ތޫނު އެއްޗަކުން ބިރުދައްކައި ބިދޭސީއެއްގެ އަތުން ފޭރުނު ބަޔަކު ހައްޔަރުކޮށްފި

ތޫނު އެއްޗަކުން ބިރުދައްކައި ބިދޭސީއެއްގެ އަތުން ފޭރުނު ބަޔަކު ހައްޔަރުކޮށްފިއެވެ.

ދިވެހި ފުލުހުންގެ ޚިދުމަތުން ވިދާޅުވީ ބިދޭސީއަކަށް ބިރުދައްކައި ފައިސާ ފޭރިގެންފައިވާ މައްސަލައެއް ރޭ 10:14ހާއިރު ހުށަހަޅާފައިވާ ކަމަށެވެ. މި މައްސަލަ ހުށަހަޅާފައިވަނީ ރަސްފަންނު ސަރަހައްދުގައި ޕެޓްރޯލް ކުރުމުގައި އުޅުނު ޕެޓްރޯލް ބީޓަކަށް ބަޔަކު ދުވެފައި ދިޔަތަން ފެނިގެން އެމީހުން ފަހަތުން ދިޔަ މީހާއާ ސުވާލުކުރުމުން ކަމަށެވެ.

މި މައްސަލައިގައި ފުލުހުން ވަނީ ތިން މީހަކު ހައްޔަރުކޮށްފައެވެ. އެއީ ސ. ހިތަދޫ/ އައްޒާ، އުމުރުން 34 އަހަރުގެ މުބާރިކް މުޙައްމަދާއި ފުވައްމުލައް ދިގުވާޑު/ ގުރަހާގެ، އުމުރުުން 30 އަހަރުގެ އަހުމަދު ފަޔާޒު އާއި ފުވައްމުލައް ދިގުވާޑު/ ކައިރުގެ، އުމުރުުން 36 އަހަރުގެ އަހުމަދު ނަދީފުއެވެ.

މި ތިން މީހުން ހައްޔަރުކޮށްފައިވަނީ ފުލުހުންގެ އިތުރުން ޕެޓްރޯލް ބީޓެއްގެ އެހީތެރިކަމާއެކު ކުރި މަސައްކަތުން ނޯތު ހާބަރ ސަރަހައްދުން ކަމަށް ފުލުހުން ވިދާޅުވެއެވެ. އެ މީހުން ފޭރިފައިވަނީ 1000 ރުފިޔާ އާއި 10 ޔޫރޯ އާއި ބަންގްލަދޭޝްގެ 10 ޓާކާއާއި ސްރީލަންކާގެ 20 ރުފީސް އާއި އިންޑިއާގެ 500 ރުޕީސް އާއި ސިންގަޕޫރުގެ ދެ ޑޮލަރު ކަމަށާއި އޭގެ ތެރެއިން 1000 ރުފިޔާ އާއި ސްރީލަންކާގެ ރުޕީސް އަދި ސިންގަޕޫރުގެ ޑޮލަރު އެމީހުން އަތުން ފެނިފައިވާ ކަމަށްވެސް ފުލުހުން ވިދާޅުވެއެވެ.

މި މައްސަލަ ފުލުހުން ދަނީ އިތުރަށް ތަހުގީގުކުރައްވަމުންނެވެ.