ރާއްޖޭގެ އެންމެ މެންބަރުން ގިނަ ޕާޓީއަކަށް ޕީއެންސީ

ރާއްޖޭގައި އެންމެ މެންބަރުން ގިނަ ސިޔާސީ ޕާޓީއަކަށް ޕީއެންސީ ވެފައިވާ ކަމަށް އިލެކްޝަންސް ކޮމިޝަންގެ ހިސާބުތަކުން ދައްކައިފިއެވެ.

އިލެކްޝަންސް ކޮމިޝަނުން ވަނީ މިދިޔަ އަހަރުގެ ނިޔަލަށް އެކޮމިޝަނުގެ ސިޔާސީ ޕާޓީތަކުގެ ދަފްތަރުގައި ހިމެނޭ މީހުންގެ މައުލޫމާތު އާންމުކުރައްވާފައެވެ. އެމައުލޫމާތުތަކުން ދައްކާގޮތުގައި ރާއްޖޭގައި ސިޔާސީ ޕާޓީތަކުގެ ދަފްތަރުގައި ޖުމްލަ 173،747 މެންބަރުން ވަނީ ރަޖިސްޓްރީވެފައެވެ.

ހިސާބުތަކުން ދައްކާގޮތުގައި މިވަގުތު ރާއްޖޭގައި އެންމެ މެންބަރުން ގިނަ ސިޔާސީ ޕާޓީއަކީ ވެރިކަން ކުރާ ޕީޕަލްސް ނޭޝަނަލް ކޮންގްރެސް، ޕީއެންސީއެވެ. އެ ޕާޓީގެ ދަފްތަރުގައި 68،968 މެންބަރުން ވަނީ ރަޖިސްޓްރީކޮށްފައެވެ.

ދެވަނައަށް އެންމެ މެންބަރުން ގިނަ ޕާޓީއަކީ އިދިކޮޅު މޯލްޑިވިއަން ޑިމޮކްރެޓިކް ޕާޓީ، އެމްޑީޕީއެވެ. އެ ޕާޓީގެ ދަފްތަރުގައި ތިބީ 43،755 މެންބަރުންނެވެ. އެމްޑީޕީއަކީ މީގެ ކުރިން ރާއްޖޭގައި އެންމެ ގިނަ މެންބަރުން ދަފްތަރުގައި ރަޖިސްޓްރީކޮށްފައިވާ ޕާޓީއެވެ.

އިލެކްޝަންސް ކޮމިޝަނުން އާންމުކޮށްފައިވާ ހިސާބުތަކުން ދައްކާގޮތުގައި ޕީއެންސީ އާއި އެމްޑީޕީ ފިޔަވައި 10،000 މެންބަރުން ހަމަވަނީ ޖުމްހޫރީ ޕާޓީ އާއި ޕީޕީއެމްގެއެވެ. ޖުމްހޫރީ ޕާޓީގެ ދަފްތަރުގައި 13،826 މެންބަރުން ތިބިއިރު ޕީޕީއެމްގެ ދަފްތަރުގައި 12،174 މެންބަރުން އެބަތިއްބެވެ.

އެހެނިހެން ސިޔާސީ ޕާޓީތަކުގެ މެންބަރުންގެ އަދަދުތައް:

* އަދާލަތު ޕާޓީ: 9،049 މެންބަރުން
* މޯލްޑިވްސް ޑިވެލޮޕްމަންޓް އެލަޔަންސް، އެމްޑީއޭ: 9،210 މެންބަރުން
* މޯލްޑިވްސް ނެޝަނަލް ޕާޓީ، އެމްއެންޕީ: 6،050 މެންބަރުން
* ދަ ޑިމޮކްރެޓްސް: 3،667 މެންބަރުން
* މޯލްޑިވްސް ތަރޑްވޭ ޑިމޮކްރެޓްސް، އެމްޓީޑީ: 2،359 މެންބަރުން
* ޕީޕަލްސް ނޭޝަނަލް ފްރަންޓް، ޕީއެންއެފް: 2،822

އިލެކްޝަންސް ކޮމިޝަންގެ ހިސާބުތަކުން ދައްކާގޮތުގައި އެންމެ މެންބަރުން މަދު ޕާޓީއަކީ މިހާރު އުވާލުމަށް އެކޮމިޝަނުން ނިންމާފައިވާ މޯލްޑިވްސް ރިފޯމް މޫވްމަންޓް، އެމްއާރުއެމްއެވެ. އެ ޕާޓީގެ ދަފްތަރުގައި ތިބީ 1،867 މެންބަރުންނެވެ.