އެންޓި-ކޮރަޕްޝަން ކޮމިޝަނަށް 2 މެންބަރުން އައްޔަން ކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރައްޔިތުންގެ މަޖިލީހަށް ނަންތައް ފޮނުއްވައިފިއެވެ.
އެސީސީގެ މެންބަރުކަމުގެ މަޤާމަށް ކުރިމަތިލުމަށް ހުޅުވާލުމުން އެކަމަށް އިޖާބަދެއްވި ބޭފުޅުންގެ ތެރެއިން އެކޮމިޝަނުގެ މެންބަރުކަމަށް ރައީސުލްޖުމްހޫރިއްޔާ އައްޔަންކުރައްވަން ފެނިވަޑައިގަނަވާކަމަށް ފޮނުވާފައިވަނީ، މއ. ގޯލްޑަން މޫން އަހުމަދު ނާޝިދު އާއި ރ. ހުޅުދުއްފާރު، ރޯޒްވިލާ، އަލްއުސްތާޛާ އާސިޔާ އަޒީމާގެ ނަމެވެ.
ދައުރުން ބޭރުން މިއަދު ބޭއްވި މަޖިލީހުގެ ޖަލްސާގައި އޭސީސީއަށް މެންބަރުން އައްޔަންކުރުމުގެ މައްސަލަ ފޮނުވާފައިވަނީ މިނަވަން މުއައްސަސާތަކުގެ ކޮމިޓީއަށެވެ.
އޭސީސީގެ މެންބަރުކަމަށް އައްޔަންކުރެއްވުމަށް މަޖިލީހަށް ފޮނުވި އަހުމަދު ނާޝިދު ޕޮލިސް ބޯޑުގައި އިންނަވާ މެންބަރެކެވެ. އަދި އާސިޔާ އަކީ ވިޔަފާރިވެރިންގެ ޖަމިއްޔާގެ ނައިބު ރައީސްކަން ކުރައްވައިފައިވާ ބޭފުޅެކެވެ.
އެންޓި-ކޮރަޕްޝަން ކޮމިޝަނުގެ 2 މެންބަރެއްގެ މަޤާމު ހުސްވެފައިވަނީ އެ ކޮމިޝަންގެ ނައިބު ރައީސް އަބްދުލްސަލާމާއި މެމްބަރު ތޯހާ މުހައްމަދު މަޤާމުން އިސްތިއުފާ ދެއްވުމާއި ގުޅިގެންނެވެ. ދެ މެންބަރުން އިސްތިއުފާ ދެއްވީ ނުފޫޒު ފޯރުވުމާ ކޮރަޕްޝަންގެ ބޮޑެތި ތުހުމަތުތަކެއް ކުރެވި، އެ ދެ މެންބަރުން ވަކި ކުރަން ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން ނިންމާފައިވަނިކޮށެވެ.