ރިސޯޓުތަކަށް ބީއެމްއެލް މެދުވެރިކޮށް ޑޮލަރު މާރުކުރަން ޚާއްޞަ ޕްލެޓްފޯމެއް

ބޭރު ފައިސާއާބެހޭ ޤާނޫނު އަދި އޭގެ ދަށުން ޢަމަލުކުރަމުންދާ ޤަވާއިދުގެ ދަށުން ފަތުރުވެރިކަމުގެ ސިނާޢަތުގެ ވިޔަފާރިތަކުން ބީއެމްއެލްގެ އިންޓަނެޓް ބޭންކިން ޚިދުމަތް މެދުވެރިކޮށް ބޭންކަށް ޑޮލަރު މާރުކުރެވޭ ގޮތް ހަދައިފިއެވެ.

މިކަމާއި ގުޅޭގޮތުން ބީއެމްއެލްއިން ވިދާޅުވީ، ރިސޯޓު، ހޮޓެލް، ގެސްޓްހައުސް އަދި ފަތުރުވެރިކަމުގެ ދާއިރާއާ ގުޅުންހުރި އެހެނިހެން ވިޔަފާރިތަކުން ބޭރު ފައިސާ މާރުކުރުމަށް އެކުލަވާލައިފައިވާ ގާނޫނާއި ގަވައިދާ އެއްގޮތަށް ފަސޭހައިން ބޭރު ފައިސާ މާރުކުރެވޭ ގޮތަށް މިހާރު ހަމަޖައްސާފައިވާ ކަމަށެވެ. އެގޮތުން އެ ވިޔަފާރިތަކަށް މިހާރު ބީއެމްއެލް އިންޓަނެޓް ބޭންކިން ޕްލެޓްފޯމް މެދުވެރިކޮށް މިކަން ކުރެވޭ ކަމަށް އެ ބޭންކުން ވިދާޅުވެއެވެ.

މި ޕްލެޓްފޯމްގެ ޒަރީއާއިން ވިޔަފާރިތަކަށް ގާނޫނާއި ގަވައިދުގެ ދަށުން މާރުކުރުމަށް ކުރަންޖެހޭ ހުރިހާ މުއާމަލާތެއް ފަސޭހަކަމާއެކު ބަލާލެވޭނެއެވެ. އަދި މާރުކުރަމުންދާ އަދަދުތައް ބަލައި ރިވިއުކޮށް އެކްޓިވިޓީ ރިޕޯޓު ބެލޭނެ ކަމަށް ބީއެމްއެލްއިން ވިދާޅުވެއެވެ. މި ޕްލެޓްފޯމު މެދުވެރިކޮށް ބޭންކަށް ޑޮލަރު މާރުކުރާނީ 15.42 ރުފިޔާ އަށެވެ. މިއީ ރާއްޖޭގައި ބޭންކުތަކުން ޑޮލަރު ގަނެ ވިއްކާ ރޭޓެވެ.

މި އޮންލައިން ޕްލެޓްފޯމް ގާއިމުކުރުމުގެ މަގުސަދަކީ ފަތުރުވެރިކަމުގެ ދާއިރާގެ ވިޔަފާރިތަކަށް ލާޒިމްކޮށްފައިވާ ބޭރު ފައިސާ މާރުކުރުމަށް މަގުފަހިކޮށްދީ، ވީހާވެސް ފަސޭހަކަމާއެކު މި ހިދުމަތް ލިބޭނެ ގޮތް ހެދުންކަމަށް ބީއެމްއެލްއިން ވިދާޅުވެއެވެ.

ބޭރުފައިސާއާއި ބެހޭ ޤާނޫނުގެ ދަށުން ފަތުރުވެރިކަމުގެ ދައިރާގެ ވިޔަފާރިތައް ދެ ގިންތިއަކަށް ބަހާލައި، އެއިން ކޮންމެ ތަނަކަށް އަންނަ ފަތުރުވެރިއަކަށް، ބޮލަކަށް ޖެހޭ ނިސްބަތުން ވަކިވަރެއް ރާއްޖޭގެ ހިންގާ ބޭންކުތަކަށް މާރުކުރުމަށް އެ ވިޔަފާރިތަކަށް ލާޒިމްކުރެއެވެ.

ބޭރުފައިސާގެ ޤާނޫނުގެ ދަށުން ފަތުރުވެރިކަމުގެ ދައިރާގެ ވިޔަފާރިތައް ދެ ގިންތިއަކަށް ބަހާލައި، އެއިން ކޮންމެ ތަނަކަށް އަންނަ ފަތުރުވެރިއަކަށް، ބޮލަކަށް ޖެހޭ ނިސްބަތުން ވަކިވަރެއް ރާއްޖޭގެ ހިންގާ ބޭންކުތަކަށް މާރުކުރުމަށް އެ ވިޔަފާރިތަކަށް ލާޒިމްކުރެއެވެ.

އެގޮތުން ރިސޯޓުތަކުން އަންނަ ކޮންމެ ފަތުރުވެރިއަކަށް ބޮލަކަށް 500 ޑޮލަރު މާރުކުރަން ޖެހޭއިރު، ގެސްޓް ހައުސްތަކުން މާރުކުރަން ޖެހޭނީ ކޮންމެ ފަތުރުވެރިއަކަށް 25 ޑޮލަރެވެ. އެނޫނުންނަމަ މި ދެ ގިންތީގައިވެސް ހިމެނޭ ވިޔަފާރިތަކުން އެ މީލާދީ މަހެއްގެ ތެރޭ ބޭރުފައި ފައިސާގެ އާމްދަނީ 20 އިންސައްތަ މާރުކުރުމުގެ ފުރުސަތު ޤާނޫނުން ވަނީ ފަހިކޮށްދީފައެވެ.

މި ޤާނޫނު ތަންފީޒު ކުރަން ފެށުމާއިއެކު ފަތުރުވެރިކަމުގެ ވިޔަފާރިތަކަށް، ބޭންކުތަކަށް ބޭރުފައިސާ މަރުކުރުމަށް ތިން މަހުގެ މުއްދަތެއް ލިބެއެވެ. އެގޮތުން މިމަހުގެ 28 ވަނަ ދުވަހަކީ އޮކްޓޯބަރ މަހު އައި ފަތުވެރިންނަށް ވާ އަދަދު ބޭންކަށް މާރުކުރަން ޖެހޭ އެންމެ ފަހު ދުވަހެވެ.

އެމްއެމްއޭއިން ދާދި ފަހުން ލަފާކޮށްފައިވާގޮތުގައި ބޭންކުތަކަށް، ބޭރުފައިސާ މަރުކުރަން ފަށާއިރު، މަދުވެގެން 40 މިލިޔަން ޑޮލަރު ބޭންކިން ނިޒާމުގެ ތެރެއަށް ވަންނާނެއެވެ.