ޗެމްޕިއަންސް ޓްރޮފީ ކްރިކެޓް މުބާރާތުގައި ޕާކިސްތާނުގެ އޯޕަނިން ބެޓްސްމަނުންނަކީ ފަހްރުއްޒަމާނާއި ސައީދު އަޔޫބް ކަމުގައި ހެދުމަށް އެ ގައުމުގެ ސަޕޯޓަރުން ގޮވާލައިފިއެވެ.
އަމިއްލަ ގައުމުގައި ކުޅޭ މުބާރާތުގައި ޕާކިސްތާނުގެ ސަޕޯޓަރުން ވަނީ ތަށި ހޯދުމަށްޓަކައި މެޗު ފަށަން އެންމެ ރަނގަޅު ދެ ކުޅުންތެރިންނަކީ އެ ދެ ކުޅުންތެރިން ކަމަށް ބުނެފައެވެ. އެއީ މިދިޔަ އަހަރުން ފެށިގެން ޕާކިސްތާނު ކުޅުނު ގިނަ މެޗުތަކުގައި ޒުވާން މި ދެ ކުޅުންތެރިން ގުޅިގެން ރަނގަޅު ޕާޓްނާޝިޕެއް ދައްކައިދީފައިވާތީ އެވެ. މީގެ އިތުރުން ފަހްރުއްޒަމާނަކީ އެންމެ ފަހުގެ މުބާރާތުގެ ފައިނަލް މެޗުގެ މޮޅު ކުޅުންތެރިޔާއެވެ.
ޕާކިސްތާނުން މިހާރު ވަނީ އިންޓަނޭޝަނަލް ކްރިކެޓް ކައުންސިލް (އައިސީސީ) އަށް 20 ކުޅުންތެރިންގެ ވަގުތީ ސްކޮޑެއް ދީފައެވެ. އެ ޓީމުގައި ހިމެނޭ މަޝްހޫރު ކުޅުންތެރިންނަކީ ކެޕްޓަން މުހައްމަދު ރިޒްވާން އާއި، ކުރީގެ ކެޕްޓަން އަދި އިތުބާރު ބެޓްސްމަން ބާބަރް އަޒަމް އާއި، ބާރު އުކުންތެރިން ކަމަށްވާ ޝާހީން ޝާހް އަފްރީދީ އަދި ހާރިސް ރައޫފެވެ.
މީގެ އިތުރުން ހުނަރުވެރި އަދި ކުރިއަރަމުން އަންނަ ކުޅުންތެރިން ކަމަށްވާ ސައިމް އަޔޫބް އާއި، އިރްފާން ޚާން ނައިޒީ އާއި، ފްހްރުއްޒަމާނަކީވެސް ސްކޮޑުގެ މުހިންމު ކުޅުންތެރިންނެވެ. އަދި ސަލްމާން އަލީ އާއި، އަބްރާރު އަހުމަދަކީވެސް ޓީމުން ޖާގަ ހޯދާފައިވާ ކުޅުންތެރިންނެވެ.
ކެޕްޓަން މުހައްމަދު ރިޒްވާން ބުނީ ނިމިދިޔަ އަހަރަކީ ޕާކިސްތާނުގެ ކްރިކެޓްގައި ގިނަ ނާކާމިޔާބީތަކެއް ކުރިމަތިވި އަހަރެއް ނަމަވެސް މިހާރުގެ ޓީމަކީ ޒުވާން ކުޅުންތެރިންތަކެއް ތިބި ވަރުގަދަ ޓީމެއް ކަމަށެވެ. މިހެންވެ ތައްޓާމެދު ސަޕޯޓަރުން ކުރާ އުއްމީދު ހަގީގަތަކަށް ހަދައިދެވޭނެ ކަމުގެ ޔަގީންކަން ބޮޑު ކަމަށެވެ.
ޗެމްޕިއަންސް ޓްރޮފީ މުބާރާތް ޕާކިސްތާނުގައި ފަށާނީ އަންނަ ފެބްރުއަރީ މަހުގެ މެދުތެރޭގަ އެވެ. މުބާރާތުގައި ވާދަކުރަނީ އަށް ގައުމެވެ. ޕާކިސްތާން ހިމެނެނީ އިންޑިއާ އާއި ނިއުޒީލަންޑް އަދި ބަނގްލަދޭޝްއާއެކު ގްރޫޕް އޭގައެވެ. މީގެ ތެރެއިން އިންޑިއާއިން ޕާކިސްތާނަށް ދިޔުމަށް ދެކޮޅު ހަދާތީވެ، އެ މެޗު ކުޅޭނީ ދުބާއީގައެވެ.