ހުއްޓިފައިވާ ފެނާއި ނަރުދަމާގެ ހުރިހާ މަޝްރޫޢުތައް މިފަށައިގަތީ ސަރުކާރުގެ ބާރު އޮންނަގޮތަށް: ރައީސް

ރާއްޖޭގެ އެކިކަންކޮޅުތަކުގައި ހުއްޓިފައިވާ ފެނާއި ނަރުދަމާގެ ހުރިހާ މަޝްރޫޢެއްގައި ދިމާވެފައިވާ މައްސަލަތައް ޙައްލުކޮށް ސަރުކާރުގެ ފުރިހަމަ ބާރު އޮންނަގޮތަށް އެ މަޝްރޫއުތައް މިމަހުން ފެށިގެން ކުރިއަށްގެންގޮސް ނިންމަވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ރ. އަނގޮޅިތީމު ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ އަނގޮޅިތީމަށް އެމަނިކުފާނު ވަޑައިގަތީ އެ ރަށުގެ ތަރައްޤީއަށް ކުރަންހުރި ކަންކަމަށް އިސްކަންދީގެ ކޮށްދީ ނިންމުމަކީ އެމަނިކުފާނު ބޭނުންފުޅުވާގޮތްކަން ހާމަކޮށްދެއްވުމަށްކަމަށެވެ.

މިދިޔަ އަހަރަކީ އިޤްތިޞާދީ ދަތިކަމާއި، ދަރަނި އިތުރުވުމުގެ ސަބަބުން ޤައުމު ބަނގުރޫޓުވުމުން ސަލާމަތްކުރުމަށާއި، އިޤްތިޞާދު ހަމަ މަގަށް އެޅުވުމަށް ގިނަ މަސައްކަތްތަކެއް ކުރަންޖެހުނު އަހަރެއްކަމަށް ރައީސް ވިދާޅުވިއެވެ. އަދި މިދިޔަ އަހަރުގެ ބަޖެޓަކީ ކުރީ ސަރުކާރުގައި މަޝްރޫއުތައް ނުހިންގޭގޮތަށް ފާސްކޮށްފައިވާ ބަޖެޓެއްކަން ފާހަގަކުރައްވާ ރައީސް ވިދާޅުވީ އެކަމުން އަރައިގަނެ އެމަނިކުފާނު ބޭނުންފުޅުވަނީ ރައްޔިތުންނަށް ވެފައިވާ ވަޢުދުތައް ފުއްދޭނެގޮތަށް ކަންކަން ކުރިއަށްގެންދިއުމަށްކަމަށެވެ.

ރައީސް ވިދާޅުވީ، ކުރިމަތިވެފައިއޮތް އިޤްތިޞާދީ މައްސަލަތައް ޙައްލުކޮށް، މިއަހަރަށް ފާސްކޮށްފައިވާ ބަޖެޓާއެކު އައު މަޝްރޫއުތައް ފަށައި، ރަށްރަށުގައި ހުއްޓިފައިވާ މަޝްރޫޢުތައް އަލުން ފަށައި ނިންމޭގޮތަށް މިހާރު ކަންކަން މަގުފަހިވެފައިވާކަމަށެވެ.

އެގޮތުން މިމަހުން ފެށިގެން އަނގޮޅިތީމުގެ ތަރައްޤީއަށް ގިނަ މަސައްކަތްތަކެއް ކުރާތަން ފެންނަމުންދާނެކަމަށް ރައީސް ވިދާޅުވިއެވެ. އަނގޮޅިތީމުގެ ތަރައްޤީއަށްވެސް ގިނަ މަސައްކަތްތަކެއް ކުރަން ހުރިކަން ފާހަގަކުރައްވަމުން ރައީސް ވަނީ ފެނާއި ނަރުދަމާގެ ގިނަ މަޝްރޫޢުތަކެއް ހުއްޓިފައި އޮތްކަމަށް ވިދާޅުވެފައެވެ.

