ފެހުރިހި ބަލަން ވަންނަ އުޅަނދުތަކުގެ ބުރަފަތީގައި ގާޑް އަޅުވަން ޖެހޭގޮތް ހަދަނީ

ފެހުރިހި ހިމާޔަތްކުރުމާއި، އޭގެ ޤުދުރަތީ މާހައުލު ދެމެހެއްޓެނިވި ގޮތެއްގައި ރައްކާތެރިކުރުމަށްޓަކައި އެތަކެތި ބަލަން ދާ އުޅަނދުތަކުގެ ބުރަފަތީގައި ގާޑް އަޅުވަންޖެހޭ ގޮތް ހެދުމަށް ނިންމާފައިވާކަމަށް މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވަޒީރު ޠާރިޤު އިބްރާހީމް ވިދާޅުވެއްޖެއެވެ.

ވަޒީރު މިފަދައިން ވިދާޅުވީ ހިމާޔަތްކޮށްފައިވާ ސަރަޙައްދުތައް ބެލެހެއްޓުމަށް ކުރާ މަސައްކަތްތައް ޕީއެސްއެމް ނިއުސްގެ ރާއްޖެމިއަދު ޕްރޮގްރާމުގައި ހިއްސާކުރައްވަމުންނެވެ.

މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވަޒީރު ޠާރިޤު އިބްރާހީމް ވިދާޅުވީ، ރާއްޖޭގެ 93 ސަރަހައްދެއް ހިމާޔަތްކޮށްފައި އޮތްނަމަވެސް އޭގެ ތެރެއިން ބެލެހެއްޓެނީ 5 ތަނެއްކަމަށެވެ. މީގެ ތެރެއިން އދ. އަތޮޅުގައި ހިމާޔަތްކޮށްފައިވާ ސައުތު އަރި މެރިން ޕާކް (ސަމްޕާ) ސަރަޙައްދަކީ ކޮންމެ ދުވަހެއްގައިވެސް ގިނަ އަދަދެއްގެ ފަތުރުވެރިން ޒިޔާރަތް ކުރާ ސަރަޙައްދެއްކަން ވަޒީރު ފާހަގަކުރެއްވިއެވެ. އަދި ވޭތުވެދިޔަ އަހަރުތަކުގައި އެ ސަރަޙައްދު ބެލެހެއްޓުމަށް މަސައްކަތްތަކެއް ކުރިނަމަވެސް އެދެވޭ ގޮތެއްގައި ބަލެހެއްޓިފައި ނުވާކަމަށް ވަޒީރު ވިދާޅުވިއެވެ.

މިއީ ރާއްޖޭގައި ހިމާޔަތްކޮށްފައިވާ ސަރަޙައްދުތަކުގެ ތެރެއިން އެންމެ ބޮޑު ސަރަޙައްދުކަން ފާހަގަކުރައްވާ ވަޒީރު ވަނީ އެ ސަރަޙައްދު ރަނގަޅަށް ނުބެލެހެއްޓުމުގެ ސަބަބުން ގިނަ ހާދިސާތަކެއް ހިނގާފައިވާކަން ފާހަގަކުރައްވާފައެވެ.

"އެއްކަމަކީ ވޭލް ޝާކެއްގެ ފަހަތުން ބައެއް ފަހަރު 100 ގެސްޓުންވެސް އެބަ ފަތާ. ނޯވެ ވަކި އުޞޫލެއް. އެތާ އެތެރެއަށް ލޯންޗް ފަހަރުވެސް ވަންނަނީ." މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވަޒީރު ޠާރިޤު އިބްރާހީމް ވިދާޅުވިއެވެ.

ވަޒީރު ވިދާޅުވީ، ސަމްޕާ ސަރަހައްދުގެ އިތުރުން، ފެހުރިހި އުޅޭ އެހެން ސަރަޙައްދުތަކަށްވެސް އެތަކެތި ބަލަން ވަންނަ އުޅަނދުތަކުގެ ބުރަފަތީގައި ގާޑް އަޅުވައިގެން ވަންނަ ގޮތަށް ހެދުމަށް ނިންމާފައިވާކަމަށެވެ.

