ކިނޮޅަހުގެ ތުއްތު ކުދިންނަށް ރައީސް ދެއްވި ޔަޤީންކަމަކީ ޕާކެއްގެ އުފާވެރިކަން

މިއަހަރު ރ. ކިނޮޅަހުގެ ތުއްތު ކުދިންގެ ހުވަފެނުގައި ހަޤީޤީ ކުލަ ޖައްސަވާ އެކުދިންނަށް ޕާކެއް އަޅުއްވާދެއްވާނެކަމުގެ ޔަޤީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މި ޔަޤީންކަން ދެއްވީ ރ. ކިނޮޅަހުގެ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.

ރައީސުލްޖުމްހޫރިއްޔާ ވިދާޅުވީ އެމަނިކުފާނު ރަށްރަށަށް ރައްޔިތުންގެ ގާތަށް ވަޑައިގަންނަވަނީ އެރަށްރަށުގެ ތަރައްޤީއަށް ހުރި ކަންކަން ބާރު ސްޕީޑުގައި ކުރިއަށް ގެންދަވާނެކަމުގެ ޔަޤީންކަން ދެއްވުމަށްކަމަށެވެ. އެމަނިކުފާނުގެ ކެމްޕޭންގައި ގިނަ ރަށްތަކަށް ޕާކު އަޅުއްވާދެއްވާނެކަމަށް ވަޢުދުތަކެއް ވެވަޑައިގެންފައިވާތީ އެކަންކަން ފުރިހަމަކުރެއްވުމުގެ ގިނަ މަސައްކަތްތަކެއް މިއަހަރު ކުރިއަށްގެންދަވާނެކަމަށް ރައީސް ވިދާޅުވިއެވެ. އަދި މިއަހަރު މިފަދަ އިޖްތިމާއީ އެތައް މަޝްރޫޢުތަކެއް ނިންމަވާނެކަމުގެ ޔަޤީންކަންވެސް ރައީސްދެއްވިއެވެ.

ރ. ކިނޮޅަހުގެ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައި ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވީ އެ ރަށުން ރައީސްއަށް ދެންނެވި މަރުހަބާގެ ތެރެއިން އެރަށުގެ ތުއްތު ކުދިން ޕާކަކަށް ބޭނުންވެފައިވާ މިންވަރު ހާމަވެގެންދިޔަކަމަށެ. އެހެންކަމުން އެ ކުދިންގެ ހުވަފެން ހަޤީޤަތަކަށް ހައްދަވައިދެއްވާނެކަމުގެ ޔަޤީންކަން ރައީސްދެއްވިއެވެ.

"ސަފުގައި ސަލާމުކުރަމުން ދިޔައިރުގައި ކުޑަކުޑަ ކުދިން ކޮއްކޮއަށް ޕާކެއް ހަދައިދޭށޭ ބުނި." ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.

ރައީސް ވިދާޅުވީ އެމަނިކުފާނުގެ ސިޔާސަތުގައި އެއްވެސް ތަފާތެއްނެތި ކުދި އަދި ބޮޑެތި އާބަދީތަކުގައި ޕާކްތައް ހެދުމަކީ ތަރައްޤީއަށް އެހާމެ މުހިންމުކަމެއްކަމަށެވެ. އަދި ހަމައެކަނި ބޮޑެތި ޢިމާރާތްތަކެއް އެޅުމަކީ ދެމެހެއްޓެނިވި ތަރައްޤީއެއް ނޫންކަމަށާއި، ތުއްތުކުދިންނާ އާއިލާތަކަށް ހިތްފަސޭހަކަމާއެކު ވަގުތު ހޭދަކޮށްލެވޭނެ ތަންތަން ހުންނަންޖެހޭކަމަށް ރައީސް ވިދާޅުވިއެވެ.

ރައީސްގެ ވާހަކަފުޅުގައި، ވަށާޖެހޭ ތަރައްޤީއެއް ގެނެސްދިނުމަށް މި ސަރުކާރުން ބޮޑު އަހަމިއްޔަތުކަމެއް ދެއްވާކަމަށް ވަނީ ފާހަގަކުރައްވާފައެވެ. އަދި މި ސިޔާސަތުގެ ދަށުން ޕާކުތައްފަދަ އިޖްތިމާއީ ތަރައްޤީއާބެހޭ މުހިއްމު މަޝްރޫއުތަކެއް ގެނެސްދެވިއްޖެނަމަ ރައްޔިތުންނަށް ގިނަގުނަ މަންފާތަކެއް ކުރާނެކަމަށްވެސް ރައީސް ވިދާޅުވިއެވެ.