މަޝްރޫޢުތައް ހުއްޓެން މެދުވެރިވީ އެއް ކުންފުންޏަކަށް ގިނަ ރަށްތަކެއްގެ މަޝްރޫޢުތައް ހަވާލުކުރުމުންކަން ފާހަގަކުރައްވައި އެކަމުން އަރައިގަތުމަށް މިހާރު ގޮތްތަކެއް ހޯދައި، ދާދި އަވަހަށް އަނގޮޅިތީމާއި، އެނޫންވެސް ރަށްރަށުގައި ދިމާވެފައިވާ ފެނާއި ނަރުދަމާގެ ހުރިހާ މައްސަލައެއް ޙައްލުކޮށް ސަރުކާރުގެ ފުރިހަމަ ބާރު އޮންނަގޮތަށް އެ މަޝްރޫއުތައް ނިންމަވާނެކަމަށް ރައީސުލްޖުމްހޫރިއްޔާ ވިދާޅުވެފައެވެ.

ރައީސް ވިދާޅުވީ އެމަނިކުފާނު ވަޢުދުވީގޮތަށް އަނގޮޅިތީމަށް ތަރައްޤީ ގެންނަވާނެކަމަށާއި، ބަނދަރުގެ މައްސަލަތައް ޙައްލުކޮށް، އެރަށުގައި މޫދަށް އެރޭ ސަރަޙައްދަކާއެކު ޓީޖެޓީއެއްވެސް ތަރައްޤީކޮށްދެއްވާނެކަމަށެވެ.

"އަޅުގަނޑު ބޭނުން ވަރަށް އަވަހަށް ކަންކަން ހިނގައިގަންނަން. ކައުންސިލްތަކާ މުއައްސަސާތަކާ ވަޒީރުންނާ ދިމާވެ މައްސަލަތައް ހައްލުވެ ނަތީޖާ ނެރެން އަޅުގަނޑު ބޭނުންވަނީ ކުޑަ ވަގުތުކޮޅެއްގެ ތެރޭގައި. ސަރުކާރުގައި ވަރަށް ގިނައިން ހިނގާކަމެއް ސިޓީބިޓީ ބަދަލުކޮށް ލަސްތަކެއްވުން. އެހެންކަމުން އަޅުގަނޑު ބޭނުން ރަށްރަށަށްގޮސް އަވަހަށް މަޝްރޫޢުތައް ހިންގަން. ބަނދަރު މަސައްކަތްވެސް ހުއްޓި އެންމެފަހުން ނެރުފައިކަށި ހަދަންޖެހިފަ މިއޮތީ މިރަށުގައިވެސް. ބަނދަރާ މޫދަށް އެރޭ ސަރަހައްދަކާއެކު އަޅުގަނޑު ވަޢުދުވީގޮތަށް ކުރިއަށް ގެންދާނަން" ރައީސުލްޖުމްހޫރިއްޔާ ވިދާޅުވިއެވެ.

ސިއްޙީ އަދި ތަޢުލީމީ މައްސަލަތައް ޙައްލުކުރުމަށް މިއަހަރުގެ ބަޖެޓުގައި އިސްކަންދެއްވާކަން ފާހަގަކުރައްވަމުން ރައީސުލްޖުމްހޫރިއްޔާގެ ވާހަކަފުޅުގައި ވަނީ އަނގޮޅިތީމު ސުކޫލުގެ ކްލާސްރޫމާއި މަލްޓިޕާޕަސްހޯލާއި އެނޫންވެސް ވަސީލަތްތައް ޤާއިމްކުރައްވައި، އެރަށު ސިއްޙީ މަރުކަޒުތަކުގެ ކޮންސިއުމަބަލްސް ހުސްނުވާނެގޮތަށް ކަންކަން ކުރިއަށްގެންދަން ބޭނުންވާކަމަށް ރައީސް ވިދާޅުވިއެވެ. މީގެއިތުރުން ސަރުކާރުން ފަށާފައިވާ ރަނގަޅު ފެންވަރުގެ ބޭސް ބަލްކުކޮށް ގެނައުމުގެ މަސައްކަތާ އެއްގޮތަށް ރަނގަޅު ފެންވަރުގެ ސިއްޙީ ވަސީލަތްތައްވެސް ބަލްކު ޕްރޮކިއުމަންޓްކޮށް ގެނެސް، ރަށްރަށަށް ލިބޭނެ އިންތިޒާމުތައް ހަމަޖެއްސުމަށް ނިންމަވާފައިވާކަމަށް އެމަނިކުފާނު ވިދާޅުވިއެވެ.

