އެސޯސިއޭޝަނެއްގެ ދަށުން ރާއްޖޭގެ ތާރީޚުގައި ފުރަތަމަ ފަހަރަށް ބޭއްވި އަދި ރާއްޖެއަށް މުޅިން އައު ކުޅިވަރެއް ކަމަށްވާ އަލްޓިމޭޓް ފްރިސްބީ ޓޯނަމަންޓްގެ ޗެމްޕިއަންކަން 'ފަޔާ ނޭޝަންސް' ޓީމުން ހޯދައިފިއެވެ.
އަލްޓިމޭޓް ފްރިސްބީ 5 ވީ 5 މިނީ ޓޯނަމަންޓުގެ ނަމުގައި ކުރިޔަށް ގެންދިޔަ މި މުބާރާތަކީ އެންމެ ރެއަކު މެޗުތަށް ކުޅެ ނިންމާލައިގެން ބޭއްވި މުބާރާތެކެވެ. މި މުބާރާތުގެ ފައިނަލްގައި ވާދަކުރީ ތަންޑާސްޓޯމްސް އާއި ފަޔާ ނޭޝަން އެވެ. ފަޔާ ނޭޝަންއިން އެ މެޗު ކާމިޔާބުކޮށް މުބާރާތުގެ ޗެމްޕިއަންކަން ހޯދީ 9-10 ގެ ނަތީޖާއަކުންނެވެ.
ޖެނުއަރީ 24 ވަނަ ދުވަހުގެ ރޭ 8:00 އިން 23:00 އާއި ހަމައަށް ކުރިޔަށް ގެންދިޔަ މި މުބާރާތުގައި 12 މެޗު ކުޅުނެވެ. އޭގެ ތެރޭގައި ހިމެނެނީ ގުރޫޕް ސްޓޭޖްގެ 9 މެޗާއި ސެމީ ފައިނަލްގެ ދެ މެޗާއި ފައިނަލް މެޗެވެ. ޓީމެއްގައި ފަސް ކުޅުންތެރިން އަދި ރިޒާވް އެއް ކުޅުންތެރިން ހިމެނޭހެން ހަތް ޓީމަކުން މުބާރާތުގައި ބައިވެރިވިއެވެ.
މި މުބާރާތުގައި ބައިވެރިވި ޓީމުތަކަކީ ޑޯޑޯ، ތަންޑާ ސްޓޯމްސް، ފަޔާ ނޭޝަން، ޑިސްކް-އޯ، ޓީބީޑީ، ޔޫއެފްއޯ، އަދި ފްރިސްބީޒް އެވެ. އަލްޓިމޭޓް ފްރިސްބީ އެސޯސިއޭޝަނަކީ ދިވެހިރާއްޖެއަށް އަލްޓިމޭޓް ފްރިސްބީ ތައާރަފު ކުރުމުގެ ގޮތުން އުފެދިގެން އައި ޖަމިއްޔާއެކެވެ.
ސެޕްޓެމްބަރު 2024 ގައި ރަސްމީގޮތުން އެސޯސިއޭޝަން ރެޖިސްޓަރކުރީވެސް ފޯރިގަދަ އެކުވެރި މެޗަކާއެކުގައެވެ. ޒުވާނުން އިސްނަގައިގެން ހިންގާ އެ ޖަމްއިއްޔާގައި މަދު ދުވަސްކޮޅެއްގެ ތެރޭގައި 50 އަށްވުރެ ގިނަ މީހުން ރަޖިސްޓްރީވެފައިވާއިރު ޖަމްއިއްޔާއާއި އެކު ހަރަކާތްތެރިވާ 200 އަށްވުރެ ގިނަ ކުޅުންތެރިން ހިމެނޭ ކަމަށް އެ ޖަމްއިއްޔާއިން ބުނެއެވެ.
މި އެސޯސިއޭޝަންގެ ހަރަކާތްތައް މާލެ ސަރަހައްދުގެ އިތުރުން ފުވައްމުލަކުގައިވެސް ކުރިޔަށް ގެންދެއެވެ. އަލްޓިމޭޓް ފްރިސްބީ އެސޯސިއޭޝަނުގެ އަމާޒަކީ ރާއްޖޭގެ އެކި ކަންކޮޅުތަކަށް މި އައު ކުޅިވަރު ތައާރަފްކޮށް ކުޅިވަރާއި ދުޅަހެޔޮދިރިއުޅުމަކަށް ލޯބިކުރާ ސަގާފަތެއް ދެމެހެއްޓުން ކަމަށް އެ އެސޯސިއޭޝަނުން ބުނެއެވެ.
މި އަހަރުގެ ތެރޭގައި ތަފާތު އެކި މުބާރާތްތަކާއި ހަރަކާތްތައް ހިންގުމަށް އެ އެސޯސިއޭޝަނުން ރާވާފައިވާ ކަމަށާއި، ރާއްޖޭގެ އަލްޓިމޭޓް ފްރިސްބީ ކުޅުންތެރިން ބައިނަލްއަގްވާމީ މުބާރާތްތަކުގައި ވާދަކުރެވޭނެ ފެންވަރަށް ތަމްރީނު ކުރުމަކީ އެ އެސޯސިއޭޝަންގެ ވަރަށް ބޮޑު އުންމީދެއްކަމަށްވެސް އަލްޓިމޭޓް ފްރިސްބީ އެސޯސިއޭޝަނުން ބުނެއެވެ.