ހުރިހާ ޚިދުމަތެއް އެންމެ މަތީފަންތީގައި ލިބޭ ރަށަކަށް އުނގޫފާރު ހަދާނަން: ރައީސް

އުނގޫފާރު ހޮސްޕިޓަލަކީ ޓާޝަރީ ފެންވަރުގައި ހުރިހާ ޚިދުމަތެއް ލިބޭ ހޮސްޕިޓަލެއްގެގޮތުގައި ކުރިއަށް އޮތް 3 އަހަރު ދުވަހުގެތެރޭގައި ފުރިހަމަކުރައްވައި، އެންމެ މަތީ ފެންވަރުގައި ހުރިހާ ޚިދުމަތެއް ލިބޭ ރަށަކަށް އުނގޫފާރު ހަދާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިކަން ހާމަކުރެއްވީ މާޅޮސްމަޑުލު އުތުރުބުރީގެ ބައެއް ރަށްރަށަށް ކުރައްވަމުން ގެންދަވާ ދަތުރުފުޅުގައި އަތޮޅުގެ ވެރިކަންކުރާ ރަށް، އުނގޫފާރަށް ވަޑާއިގެން އެރަށުގެ ތަރައްޤީއާއި ކުރިއެރުމަށް ކުރައްވަން ނިންމަވާފައިވާ ކަންކަމަށް އަލިއަޅުއްވާލައްވައި ދެއްކެވި ވާހަކަފުޅުޅުގައެވެ.

ރައީސުލްޖުމްހޫރިއްޔާ ވިދާޅުވީ ރާއްޖޭގެ ތަރައްޤީގެ މާސްޓަރ ޕްލޭނަކީ ދުރުރާސްތާއަށް ވިސްނަވައި، ސަރަޙައްދީ ތަރައްޤީއާއި ދެމެހެއްޓެނިވި ތަރައްޤީއަށް ކުރިއަށްގެންދަވާ މަސައްކަތެއްކަމަށެވެ. އެއީ ކުދި އަދި ބޮޑެތި ރަށްރަށުގެ ރައްޔިތުންނަށް އެއް ހަމައަކުން ޚިދުމަތް ދިނުމަށާއި، މުޅި ރާއްޖޭގެ އެންމެހާ ރައްޔިތުންނަށް އެންމެ މަތީ ފެންވަރުގައި ހުރިހާ ޚިދުމަތެއް ދިނުމަށް ކުރިއަށްގެންދަވާ މަސައްކަތެއްކަމަށްވެސް ރައީސް ވިދާޅުވިއެވެ. އެގޮތުން 7 ރަށެއް އެންމެ މަތީ ފެންވަރުގެ ޚިދުމަތްތައް ދެމެހެއްޓެވިވި ތަރައްޤީގެ ވިސްނުމުގައި އާބަން ސެންޓަރުގެ ގޮތުގައި ތަރައްޤީކުރުމަށް ކަނޑައަޅުއްވާފައިވާކަން ފާހަގަކުރައްވަމުން ރައީސް ވިދާޅުވީ، އުނގޫފާރަކީ އެފަދަ އެއް ސެންޓަރުކަމަށެވެ. އެއީ ބުރަ މަސައްކަތެއްކަމަށާއި، އެހެންކަމުން އެއީ ސަރުކާރާއި ކައުންސިލާ ރައްޔިތުން ގުޅިގެން ކުރިއަށްގެންދަންޖެހޭ މަސައްކަތެއްކަމަށް ރައީސް ވިދާޅުވިއެވެ. އެހެންކަމުން މިއަހަރާއި ކުރިއަށް އޮތް އަހަރުތަކުގައި އެކަން ހަގީގަތަކަށް ހެދުމަށް އުނގޫފާރުގައި ގިނަ މަސައްކަތްތަކެއް ކުރިއަށް ގެންދަވާނެކަމަށް ރައީސް ވިދާޅުވިއެވެ.