"އެއްފަހަރުން ތަންކޮޅެއް ބޮޑު ޚަރަދެއް ހިނގިއަސް މުސްތަގުބަލަށް ބަލާއިރު ޚަރަދު ކުޑަވާނެ. އަދި އެންމެ ކޮލިޓީ ތަކެތި ހަރުކުރުމަށް ނިންމާފަ އެވަނީ ރާއްޖޭގެ ހުރިހާ ސަރަހައްދަކަށް ލިބޭނެގޮތަށް. އެ ސިޔާސަތުގެ ދަށުން މިރަށަށްވެސް އެކަން ހައްލުވެގެންދާނެ" ރައީސުލްޖުމްހޫރިއްޔާ ވިދާޅުވިއެވެ.

ރައީސް ވިދާޅުވީ އަނގޮޅިތީމުގެ ފެނާ ނަރުދަމާ ނިމުނުހާއަވަހަށް މަގުތައްވެސް ތަރައްޤީކުރުން ކުރިއަށްގެންދަވާނެކަމަށެވެ. އަދި ޒުވާނުންނާއި އަންހެނުން ދުޅަހެޔޮ ސިއްހަތެއްގައި ތިބުމަށް ކުޅިވަރުގެ ވަސީލަތްތައް ބޭނުންވާކަމަށާއި، އެކަމަށް ބޭނުންވާ ވަސީލަތްތައް ޤާއިމްކުރުން ކުރއަށްދާނެކަމަށްވެސް އެމަނިކުފާނު ވިދާޅުވިއެވެ. ހުއްޓިފައިވާ ކުޅިވަރުގެ މަޝްރޫޢުތަކާއި، އައު މަޝްރޫޢުތައް މިއަހަރާއި އަންނަ އަހަރު ކުރިއަށްގެންދަވާނެކަމަށް ރައީސް ވިދާޅުވިއެވެ.

ރައީސުލްޖުމްހޫރިއްޔާގެ ވާހަކަފުޅުގައި ރާއްޖޭގެ މާސްޓަރޕްލޭން ހެދުމުގެ މަސައްކަތް ކުރިއަށްގެންދާނީ ރައްޔިތުންގެ ބައިވެރިވުމާއެކުކަން ތަކުރާރުކުރައްވާ ވިދާޅުވީ އަނގޮޅިތީމުގެ ތަރައްޤީއާއި ރާއްޖޭގެ ތަރައްޤީ އޮންނަންބޭނުންވާގޮތަށް ރައްޔިތުންގެ ބަސް ބޭނުންވާކަމަށެވެ. އަދި ޤާނޫނީީ ބާރުވެރިކަން ދީގެން ރައްޔިތުން ނިންމިގޮތަށް ތަރައްޤީގެ ކަންކަން ކުރިއަށްދާނެކަމަށާއި ތަރައްޤީ ކުރިއަށްގެންދާނީ ރައްޔިތުންބޭނުންވާ މިސްރާބަށްކަމަށް ރައީސް ވިދާޅުވިއެވެ. އެކަމުގައި ރައްޔިތުންގެ އެއްބާރުލުން ދެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެދިވަޑައިގަތެވެ. އެމަނިކުފާނު ބޭނުންފުޅުވަނީ ސީދާ ރައްޔިތުން އެދޭގޮތް އޮޅުންފިލުވައިގެން ކުރިއަށްދިއުމަށް ކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.