ދެކުނު އެފްރިކާގެ ބާރު އުކުންތެރިޔާ އެންރިޗް ނޯޗާގެ އުނަގަނޑަށް ތަދުވެ، ޗެމްޕިއަންސް ޓްރޮފީގައި ނުކުޅެވޭނެކަން ކަށަވަރުވެއްޖެއެވެ.
ޓީމުގައި ހިމެނިތާ 24 ގަޑިއިރު ފަހުން އޭނާގެ ނަން ލިސްޓުން މިހާރު ވަނީ އުނިކޮށްފައެވެ. ބަދަލުގައި ނަގާނީ ކޮން ކުޅުންތެރިއެއްކަން ކަށަވަރުވެފައެއް ނުވެއެވެ. ބޮޑަށް ބެލެވެނީ އެ މަގާމަށް ދެން ނަގާނީ ޖެރަލްޑް ކަމަށެވެ. މީގެ އިތުރުން 18 އަހަރުގެ ބާރު އުކުންތެރިޔާ ކްވެނާ މަފާކާ އަކީވެސް ޓީމަށް ނަގާފާނެ ކުޅުންތެރިއެކެވެ.
ނޯޗާ އަކީ މޮޅު ކުޅުންތެރިއެއް ނަމަވެސް އަނިޔާއިން އަރައިނުގަނެވި އޭނާ އުޅޭތާ އަހަރުތަކެއް ވެއްޖެއެވެ. އެގޮތުން 2023 ގެ މާޗު މަހުގެ ފަހުން އޭނާ ޓެސްޓް މެޗެއްވެސް ކުޅެފައެއް ނުވެއެވެ. ނަމަވެސް މިދިޔަ އަހަރުގެ ޓީ20 މުބާރާތުގައި އިންޑިއާ އަތުން ފައިނަލްގައި ބަލިވި ދެކުނު އެފްރިކާ ޓީމުގައި އޭނާ ވަނީ މޮޅު ކުޅުމެއް ދައްކައިފައެވެ.
ދެކުނު އެފްރިކާ ޓީމުން ބުނީ އަންނަ ފެބްރުއަރީ މަހު ޕާކިސްތާނުގައި ފަށާ ޗެމްޕިއަންސް ޓްރޮފީ މުބާރާތުގައި ނޯޗާ ނުހިމަނަން ނިންމީ މުބާރާތުގެ ފުރަތަމަ މެޗު ކުޅެންވާއިރަށް އޭނާ ފިޓްވާނެ ކަމަށް ނުބެލެވޭތީ ކަމަށެވެ. ފެބްރުއަރީ 21 ވަނަ ދުވަހު ދެކުނު އެފްރިކާ އެންމެ ފުރަތަމަ ނުކުންނާނީ އަފްޣާނިސްތާނާ ދެކޮޅަށެވެ. މި ގްރޫޕުގައި ދެން ހިމެނެނީ އިންގްލަންޑާއި އޮސްޓްރޭލިއާއެވެ.