ރައީސް ވިދާޅުވީ އާބަން ސެންޓަރަކަށް ބޭނުންވާނެ ހުރިހާ ޚިދުމަތެއް އުނގޫފާރުގައި ޤާއިމްކޮށް ނަތީޖާ ނެރެދެއްވާނެކަމަށެވެ. އުނގޫފާރުގެ ބިން ހިއްކި ނަމަވެސް އެ ސަރަހައްދު ހިމާޔަތް ކުރެވިފައިނުވާތީ ގިރަމުންދާކަމަށާއި، އެހެންކަމުން އެ ބިން ފުރިހަމައަށް ހިއްކައި ހިމާޔަތްކުރާނެކަމަށް ރައީސް ވިދާޅުވިއެވެ. އަދި އުނގޫފާރަކީ އާބަން ސެންޓަރެއްގެ ގޮތުގައި ކަނޑައަޅާފައިވާ ރަށަކަށްވުމުން އެންމެ މުހިންމީ ބޯހިޔާވަހިކަމުގެ މަސައްކަތް ހިންގުންކަމަށް ރައީސް ވިދާޅުވިއެވެ. އެކަމަށްޓަކައި މި ދައުރުގައި 500 ހައުސިން ޔުނިޓް ތަރައްޤީކުރައްވާނެކަމަށް ރައީސް ވިދާޅުވިއެވެ. ބޯހިޔާވަހިކަމުގެ މަޝްރޫއު ހިންގުމަށް ބޭނުންވާ ބިމާއި ފަންނީ މަސައްކަތް ނިމުނުހާ އަވަހަށް އެމަސައްކަތް ފަށާނެކަމަށާއި، އެއީ ރަށުގެ ރއްޔިތުންނާއި އެރަށަށް ހިޖުރަކުރާނެ ފަރާތްތަކާއި ސަރުކާރުގެ ބޭނުންތަކަށް އަދި ތަރައްޤީއަށް މުހިންމުކަމެއްގެގޮތުގައި ރައީސް ފާހަގަކުރެއްވިއެވެ.

"މިއަހަރުގެ ބަޖެޓަކީ އައު މަޝްރޫޢުގެ ދަށުން އެންމެ ގިނަ ގެދޮރުވެރިކަމުގެ މަޝްރޫއު ހިންގަން ކަނޑައެޅި ބަޖެޓެއް. އިރާދަކުރެއްވިއްޔާ މިއަހަރާއި އަންނަ އަހަރުގެ ތެރޭގައި މިރަށުގައި ގެދޮރު ބިނާކުރުމުގެ މަސައްކަތްފަށާނަން. އަދި މިދައުރުގައި 500 ހައުސިން ބިނާކުރުމުގެ މަސައްކަތް ކުރިއަށްގެންދާނަން" ރައީސުލްޖުމްހޫރިއްޔާ ވިދާޅުވިއެވެ.

މިއަހަރުގެ ބަޖެޓުން 1500 މިލިޔަން ރުފިޔާ ގެދޮރުވެރިކަމަށް ކަނޑައަޅާފައިވާކަން ތަކުރާރުކުރައްވައި ރައީސް ވަނީ މި ޖަނަވަރީ މަސް ނިމުމުގެ ކުރިން އެ މަޝްރޫއުތަކަށް ކޮންޓެކްޓަރުން ހޯދައި ވީހާވެސް އަވަހަށް މަސައްކަތްތައް ފަށްޓަވާނެކަމަށް ވިދާޅުވެފައެވެ. އެމަނިކުފާނު ވަޢުވީ ޢަދަދާއި ވަޢުދުވީގޮތަށް ގެދޮރުވެރިކަމުގެ ހުރިހާ މަޝްރޫޢުއެއް މިއަހަރު ހުރިހާ ރަށެއްގައި ފަށްޓަވާނެކަމަށްވެސް ރައީސް ވިދާޅުވިއެވެ. ގެދޮރުވެރިކަމަށްފަހު ދެން އިސްކަންދެއްވަނީ ތަޢުލީމާއި ސިއްޙީ ދާއިރާއަށްކަމަށާއި، އެ އަމާޒަށް ދިއުމަށް އުނގޫފާރު ސްކޫލުގައި އެއްދަންފަޅިއަށް ކިޔަވައިދިނުމަށް ގޮންޖެހުންތަކެއް އެބަހުރިކަމަށް ރައީސް ވިދާޅުވިއެވެ. އެހެންކަމުން އެއްދަންފަޅިއަށް ކިޔަވައިދެވޭނެގޮތަށާއި މުސްތަގުބަލަށް ވިސްނައިގެން އުނގޫފާރު ސްކޫލަށް ކްލާސްރޫމްތަކާއި ވަސީލަތްތައް ޤާއިމްކޮށް ފުރިހަމަކުރައްވާނެކަމަށްވެސް ރައީސް ވިދާޅުވިއެވެ.