"އެކަހަލަ ޖާގަތައް ކްރިއޭޓްކޮށްދިނީމަ އާއިލާތަކަށް ކުދިންނަށް ވަރަށް ބޮޑަށް ހިންހަމަޖެހުން ލިބޭނެ. ސިކުނޑިއަށް އެ ލިބޭ ހިންހަމަޖެހުމަކީ ހަޤީޤަތުގަ ވަރަށް މުހިންމު އެއްޗެއް. މިގޮތުން އަޅުގަނޑުމެންގެ ސިޔާސަތުގަ ކަނޑައަޅާފަ މިއޮތީ ކޮންނެ ރަށެއްގަވެސް ޕާކު ހަދައިދިނުން." ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވިއެވެ.

ރ. ކިނޮޅަހުގެ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައި ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވީ ނިމިދިޔަ އަހަރުތަކުގައި މިފަދަ މަޝްރޫއުތަކެއް ނުހިންގުނު ނަމަވެސް މިއަހަރުތެ ރޭގައި މިފަދަ އެތައް މަޝްރޫއުތަކެއް ހިންގުމަށް ބޮޑު އަހަމިއްޔަތުކަމެއް ދެއްވާނެކަމަށާއި، މިއަހަރަކީ އިޖްތިމާއީ ތަރައްޤީއަށް ޚާއްޞަ އިސްކަމެއް ދެއްވާނެ އަހަރެއްކަމަށެވެ.

"މިހާރު އަޅުގަނޑުމެން ފާސްކޮށްގެން ތަންފީޒުކުރަމުންދާ މި ބަޖެޓުގަ ބޮޑު އިސްކަމެއް އެބަދެން އިޖްތިމާއީ ދާއިރާގަ ކުރަން ހުރި ކަންކަމުގަ އެކަހަލަ ޕާކުތައް ހަދާއިދީ ކުޅިވަރު ކުޅޭ ވަސީލަތްތަކާއި މިހެންހުރި ދުޅަހެޔޮކަމަށް ސިކުނޑީގެ ތަރައްޤީއަށް ހިންހަމަޖެހުމަށް ބޭނުންވާ ކަންކަން ކުރަން. އެހެންމަ ޔަގީންކަން ދެން އިރާދަކުރެއްވީތީ މިރަށުގަ ތުއްތުކުދިން އެ ބޭނުންވެލައްވާ ޕާކު އަޅުގަނޑުމެން ހަދާދޭނަން، މިއަހަރު ތެރޭގައި އެކަން ކުރާނެކަން އަޅުގަނޑު ދަންނަވާލަން." ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވިއެވެ.

ރ. ކިނޮޅަހަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރ. އަތޮޅުގެ 11 ރަށަކަށް ކުރައްވާ ދަތުރުފުޅުގެ ތެރެއިން ވަޑައިގެންނެވި 9 ވަނަ ރަށެވެ. ކިނޮޅަހަށް ވަޑައިގަތުމާއެކު އެ ރަށުން ރައީސްއަށް ވަނީ ހޫނު މަރުހަބާއެއް ދަންނަވާފައެވެ.

މި ދަތުރުފުޅުގައި ކިނޮޅަހު ކައުންސިލް އިދާރާގެ އައު އިމާރާތުގެ ބިންގާ އެޅުމާއި ބޭންކް އޮފް މޯލްޑިވްސްގެ އޭޓީއެމް އެރަށުގައި ބެހެއްޓުމުގެ މަސައްކަތް އެ ރަށު ކައުންސިލާ ހަވާލުކުރައްވާފައިވެއެވެ. މީގެ އިތުރުން ރަށުގެ ކައުންސިލާއި އަންހެނުންގެ ތަރައްޤީއަށް މަސައްކަތް ކުރާ ކޮމިޓީގެ މެންބަރުންގެ އިތުރަށް ރަށުގެ ރައްޔިތުންނާ ރައީސުލްޖުމްހޫރިއްޔާ ބައްދަލުކުރައްވާފައިއެވެ.