އެހެން ޓީމަކަށް ދާން ބޭނުންވެފައި ހުރި ޑިފެންޑަރު އަދި ވައިސް ކެޕްޓަން ރޮނާލްޑް އަރައުހޯ، އެންމެ ފަހުން ބާސެލޯނާގައި މަޑުކުރަން އެއްބަސްވެއްޖެއެވެ.
ސްޕެއިންގެ މީޑިއާތަކުން ބުނާ ގޮތުގައި އިޓަލީގެ ޔުވެންޓަސްގެ ޖާޒީލުމާ ނުހަނު ގާތަށް ދިޔުމަށްފަހު އަރައުހޯ އެ ޚިޔާލު ބަދަލުކުރީ ބާސެލޯނާއިން ތިން ކަމަކަށް ވައުދުވުމުންނެވެ.
ސްޕެނިޝް ސުޕަ ކަޕުގެ ތަށި ހޯދި މެޗުގެ ފަހު ހާފުގައި ކުޅެން ނުކުމެ ކެޕްޓަން ބޭންޑް އަޅައިގެން މޮޅަށް ކުޅުނު އުގުރުއޭގެ ޑިފެންޑަރު ޓީމުގައި ބަހައްޓަން ބޭނުންކަމަށް އެންމެ ފުރަތަމަ އިއުލާނުކުރީ ބާސެލޯނާގެ ރައީސް ޖޮއާން ލަޕޯޓާއެވެ. އެއީ ބާސެލޯނާއިން އެއްބަސްވުން އައުކުރަން ހުށަހެޅި ދެ ހުށަހެޅުމަށް އޭނާ ނޫނެކޭ ބުނެފައިވަނިކޮށެވެ. އަދި އިޓަލީގެ ޔުވެންޓަސްއިން އޭނާ ގަތުމަށް ކުޅުންތެރިޔާގެ އާބަސް ހޯދައި، 50 މިލިޔަން ޔޫރޯ ހުށަހަޅާފައިވަނިކޮށެވެ. އެއްބަސްވުން ހަމަވަމުންދާތީވެ އަރައުހޯ ބަހައްޓަން ބާސެލޯނާއަށް މާ ބޮޑު ބާރެއް ނެތެވެ.
ނަމަވެސް އޭނާ ޓީމުގައި މިވަގުތަށް މަޑުކުރަން ނިންމީ ސްޕޯޓިން ޑައިރެކްޓަރު ޑެކޯއާއެކު ދެކުނު ވާހަކަތަކަށް ފަހުއެވެ. ދެ ފަރާތުން އެއްބަސްވި ފުރަތަމަ ކަމަކީ މި ސީޒަނުގައި ބާސެލޯނާއިން ކާމިޔާބީތަކެއް ހޯދުމަށެވެ. ނުވަތަ ކާމިޔާބީއާ ހަމައަށްދާން ޓީމު ވަރުގަދަ ކުރުމަށެވެ. ދެވަނަ ކަމަކީ އަލަށް ހުށަހަޅާ އެއްބަސްވުމުގައި އަރައުހޯއަށް ބޮޑު މުސާރައެއް ދޭން ނިންމުމެވެ. އަދި ތިންވަނަ ކަމަކީ އޭނާގެ ރިލީޒް ފީ އެއް ބިލިޔަން ޔޫރޯއަށްވުރެ މާ ބޮޑުތަނުންވެސް ކުޑަކުރުމެވެ. އެއީ ބާސެލޯނާގެ ވައުދުތައް ނުފުއްދޭނަމަ އޭނާ ގަތުމަށް އެހެން ކުލަބުތަކަށް ފަސޭހަކޮށްދިނުމަށެވެ.
އަރައުހޯ ޓީމުން ދާން އުޅުނުއިރު އޭނާގެ ބޭނުން ބާސެލޯނާއަށް އޮތީ ވަރަށް ބޮޑުވެފައެވެ. އެއީ ޑިފެންޑަރު އިނީގޯ މާޓިނޭޒަށް އަނިޔާވެ މި ސީޒަނުގައި ނުކުޅެވޭތީއެވެ. އަދި ކްރިސްޓިއަންސަންވެސް މުޅިން ފިޓްނުވާތީ އެވެ.