ޕެނަލްޓީގައި ޕޮލަންޑް ބަލިކޮށް ޔޫރޯ ފުޓްބޯޅަ މުބާރާތުގެ ސެމީފައިނަލް ފުރަތަމަ ޖާގަ ޕޯޗްގަލް ހޯދައިފިއެވެ.
އެކެއް އެކަކުން ނަތީޖާ އެއްވަރުވި މިމެޗް، ޕެނަލްޓީގައި ޕޯޗްގަލް ކާމިޔާބުކުރީ ފަސްލަނޑު ތިން ލަނޑުންނެވެ. މެޗްގެ ދެވަނަ މިނެޓްގައި ލަނޑު ޖަހާ ކުރިހޯދީ ޕޮލަންޑެވެ. މިލަނޑު ޕޮލަންޑަށް ކާމިޔާބުކޮށްދިނީ ކެޕްޓަން ރޮބާޓް ލެވަންޑޯސްކީއެވެ. ފުރަތަމަ ހާފް ނިމުމުގެ ކުރިން ޕޯޗްގަލްއަށް ނަތީޖާ ހަމަހަމަކޮށްދިނީ ޒުވާން ކުޅުންތެރިޔާ ރެނާޓޯ ސަންޗޭޒްއެވެ. މެޗްގެ މޮޅު ކުޅުންތެރިއަކަށް ހޮވުނީވެސް އޭނާއެވެ.
ޕެނަލްޓީގައި ޕޯޗްގަލްގެ ހުރިހާ ޕެނަލްޓީއެއް ކާމިޔާބުކުރިއިރު، ޕޮލަންޑްގެ ޖާކޫބް ބްލެކޯސްކީ ޖެހި ޕެނަލްޓީ ޕޯޗްގަލް ކީޕަރ ވަނީ ދިފާޢުކޮށްފައެވެ. ޕޯޗްގަލް މެޗުން މޮޅުވި ޕެނަލްޓީ ޖެހީ ރިކާޑޯ ގުއަރެސްމާއެވެ. ސެމީފައިނަލުން ޕޯޗްގަލް ޖާގަ ހޯދިއިރު، މިފަހަރުގެ ޔޫރޯގައި ފުރިހަމަ ވަގުތުގައި ޕޯޗްގަލްއަށް މޮޅެއް ހޯދިފައެއް ނުވެއެވެ. ގްރޫޕް ސްޓޭޖްގައި ކުޅުނު ފުރަތަމަ ތިންމެޗް އެއްވަރުވީއިރު، ދެވަނަ ބުރުގެ މެޗް ކާމިޔާބުކުރީ އިތުރު ވަގުތުގައި ޖެހި ގޯލުންނެވެ.
ސެމީ ފައިނަލްގައި ޕޯޗްގަލް ވާދަކުރަން ޖެހޭނީ ބެލްޖިއަމްއާ ވޭލްސް ވާދަކުރާ މެޗުން މޮޅުވާ ޓީމަކާއެވެ.