ޕާކިސްތާނުގައި އަންނަ މަހު ފަށާ ޗެމްޕިއަންސް ޓްރޮފީ ކްރިކެޓް މުބާރާތުގެ ކުރިން އެ މުބާރާތައް ތައްޔާރުވާން ތިން ގައުމުގެ މުބާރާތެއް ރާވާއިފި އެވެ.
އަންނަ މަހުގެ 8 އިން 14 އަށް ލީގު ފޯމެޓަށް ކުޅޭ މުބާރާތުގައި ބައިވެރިވަނީ ޕާކިސްތާނާއި ނިއުޒީލޭންޑާއި ދެކުނު އެފްރިކާ އެވެ.
މުބާރާތުގެ ފުރަތަމަ ދެ މެޗު ކުޅެން ހަމަޖައްސާފައިވަނީ ޗެމްޕިއަންސް ޓްރޮފީ އަށް ވަރަށް ބޮޑަށް މަރާމާތުކޮށް ޒަމާނީކޮށްފައިވާ ލާހޯރުގެ މަޝްހޫރު ގައްދާފީ ސްޓޭޑިއަމުގަ އެވެ. މުބާރާތުގެ ފަހު މެޗާއި ފައިނަލް މެޗު ކުޅެން ނިންމާފައިވަނީ ކަރާޗީގެ ނެޝަނަލް ސްޓޭޑިއަމުގަ އެވެ. ޖުމުލަ ހަތަރު މެޗު ކުޅޭ މުބާރާތުގެ މެޗުތައް ރޭގަނޑާއި ދުވާލު ވެސް ކުޅޭ ގޮތަށް ވަނީ ހަމަޖައްސައިފަ އެވެ.
ޕާކިސްތާނުން ބުނީ މިއީ މުބާރާތަށް ރަނގަޅަށް ތައްޔާރުވުމުގެ މަގްސަދުގައި ބާއްވާ ކުރު މުބާރާތެއް ކަމަށެވެ. އަދި މި ފަހަރުގެ މުބާރާތަކީ 1996ގެ ވޯލްޑްކަޕުގެ ފަހުން ޕާކިސްތާނުގައި ބާއްވާ ފުރަތަމަ ބައިނަލް އަގްވާމީ ބޮޑު މުބާރާތަށް ވުމުން މިއީ ޗެމްޕިއަންސް ޓްރޮފީގެ ކުރިން އެހެން ގައުމުތަކަށް ޕާކިސްތާނުގެ ދަނޑުތައް ޓެސްޓްކޮށްލަން ވެސް ލިބޭނެ ރަނގަޅު ފުރުސަތަކަށް ވެސް ވާނެ ކަމަށެވެ.
ގައްދާފީ ސްޓޭޑިއަމުގައި ވަނީ މުޅިން އަލަށް 5000 ގޮނޑި ޖަހައިފަ އެވެ. ދަނޑުގެ ލައިޓިން ސިސްޓަމް އެއްކޮށް ލެޑަށް ބަދަލުކޮށް ރޭގަނޑު ކުޅެވޭ ފެންވަރަށް ވަނީ ގެނެސްފަ އެވެ. އަދި ފަނޑުގަ ވަށައިގެންވާ ފެންސް ނައްޓާލައި ސްޓޭޑިއަމުގެ ވައިއައިޕީ ޒޯނާއި ކުޅުންތެރިންގެ ޓަނަލް އާއި އޮފީސް އިމާރާތް ވެސް ވަނީ ވަރަށް ބޮޑަށް އައުކޮށްފަ އެވެ.
ޗެމްޕިއަންސް ޓްރޮފީ ޕާކިސްތާނުގައި ބޭއްވި ނަމަވެސް އިންޑިޔާގެ މެޗުތައް ކުޅޭނީ ޑުބާއީގަ އެވެ. އެއީ ސިޔާސީ ސަބަބަކަށްޓަކައި ޕާކިސްތާނަށް އިންޑިޔާގެ ޓީމު ނުފޮނުވަން ނިއުދިއްލީން ނިންމުމުންނެވެ.