ފުވައްމުލަކުގައި ހުއްޓިފައި އޮތް ހައުސިންގ މަޝްރޫޢު ފެށުމަށް ތައްޔާރުވެއްޖެ

ފުވައްމުލައް ސިޓީގައި ހުއްޓިފައި އޮތް ހައުސިންގ ޔުނިޓްތައް ތަރައްޤީކުރުމުގެ މަސައްކަތް ފެށުމަށް ތައްޔާރުވެފައިވާކަމަށް މާލީކަންކަމާއި ތަރައްޤީގެ ރޭވުންތެރިކަމާ ބެހޭ ވަޒީރު މޫސާ ޒަމީރު ވިދާޅުވެއްޖެއެވެ.

ވަޒީރު މިފަދައިން ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރ. އަތޮޅަށް ކުރައްވަމުންގެންދަވާ ދަތުރުފުޅުގެ ތެރެއިން ހުއްޓިފައި ހުރި މަޝްރޫޢުތައް އަލުން ފެށުމަށްޓަކައި ކުރަމުންދާ މަސައްކަތުގެ މަޢުލޫމާތު ޕީއެސްއެމް ނިއުސްއާ ހިއްސާކުރައްވަމުންނެވެ.

މާލީކަންކަމާއި ތަރައްޤީގެ ރޭވުންތެރިކަމާ ބެހޭ ވަޒީރު މޫސާ ޒަމީރު ވިދާޅުވީ، ރައީސުލްޖުމްހޫރިއްޔާ އިޢުލާންކުރައްވާފައިވާ ބޯހިޔާވަހިކަމުގެ މަޝްރޫޢުތަކުގެ ތެރެއިން ބައެއް މަޝްރޫޢުތަކަކީ މިއަހަރުގެ ބަޖެޓްގައި ހިމަނައިގެން ކުރިއަށްގެންދާ މަޝްރޫޢުތަކެއް ކަމަށެވެ. އަދި އަނެއްބައި މަޝްރޫޢުތަކަކީ ކޮންޓްރެކްޓަރ ފައިނޭންސް އުޞޫލުން ކުރިއަށްގެންދާނެ މަޝްރޫޢުތަކެއްކަމަށެވެ. ވަޒީރު ވިދާޅުވީ ރައީސް އިޢުލާން ކުރައްވާފައިވާ ގޮތަށް މިމަހުގެ ތެރޭގައި މި މަޝްރޫޢޫތައް ކުރިއަށްގެންދިޔުމަށްޓަކައި ކޮންޓްރެކްޓަރ ހޯދުމަށް ކުރަންޖެހޭ މަސައްކަތްތައް ފައްޓަވާފައިވާކަމަށެވެ.

ވަޒީރު ވިދާޅުވީ އަލަށް ފަށާފައިވާ މަޝްރޫޢުތަކުގެ އިތުރަށް މިހާރު ހުއްޓިފައި ހުރި ހައުސިންގ މަޝްރޫޢުތައް އަލުން ފެށުމަށްޓަކައި ކުރަންޖެހޭ މަސައްކަތްތައްވެސް ކުރަމުން އަންނަކަމަށެވެ. އެގޮތުން ފުވައްމުލައް ސިޓީގައި ތަރައްޤީކުރުމަށް ހަވާލުކޮށްފައި އޮތް ހައުސިންގ ޔުނިޓް ތަރައްޤީކުރުމުގެ މަސައްކަތް ކުރިއަށްގެންދިޔުމަށްޓަކައި އެ މަސައްކަތުގެ ކޮންޓްރެކްޓަރަށް ފައިސާ ހަމަޖައްސާދީ ފެށުމަށް ތައްޔާރިވެފައިވާކަމަށެވެ.

"ޕޭމެންޓްތައް ވަކި އުޞޫލެއްގެ ދަށުން ކަނޑައެޅިގެން މަސައްކަތް އެބަ ކުރެވޭ. މިދިޔަ 6އެއްކަ އަހަރުގެ ތެރޭގައި ޕްރައިވެޓް ކުންފުނިތަކަށް ނުދެވި ހުރި ފައިސާތައްވެސް އެމީހުންނަށް ދީގެން ގުޅިގެން މަޝްރޫއުތައް ކުރިއަށް ގެންދިޔުމަށް ރޭވިފައި މިހުރީ." މާލީ ވަޒީރު މޫސާ ޒަމީރު ވިދާޅުވިއެވެ.

ވަޒީރު ވިދާޅުވީ ކުރިން ހުއްޓިފައި ހުރި މަޝްރޫޢުތަކާއި ރައީސްގެ ވަޢުދުފުޅުތަކުގައި ހުރި މުހިއްމު މަޝްރޫޢުތައް ފަށައިގެން ކުރިއަށްގެންދާނެކަމަށެވެ.

އެގޮތުން ބައެއް ރަށްރަށުން މަޝްރޫޢުތައް ލަސްކަމުގެ ޝަކުވާ ލިބިފައިވާކަމަށާއި، ހުއްޓިފައި ހުންނަތާ ހަތަރު ފަސް އަހަރުވެފައިވާ މަޝްރޫޢުތައް އަލުން ފެށުމަށް ރާވަމުން އަންނަކަމަށްވެސް ވަޒީރު ވިދާޅުވިއެވެ.

ފުވައްމުލައް ސިޓީގައި 400 ހައުސިން ޔުނިޓް ތަރައްޤީކުރުމަށް 2023 ވަނަ އަހަރު ޑިޒައިން އެންޑް ބިލްޑް އުޞޫލުން މި މަސައްކަތް ހަވާލުކުރައްވާފައިވަނީ ޕީޓީ.ސިޓްރަމަސް ހެވީ އިންޑަސްޓްރީސް އިން ޖޭވީ ވިތް ފްލެކްސް އިންކް ޕްރައިވެޓް ލިމިޓެޑް ކިޔާ ބަޔަކާ ވަނީ ހަވާލުކޮށްފައެވެ.

މި މަޝްރޫޢުގައި ފުވައްމުލައް ސީޓީގެ އެކި ސަރަޙައްދުތަކަށް ބަހާލައިގެން 11 ފަންގިފިލާގެ 5 ޓަވަރު ތަރައްޤީކުރަން އޮތީ ހަވާލުކޮށްފައެވެ. އެގޮތުން ކޮންމެ ޓަވަރެއްގައި 1000 އަކަފޫޓުގެ 80 ފްލެޓް ހިމެނެއެވެ. އަދި ފްލެޓެއްގައި ހިމެނޭނީ 3 ކޮޓަރި، 3 ފާޚާނަަ، ސިޓިންގ ރޫމް، ބަދިގެ، ކާގެ، ލޯންޑަރީ އަދި ސްޓޯ ރޫމެކެވެ. މި މަޝްރޫޢުގެ އިތުރަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ފުވައްމުލައް ސިތީގައި 500 ހައުސިންގ ޔުނިޓް ތަރައްޤީކޮށްދެއްވުމަށް ވަޢުދުވެވަޑައިގެންފައެވެ.