އޭސީސީއަށް ދެ މެންބަރުން އައްޔަންކުރުމަށް މަޖިލީހުން ރުހުންދީފި
-
ދެ ބޭފުޅުންނަށްވެސް %75 އަށްވުރެ މަތިން ވަނީ މާކްސް ލިބިފައި
-
އޭސީސީގައި ފަސް މެންބަރުން ތިއްބަވާ
އެންޓި-ކޮރަޕްޝަން ކޮމިޝަން، އޭސީސީގެ ހުސްވެފައިވާ މެންބަރުކަމުގެ މަޤާމަށް އައްޔަންކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނަންފޮނުއްވެވި ދެ ބޭފުޅުންނަށްވެސް ރުހުންދިނުމަށް ރައްޔިތުންގެ މަޖިލީހުން ފާސްކޮށްފިއެވެ. އެ ދެބޭފުޅުންނަށް ރުހުންދިނުމަށް ފާސްކޮށްފައިވަނީ ދައުރުން ބޭރުން ބޭއްވި ޚާއްޞަ ޖަލްސާގައެވެ.
އޭސީސީގެ ހުސްވެފައިވާ ދެ މެންބަރުންގެ މަގާމަށް ޢައްޔަންކުރެއްވުމަށް ރައީސުލްޖުމްހޫރިއްޔާ ރައްޔިތުންގެ މަޖިލީހަށް ފޮނުއްވާފައިވަނީ މއ. ގޯލްޑަންމޫން، އަހުމަދު ނާޝިދު އާއި ރ. އަލިފުށި، ފަސާނާ، އަބްދުﷲ ނާޝިދުގެ ނަންފުޅެވެ. އެ ދެ ބޭފުޅުންނާ އިންޓަވައިއުކޮށް މިނިވަން މުއައްސަސާތަކުގެ ކޮމިޓީގައި ހިމެނިވަޑައިގަންނަވާ މެންބަރުން ވަނީ މާކްސް ދެއްވާފައެވެ. އެގޮތުން، ދެ ބޭފުޅުންނަށްވެސް %75 އަށްވުރެ މަތިން ވަނީ މާކްސް ލިބިވަޑައިގެންފައެވެ.
އެ ދެބޭފުޅުންނަށް ރުހުން ހޯދުމަށް މަޖިލީހުގައި ވޯޓަށް އަހާފައިވަނީ ވަކިވަކިންނެވެ. އަދި އެ ދެބޭފުޅުން އޭސީސީގެ މެންބަރުކަމަށް ޢައްޔަންކުރުމަށް ފާސްވީ ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާގުންނެވެ.
އެ ދެބޭފުޅުންނާ ގުޅޭގޮތުން އެއްވެސް ޝަކުވާއެއްވާނަމަ އެ ޝަކުވާ ހުށަހެޅުމުގެ ފުރުސަތުވެސް ހުޅުވާލިއެވެ. ނަމަވެސް ޝަކުވާއަށް ހުޅުވާލި މުއްދަތުގައި އެއްވެސް ބޭފުޅަކާ ގުޅޭގޮތުން ޝަކުވާއެއް ލިބިފައިނުވާކަމަށް މިނިވަން މުއައްސަސާތަކުގެ ކޮމިޓީގެ ރިޕޯޓުގައި ވަނީ ފާހަގަކޮށްފައެވެ.
އެންޓި-ކޮރަޕްޝަން ކޮމިޝަނުގެ ދެ މެންބަރެއްގެ މަޤާމު ހުސްވެފައިވަނީ އެ ކޮމިޝަންގެ ނައިބު ރައީސް އަބްދުލްސަލާމާއި މެމްބަރު ޠާހާ މުހައްމަދު މަޤާމުން އިސްތިއުފާ ދެއްވުމާއިގުޅިގެންނެވެ. ދެ މެންބަރުން އިސްތިއުފާ ދެއްވީ ނުފޫޒު ފޯރުވުމާ ކޮރަޕްޝަންގެ ބޮޑެތި ތުހުމަތުތަކެއް ކުރެވި، އެ ދެ މެންބަރުން ވަކިކުރަން ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން ނިންމާފައިވަނިކޮށެވެ.
އޭސީސީގެ މެންބަރުކަމުގެ ދައުރަކީ 5 އަހަރު ދުވަހެވެ.