ކްރިކެޓް ސީޒަން ފެށުމަށް މި ހަފުތާ ބަންދުގައި ކުޅުނު ސީޒަން ހުޅުވި މެޗު ހަ ވިކެޓުން ޓީމު އޭ ކާމިޔާބުކޮށްފިއެވެ.
ކްރިކެޓް ބޯޑް އޮފް މޯލްޑިވްސް (ސީބީއެމް) ގެ ކުރީގެ ނައިބު ރައީސް މަރްހޫމް މާދިހު އިސްމާޢީލަށް ޚާއްސަކޮށް ކުޅުނު މި މެޗު ކާމިޔާބުކުރި ޓީމު އޭގެ ކެޕްޓަން ބޭންޑު އަޅައިގެން ކުޅުނީ ގައުމީ ކެޕްޓަން ޔޫސުފް އަޒްޔާން ފަރުހަތެވެ.
މި އަހަރުގެ ކްރިކެޓް ސީޒަން ހުޅުވާ މެޗަށް "މާދިހު މެމޯރިއަލް މެޗު" ގެ ނަން ދެވިފައިވާއިރު، މި މެޗުގައި ވާދަކުރީ ރާއްޖޭގެ ސީނިއަރ ކްރިކެޓް ޓީމުގެ ކުޅުންތެރިންނާއި، ޖޫނިއަރ ކުޅުންތެރިންގެ އިތުރުން ބައެއް ބިދޭސީ ކުޅުންތެރިން ހިމެނޭހެން އެކުލަވާލާފައިވާ ދެ ޓީމެކެވެ. އެގޮތުން ކެޕްޓަން އަޒިޔާން ފަރުހަތުގެ ޓީމު ކޯޗަކީ ގައުމީ ކޯޗު އިސްމާޢީލް ނިހާދެވެ. އަދި އިބްރާހިމް ނަޝާތުގެ ކެޕްޓަނުކަމުގައި ނުކުންނަ ޓީމުގެ ކޯޗަކީ އިމާދު އިސްމާޢީލެވެ.
މި މެޗު ޝަރަފްވެރިކޮށްދެއްވީ މާދިހު އިސްމާއީލްގެ އާއިލީ މެމްބަރެއް ކަމަށްވާ ޝާހު އިސްމާއީލެވެ.
ސީބީއެމް އިން ހާމަކުރި ގޮތުގައި މި އަހަރުގެ ސީޒަން ހުޅުވާ މެޗު މާދިހުއަށް ޚާއްސަ ކުރުމަށް ނިންމީ ދިވެހި ކުޅިވަރަށް މާދިހު ކޮއްދެއްވާފައިވާ ޚިދުމަތްތައް އަދި ވަކި ޚާއްސަކޮށް ކްރިކެޓަށް ކޮށްދެއްވާފައިވާ ޚިދުމަތްތައް ފާހަގަކުރުމުގެ ގޮތުންނެވެ.
ރާއްޖޭގެ ކުޅިވަރުގެ ދާއިރާއަށް ގިނަ ޚިދުމަތްތަކެއް ކުރައްވާފައިވާ މާދިހު ކުއްލި ގޮތަކަށް ނިޔާވީ 2021 ވަނަ އަހަރުގެ ޖުލައި މަހުގެ ތެރޭގައެވެ. މާދިހުއަކީ ރާއްޖޭގެ ކުޅިވަރުގައި ފާހަގަކޮށްލެވޭ ގިނަގުނަ ޚިދުމަތްތަކެއް ކުރައްވާފައިވާ ކުޅިވަރު ޝަޙުސިއްޔަތެކެވެ. ޚާއްސަކޮށް ކްރިކެޓާއި، ފުޓްބޯޅަ އަދި ސްވިމިން ފަދަ ހަރަކާތްތަކުގައި އޭނާގެ ބައިވެރިވުން ފާހަގަކޮށްލެވެއެވެ.
އަހަރުތަކަކަށްފަހު ކްރިކެޓް ބޯޑުން މި އަހަރުގެ ސީޒަން ހުޅުވާ މެޗު ބޭއްވުމަށް ތައްޔާރުވަމުން އަންނައިރު, މީއީ ފެށުމެއް ކަމަށާއި، މީގެ އެންމެ ބޮޑު ބޭނުމަކީ އަހަރުގެ ކްރިކެޓްގެ ހަރަކާތްތައް ކިކް-ސްޓާޓަކާ އެކު ފެށުމަށް ކަމަށް ކުރިކެޓް ބޯޑުން ވަނީ ހާމަކޮށްފައެވެ.