ކުރިއަށް އޮތް 3 މަސްދުވަހުގެ ތެރޭގައި އެކަމަށް އަމަލުކުރަން ފަށާނެކަމަށާއި، ފެހުރިހި ބެލުމަށް ފަތުރުވެރިން ގޮވައިގެން ގޮސް އުޅޭ ގޮޮތް ބެލުމަށްޓަކައި މޮނިޓަރ ކުރުމަށް ޚާއްސަ ލޯންޗެއްވެސް ހަމަޖައްސާފައިވާކަމަށް ވަޒީރު ވިދާޅުވިއެވެ.

ވަޒީރު ވިދާޅުވީ، ފެހުރިހި ބަލަން ފަތުރުވެރިން ގޮވައިގެން ދާ އުޅަނދުތައް ރަޖިސްޓްރީވާންޖެހޭ ގޮތަށް ނިންމާ 3 މަސްދުވަހުގެ ތެރޭގައި ރަޖިސްޓްރީން ވާންޖެހޭނެކަމަށެވެ. މިހުރިހާ ކަމެއް ހިމަނާ ރައްކާތެރިކަމާއެކު ފެހުރިހަ ބެލޭނެ ނިޒާމެއް ޤާއިމްކުުމަށްޓަކައި ޚާއްސަ ޤަވައިދު ވަރަށް އަވަހަށް ގެޒެޓްކުރާނެކަން ވަޒީރު ފާހަގަކުރެއްވިއެވެ.

ރާއްޖޭގައި ފެހުރިހި ހިމާޔަތްކުރުމާއި، އޭގެ ޤުދުރަތީ މާހައުލު ދެމެހެއްޓެނިވި ގޮތެއްގައި ރައްކާތެރިކުރުމަށްޓަކައި، އައު ޤާނޫނީ އުސޫލެއް މިދިޔަ އަހަރުގެ ތެރޭގައި ވަނީ އެކުލަވާލާފައެވެ. މި އުޞޫލުގައި ފެހުރިހި ހިމާޔަތްކުރުމުގައި ސަމާލުވާންވީ ކަންކަމާއި އަނިޔާވެފައިވާ ނުވަތަ ބަލިވެފައިވާ ފެހުރިއްސާ މެދުގައި އަމަލުކުރާނެ ގޮތް ހިމެނާފައިވެއެވެ.

މި އުޞޫލުގައިވާގޮތުން ފެހުރިހީގެ ވަށައިގެންވާ 250 މީޓަރުގެ ސަރަޙައްދަކީ "ކޮންޓެކްޓް ޒޯން" ގެ ގޮތުގައި ކަނޑައަޅާފައިވާ ސަރަޙައްދެކެވެ. މި ޒޯނުގައި އެއްފަހަރާ ޙަރަކާތްތެރިވެވޭނީ ގިނަވެގެން 3 އުޅަނދަށެވެ.

ކޮންޓެކްޓް ޒޯނުގައި އުޅަނދުފަހަރުގެ ދުވެލި ގަޑިއަކު 5 ނޮޓަށްވުރެ އިތުރުވެގެން ނުވާނެއެވެ. އަދި ފެހުރިހީގެ 50 މީޓަރު ސަރަޙައްދުގެ ތެރޭގައި އުޅަނދުފަހަރުގެ ދުވެލި ބަހައްޓަންވާނީ ގަޑިއަކު 2 ނޮޓުގައެވެ. ނަމަވެސް، ކުއްލި ނުރައްކަލުގެ ޙާލަތެއްގައި ކޮންޓެކްޓް ޒޯނުން ނުކުތުމަށް ގަޑިއަކު 5 ނޮޓަށްވުރެ ބާރަށް ދުއްވަން ޖެހިއްޖެނަމަ، ވީއެންމެ އަވަހަކަށް އެ ޒޯނުން ނުކުތުމުގެ ހުއްދަ ދެވިފައިވެއެވެ.