ބްރޯޑްކާސްޓިންއަކީ އަމާނާތެއް، ދާއިރާއަށް ލޯ ހުޅުވިފައިވާ ޖީލެއް ބިނާކުރުން މުހިންމު: މެޑަމް ސާޖިދާ

ބްރޯޑްކާސްޓިންއަކީ އަމާނާތެއް ކަމަށާއި އެ ދާއިރާއަށް ލޯ ހުޅުވިފައިވާ ޖީލެއް ބިނާކުރުން މުހިންމުކަމަށް ރައީސުލްޖުމްހޫރިއްޔާގެ އަނބިކަނބަލުން، ސާޖިދާ މުޙައްމަދު ވިދާޅުވެއްޖެއެވެ. އެކަމަނާ މިހެން ވިދާޅުވީ ބްރޯޑްކާސްޓިން ދުވަހާ ގުޅިގެން ބްރޯޑްކާސްޓިން ކޮމިޝަނުން ކުރިއަށްގެންދިޔަ "ވިޝަން އޮފް ދަ ފިއުޗަރ" މުބާރާތުގެ ނަތީޖާ ފާޅުކުރުމުގެ ހަފްލާ ޝަރަފުވެރިކޮށްދެއްވައި ދެއްކެވި ވާހަކަފުޅުގައެވެ. އެކަމަނާ ވަނީ މި މުބާރާތުން އެކި ވަނައް ހާސިލުކުރި ކުދިންނަށް އިނާމް ހަވާލުކޮށްދެއްވާފައެވެ.

ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ވިދާޅުވީ ރާއްޖޭގެ ތާރީހުގައި ބްރޯޑްކާސްޓިން ޚިދުމަތަކީ ވަރަށް ފުރިހަމަ ޚިދުމަތެއްކަމަށާއި، އެއީ ފޫހިކަމާއި މާޔޫސްކަން ދުރަށްލައި، ހިތްތަކަށް އުފާވެރިކަން ގެނެސްދިން ޚިދުމަތެއް ކަމަށެވެ. އަދި ރައްޔިތުންނަށް ދީނުގެ މަތިވެރި އުސޫލުތަކާއި މަތިވެރި އަޚްލާގު އުނގަންނައިދީ އެކި ދާއިރާތަކުން މައުލޫމާތު ފޯރުކޮށްދޭ ޚިދުމަތެއް ކަމަށް އެކަމަނާ ވިދާޅުވިއެވެ.

ބްރޯޑްކާސްޓިން ޚިދުމަތަކީ ރަށްރަށް ގުޅުވައިދިން އަގުހުރި ޚިދުމަތެއްކަން ފާހަގަކުރައްވަމުން ރައީސުލްޖުމްހޫރިއްޔާގެ އަނބިކަނބަލުން ވިދާޅުވީ މީޑިއާގެ އެކި މަންސަތައް މިހާރު ހުރިއިރު އެފަދަ މަންސަތަކަށްވެސް ރޭޑިއޯ އަދި ޓީވީގެ ދައުރު އަދާނުކުރެވޭ ކަމަށެވެ. އެހެންކަމުން، މި ދެ ޚިދުމަތަކީ ކުރީ ޒަމާނާއި މި ޒަމާނުގެވެސް އެއްޗެއްކަމަށާއި އެ ދާއިރާގެ މުހިންމުކަން އެނގޭ ޖީލެއް ބިނާ ކުރުމަކީ ކޮންމެހެން މުހިންމު ކަމެއްކަމަށް މެޑަމް ސާޖިދާ ވިދާޅުވިއެވެ.

"ދިވެހި ކުޑަކުދިން އަލުން އަޅުގަނޑުމެން ޓީވީ އަދި ރޭޑިއޯގެ ބައިވެރިން ކަމަށް ހެދުމަކީ ވަރަށް މުހިންމު ކަމެއް. އަދި ޤައުމެއްގެ ނިސްބަތުގައި ޓީވީ އަދި ރޭޑިއޯ އަދާކުރާ ދައުރު ފަހުގެ ޖީލުތަކަށް އެނގި، ވިސްނިފައިވުމަކީ އެހާމެ ބޭނުންތެރިކަމެއް. އެވިސްނުމާއި، އެ ފިކުރާއި އެކަމުގެ ޢިލްމު ކުޑަކުދިންނަށް ފޯރައި މިކަމަށް ފަރިތަ ޒުވާނުން ބިނާވުމަކީ މާދަމާއަށްޓަކައި ކުރެވޭ އުންމީދު. ސަބަބަކީ ބްރޯޑްކާސްޓިންއަކީވެސް އަމާނާތެއް. ވަރަށް ބޮޑު ޤައުމީ އަމާނާތެއް. ޤައުމުގެ މަސްލަހަތު ދިފާއުކުރުން ދީނާއި އަޚްލާގާއި މަސައްކަތްތެރިކަމަށް ހިތްވަރުދިނުން. ޓީވީ އަދި ރޭޑިއޯގެ އެންމެ މުހިންމު ބޭނުމަކީވެސް މިއީ" ރައީސުލްޖުމްހޫރިއްޔާގެ އަނބިކަނބަލުން ވިދާޅުވިއެވެ.

މެޑަމް ސާޖިދާ ވިދާޅުވީ ބްރޯޑްކޮމްއިން ކުރިއަށްގެންދިޔަ މުބާރާތަކީ އައު ޖީލެއް ބްރޯޑްކާސްޓިން ދާއިރާއަށް ޝައުގުވެރިކުރުވުމަށް ކުރިއަށްގެންދިޔަ މުހިންމު ހަރަކާތެއް ކަމަށާއި، މި ދާއިރާ ކުރިއަށްއޮތްތަނުގައިވެސް އިތުރަށް ފުޅާވެގެން ދިއުމަށް އެދިވަޑައިގަންނަވާކަމަށެވެ.

ބްރޯޑްކޮމްގެ "ވިޝަން އޮފް ދަ ފިއުޗަރ" މުބާރާތަކީ 3 އުމުރުފުރައަކަށް ބަހާލައިގެން ކުރިއަށްގެންދިޔަ ކުރެހުމުގެ މުބާރާތެކެވެ. މި މުބާރާތުގައި ކޮންމެ އުމުރުފުރައަކުން ތިން ވަނަ ވަނީ ހޮވާފައެވެ.