ސައުދީ އަރަބިއްޔާގެ އަލް ނަސްރަށް ކުޅެމުން އަންނަ ޕޯޗުގަލްގެ ތަރި ކްރިސްޓިއާނޯ ރޮނާލްޑޯ، އެ ކުލަބުގައި އިތުރަށް މަޑުކުރުމަށް ނިންމާފައިވާ ކަމަށް މީޑިއާ ރިޕޯޓުތައް ބުނެފިއެވެ.
2023 ވަނަ އަހަރު އަލް ނަސްރާ ގުޅުނު ރޮނާލްޑޯ، އެ ކްލަބާއެކު ހަދާފައިވާ އެއްބަސްވުމުގެ މުއްދަތު މި ސީޒަނުގެ ނިޔަލަށް ހަމަވާނެއެވެ. އަދި ރޮނާލްޑޯ އަލް ނަސްރާ ގުޅުމާއެކު ސައުދީ އަރަބިއްޔާގެ ފުޓްބޯޅަ މުޅި ދުނިޔެއަށް މަޝްހޫރުވެ، ދުނިޔޭގެ ނަން މަޝްހޫރު އެތައް ކުޅުންތެރިންނެއް ވަނީ ސައުދީ ލީގުގައި ކުޅެ ކުލަބުތަކަށް ކުޅެން ފަށާފައެވެ.
އަލް ނަސްރާއެކު ރޮނާލްޑޯ ހަދާފައިވާ އެއްބަސްވުމުގެ މުއްދަތު އިތުރު ކުރުމަށް ހަމަޖެހިފައިވާއިރު, އޭނާގެ މުސާރަ ވެގެންދާނީ ދުނިޔޭގެ ފުޓްބޯޅައިގެ ރިކޯޑު އަދަދެއް ކަމަށް ރިޕޯޓުތައް ވަނީ ބުނެފައެވެ. އެ ގޮތުން މުސާރައިގެ ގޮތުގައި ސީޒަނަކަށް 210 މިލިއަން އެމެރިކާ ޑޮލަރަށްވުރެ ބޮޑު އަދަދެއް އޭނާއަށް ލިބިގެންދާނެ އެވެ. މިއީ މަހަކަށް ބަލާއިރު 17.5 މިލިއަން އެމެރިކާ ޑޮލަރުގެ މުސާރަ އެކެވެ. އަދި ދުވާލަކަށް ފަސް ލައްކަ އަށްޑިހަ ތިން ހާހަށްވުރެ ބޮޑު މުސާރައެކެވެ.
ރޮނާލްޑޯ ވަނީ މީގެ ކުރިން ޕޯޗުގަލްގެ ލިޒްބަންގެ އިތުރުން އިނގިރޭސިވިލާތުގެ މެންޗެސްޓަރ ޔުނައިޓެޑާއި، ސްޕެއިންގެ ރެއާލް މެޑްރިޑްގެ އިތުރުން އިޓަލީގެ ޔުވެންޓަސްއަށް ކުޅެފައެވެ. އަދި ފަސް ފަހަރު މަތިން ދުނިޔޭގެ އެންމެ މޮޅު ކުޅުންތެރިޔާގެ މަގާމު އޭނާ ވަނީ ހޯދާފައެވެ.