މީގެ އިތުރުން ކުރިއަށް އޮތް ތިން އަހަރު ދުވަހުގެ ތެރޭގައި އުނގޫފާރު ހޮސްޕިޓަލު ޓާޝަރީ ފެންވަރަށް ތަރައްޤީކުރައްވާނެކަމަށްވެސް ރައީސް ވިދާޅުވިއެވެ.

"ސިއްޙީ ދާއިރާގައިވެސް އަޅުގަނޑުމެން މަސައްކަތްތައް ރާވާފައިވަނީ އެގޮތަށް. ސިއްޙީ ގޮތުން ޚިދުމަތް ފުރިހަމަކުރުމަށް ވަރަށް އިސްކަންދީގެން ކުރިއަށްގެންދާނަން. ޓާޝަރީ ހޮސްޕިޓަލެއްގެގޮތުގައި މިރަށު ހޮސްޕޮޓަލް ތަރައްޤީކުރުމަކީ އަޅުގަނޑު ނިންމާފައިވާކަމެއް. އަދިވެސް ވަރަށް ގިނަ ކަންކަން ފުރިހަމަވާންޖެހޭ. 3 އަހަރު ދުވަސް ކަނޑައަޅަފައިވާނީ ޖާގައިގެ ގޮތުން އަދި ވަސީލަތުގެ ގޮތުން ޚިދުމަތްތައް ފުރިހަމަވާން" ރައީސުލްޖުމްހޫރިއްޔާ ވިދާޅުވިއެވެ.

މީގެ އިތުރުން ކުޅިވަރާއި އިޖުތިމާޢީ ދާއިރާތަކުންވެސް ކުރާ މަސައްކަތްތަކަށް އަލިއަޅުވާއްލަވާ ރައީސް ވަނީ ފީފާ ފެންވަރުގެ ސްޓޭޑިއަމެއް އުނގޫފާރުގައި ތަރައްޤީކުރުމަކީ އެމަނިކުފާނުގެ ވަޢުދެއްކަން ފާހަގަކުރައްވައި، އެ ވަޢުދުވެސް ފުއްދަވާނެކަމުގެ ޔަޤީންކަން ދެއްވާފައެވެ. އަދި އިތުރު ކުޅިވަރުގެ ވަސީލަތްތައްވެސް ޤާއިމްކުރައްވާނެކަމަށް އެމަނިކުފާނު ވިދާޅުވިއެވެ.

ރައީސުލްޖުމްހޫރިއްޔާގެ ވާހަކަފުޅުގައި އުނގޫފާރު ބަނދަރު ބޮޑުކުރުމަށް ވެވަޑައިގެންނެވި ވަޢުދާއެއްގޮތަށް އެކަންވެސް ރައްޔިތުން ބޭނުންވާގޮތަށް ފުރިހަމަކުރައްވާނެކަމަށާއި، އިޤްޞާދީ ނަފާ ލިބޭނެ ގިނަ ކަންކަން އެރަށުގައި ހިންގުމަށް ރާވާފައިވާކަމަށްވެސް ވިދާޅުވިއެވެ. މީގެ އިތުރުން ރ. އަތޮޅަށް ދަތުރުފަތުރުގެ ނިޒާމުވެސް މުހިންމުކަން ފާހަގަކުރައްވައި އެމަނިކުފާނު ވިދާޅުވީ، ދެން އެންމެ އަވަހަށް އާރުޓީއެލްގެ ޚިދުމަތް ފަށާނީ ރ އަތޮޅާއި ބ އަތޮޅުގައިކަމަށެވެ. އެގޮތުން ޖުލައި މަސް ނިމުމުގެ ކުރިން އެ ދެއަތޮޅުގައި އާރުޓީއެލްގެ ޚިދުމަތް ފަށްޓަވާނެކަމަށް ރައިސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.