މަސްވެރިންނަށް ދޫކުރި ފައިސާ އިތުރު، ފަތުރުވެރިން އައި ޢަދަދުވެސް މައްޗަށް

ރާއްޖޭގެ އިޤްތިޞާދުގެ މައިގަނޑު ދެ ސިނާއަތްކަމަށްވާ މަސްވެރިކަމާއި ފަތުރުވެރިކަމަށްވެސް މިދިޔަ ހަފްތާގައި ކުރިއެރުން ލިބިއްޖެއެވެ. ޚާއްޞަކޮށް މަސްވެރިންނަށް ދޫކުރި ފައިސާއާއި ފަތުރުވެރިން ރާއްޖެ އައި އަދަދުވެސް ވަނީ އިތުރުވެފައެވެ.

ފަތުރުވެރިކަމާއި ބެހޭ ވުޒާރާގެ ތަފާސްހިސާބުތައް ދައްކާގޮތުން މިދިޔަ ހަފްތާގައި ރާއްޖެއައި ފަތުރުވެރިންގެ އަދަދު ވަނީ އޭގެ ކުރީ ހަފްތާއާއި އަޅާބަލާއިރު އިތުރުވެފައެވެ. މިދިޔަ ހަފްތާގައި ރާއްޖެއަށް ޒިޔާރަތްކޮށްފައިވަނީ 51،891 ފަތުރުވެރިންނެވެ. އޭގެ ކުރީ ހަފްތާގައި ރާއްޖެ އައިސްފައިވަނީ 47،979 ފަތުރުވެރިންނެވެ. އެހެންކަމުން މިއީ %8.2 އިތުރުވުމެކެވެ.

ފަތުރުވެރިކަމާއި ބެހޭ ވުޒާރާގެ ތަފާސްހިސާބުތައް ދައްކާގޮތުން ޖަނަވަރީ 25 ވަނަ ދުވަހުގެ ނިޔަލަށް ރާއްޖެއަށް 169،423 ފަތުރުވެރިން ވަނީ ޒިޔާރަތްކޮށްފައެވެ.

އެންމެ ގިނައިން ފަތުރުވެރިން އައި 5 ޤައުމު:

* ޗައިނާ: 23،186 ފަތުރުވެރިން
* ރަޝިއާ: 18،651 ފަތުރުވެރިން
* އިޓަލީވިލާތް: 16،614 ފަތުރުވެރިން
* އިނގިރޭސިވިލާތް: 15،030 ފަތުރުވެރިން
* ޖަރުމަނުވިލާތް: 9،931 ފަތުރުވެރިން

މަސްވެރިކަމުގެ ސިނާއަތައް ބަލާލާއިރުވެސް މިދިޔަ ހަފްތާގައި އޮޑިވެރިންނަށް ދޫކުރި ފައިސާގެ އަދަދު އޭގެ ކުރީ ހަފްތާއާއި އަޅާބަލާއިރު ވަނީ އިތުރުވެފައެވެ. މިފްކޯގެ ތަފާސްހިސާބުތައް ދައްކާގޮތުން މިދިޔަ ހަފްތާގައި 26.8 މިލިޔަން ރުފިޔާ ވަނީ އޮޑިވެރިންނަށް ދޫކޮށްފައެވެ. އެއީ 450 ދޯންޏަކުން ކިރުވާފައިވާ 2147 މެޓްރިކް ޓަނަށްވާ ފައިސާއެވެ. އޭގެ ކުރީ ހަފްތާގައި މިފްކޯއަށް ކިރުވާފައިވާ މަހަށް ދޫކޮށްފައިވަނީ 19 މިލިޔަން ރުފިޔާއެވެ.

މިފްކޯއިން މިހާރު ދަނީ ކިރުވާ މަހަށް 48 ގަޑިއިރުގެ ތެރޭގައި ފައިސާ ދޫކުރަމުންނެވެ. މިއީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ރިޔާސީ ވައުދެކެވެ.