ތޫނު އެއްޗަކުން މީހަކަށް ހަމަލާދިންކަމުގެ ތުހުމަތުގައި ދެ މީހަކު ހައްޔަރުކޮށްފި

މާލޭގައި ސައިކަލެއްގައި ދިޔަ މީހަކަށް ތޫނު އެއްޗަކުން ހަމަލާދިންކަމުގެ ތުހުމަތުގައި ދެ މީހަކު ހައްޔަރުކޮށްފިއެވެ.

ފުލުހުން ވިދާޅުވީ މި ހާދިސާ ހިނގާފައިވަނީ މި މަހުގެ 15ވަނަ ދުވަހު ކަމަށެވެ. އެ ދުވަހުގެ ހެނދުނު 8:17 ހާއިރު ރަތްވިލާ މަގުން ދުއްވާފައިދިޔަ ސައިކަލެއްގައި އިން މީހަކަށް ބަޔަކު ތޫނު އެއްޗަކުން ހަމަލާދީ ޒަހަމްކޮށްލާފައިވާ މައްސަލައެއް ފުލުހުންގެ ގޭންގް ކްރައިމް އިންވެސްޓިގޭޝަނުން ތަހުގީގުކުރައްވަމުންދާކަމަށް ފުލުހުން ވިދާޅުވިއެވެ.

މި މައްސަލައިގައި ހަމަލާދިންކަމުގެ ތުހުމަތުގައި ފުލުހުން ހައްޔަރުކޮށްފައިވަނީ ހ. ރޯޒެންޑޭލް އުމުރުން 29 އަހަރުގެ ޞަފްވާން ޒުފްރަތާއި ށ. ފޭދޫ، އުދަރެސް، އުމުރުން 34 އަހަރުގެ ޢަލީ ނާޝިދުއެވެ. ފުލުހުން ވިދާޅުވީ ޞަފްވާން ހައްޔަރުކޮށްފައިވަނީ މި މަހުގެ 20ވަނަ ދުވަހުގެރޭ 21:19 ހާއިރު ކަމަށާއި ޢަލީ ނާޝިދު ހައްޔަރުކޮށްފައިވަނީ 21ވަނަ ދުވަހު 1:09ހާއިރު ކަމަށެވެ.

މި ދެމީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ކޯޓުން ވަނީ ދެ މީހުންގެވެސް ބަންދަށް 5 ދުވަހުގެ މުއްދަތެއް ދީފައެވެ.

މި މައްސަލައިގެ އިތުރުން ރޭ ހިންގި މާރާމާރީއެއްގެ މައްސަލަވެސް ފުލުހުންގެ ގޭންގް ކްރައިމް އިންވެސްޓިގޭޝަނުން އަންނަނީ ތަހުގީގުކުރައްވަމުންނެވެ. ރޭ 23:25ހާއިރު އަރިސް ފިހާރަ ކައިރިން މީހަކަށް ތޫނު އެއްވަކުން ހަމަލާދީ ޒަހަމްކޮށްލާފައިވާ މައްސަލަ ތަހުގީގުކުރައްވަމުންދާ ކަމަށް ފުލުހުން ވިދާޅުވެއެވެ.

މި މާރާމާރީގައި އަނިޔާ ލިބުނު މީހާއަށް ފަރުވާ ދިނުމަށްފަހު މިހާރު ދޫކޮށްލާފައިވާ ކަމަށާއި މި މައްސަލައާ ގުޅިގެން މިހާތަނަށް އެއްވެސް މީހަކު ހައްޔަރުކޮށްފައި ނުވާ ކަމަށްވެސް ފުލުހުން ވިދާޅުވެއެވެ.