މެންޗެސްޓާ ސިޓީއަށް ކުޅެމުން އަންނަ ނޯވޭގެ ފޯވާޑް އާލިން ހާލަންޑް، އެ ކުލަބާއެކު ހަދާފައިވާ އެއްބަސްވުން 2034 ވަނަ އަހަރުގެ ނިޔަލަށް އައުކޮށްފިއެވެ.
ހާލަންޑް ބޮރޫޝިޔާ ޑޯޓްމުންޑް ދޫކޮށް ސިޓީ އަށް ބަދަލުވީ 2022 ވަނަ އަހަރު އެވެ. ޔޫރަޕުގައި މިވަގުތު ހުރި އެންމެ ޑިމާންޑް ބޮޑު އެއް ފޯވަޑް ވަނީ މިހާތަނަށް ކުޅުނު 126 މެޗުގައި 11 ގޯލު ޖަހައިދީފަ އެވެ.
އައު ކޮންޓްރެކްޓްގެ ދަށުން އަބޫދާބީގެ މަހުޖަނުން ހިންގާ ސިޓީން ހާލަންޑަށް ހަފުތާއަކު 550 ޕައުންޑަށްވުރެ ބޮޑު މުސާރައެއް ލިބޭނެ އެވެ. އޭނާ ލައްވައި ކޮންޓްރެކްޓް އާމިކުރީ އެންމެ ފުރަތަމަ ސޮއިކުރި ކޮންޓްރެކްޓް 2027 ވަނަ އަހަރަށް ކޮންޓްރެކްޓް ހަމަވާންދާތީ އެވެ.
އޭނާ މި ފަހަރު ސޮއިކުރި 10 އަހަރުގެ ކޮންޓްރެކްޓަކީ އިނގިރޭސި ޕްރެމިއާ ލީގުގެ ތާރީހުގައި ވެސް ކުޅުންތެރިއަކާއެކު ކުލަބަކުން ސޮއިކުރި އެންމެ ދިގު މުއްދަތުގެ ކޮންޓްރެކްޓެވެ.
"މި ކޮންޓްރެކްޓްގައި ސޮއިކުރެވެމުން އަހަރެން ވަރަށް އުފާވެއްޖެ. އަދި މި ކުލަބާއެކު ގިނަ ދުވަސްތަކެއްގައި ހުންނަ ހިތް މިހާރު މާބޮޑަށްވެއްޖެ. މެންޗެސްޓާ ސިޓީ އަކީ ވަރަށް ހާއްސަ ކުލަބެއް. ވަށައިގެން ތިބީ ވަރަށް ހާއްސަ ވަރަށް ތަފާތު މީހުން. އޭގެ ތެރޭގައި ސަޕޯޓަރުން ވެސް ހިމެނޭ ކުލަބުގައި އޮތް މާހައުލު ވެސް ވަރަށް ރަނގަޅު،" ހާލަންޑް ބުންޏެވެ.
އޭނާ ބުނީ ސިޓީގެ ކޯޗު ޕެޕް ގާޑިއޯލާ އާއި ކޯޗިން ސްޓާފުންނާއި ކުޅުންތެރިންނަށް އޭނާ ކުރިއަރައިދާން ފުރުސަތުދޭތީވެ ވަރަށް ބޮޑަށް ޝުކުރުއަދާކުރާ ކަމަށެވެ.
"އަހަރެންނަށް މި ކުލަބު ސިފަ ކުރެވެނީ އަމިއްލަ ގެ ހެން. އެހެންވީމާ އަހަރެން މިތަނުގައި ވަރަށް ހުންނަހިތްވޭ. އަހަރެން ބޭނުންވަނީ އަހަރެންގެ އަމިއްލަ ލެގަސީއެއް ބިލްޑްކުރަން މިތަނުގައި،" ހާލަންޑް ބުންޏެވެ.
ސިޓީގެ ޑައިރެކްޓަރ އޮފް ފުޓްބޯލް ޓެކްސީކީ ބެގިރިސްޓަން ބުނީ ހާލަންޑް މިހާދިގު މުއްދަތަކަށް ސޮއިކުރީ ކުލަބަށް އޭނާ އަށް އޮތް އިތުބާރަކަށާއި އޭނާ އަށް ކުލަބުން ކަންތައްތައް ކޮށްދޭ ގޮތް ރަނގަޅުވުމުން ކަމަށެވެ.
ހާލަންޑް ވަނީ މިހާތަނަށް ސިޓީގައި ޕްރެމިއާ ލީގު ދެ ފަހަރު އަދި ޗެމްޕިއަންސް ލީގަކާއި ކުލަބު ވޯލްޑްކަޕަކާއި ޔޫރަޕިއަން ސުޕަ ކަޕެއް ވެސް ކާމިޔާބުކޮށްފަ އެވެ