރިހަމައަށް އެއްބާރުލުން ދެމުންގެންދާނެކަމަށް ޕީއެންސީން ބުނެއެވެ.

ޕީއެންސީން ބުނީ ޞައްޙަ ނޫން ފޯމުތަކެއްގެ މުޤާބިލުގައި، އެ ޕާޓީއަށް މެންބަރުން އިތުރުކޮށް، ރައްޔިތުންގެ ޙައްޤުތަކެއް ގެއްލޭފަދަ ގޮތަކަށް އެއްވެސް ކަމެއް ކުރުމަކީ އެޕާޓީގެ ރައީސް އަދި ލީޑަރޝިޕުން އެއްވެސް ވަރަކަށް ބަލައިގަންނަ އަދި ހިތްވަރުދޭނެ ކަމެއްނޫންކަމަށެވެ. އެހެންކަމުން ޞައްޙަ ނޫން ފޯމެއް މެދުވެރިކޮށް ކޮންގްރެސް ޕާޓީއަށް ވެއްދުމުގެ އެއްވެސް މައްސަލައެއް ކުރިމަތިވެފައިވާނަމަ ޕާޓީގެ ރަސްމީ އީ-މެއިލް [email protected] އަށް މެއިލް ކުރުމުން، އެފަދަ މައްސަލަތަކަށް އަވަސް ޙައްލެއް ގެނެސްދިނުމަށް ކުރެވެންހުރި ހުރިހާ ކަމެއް ކޮށްދޭނެކަމުގެ ޔަޤީންކަން ޕީއެންސީން ވަނީ ދީފައެވެ.