މުރައިދޫގެ ތަރައްޤީއަށް ބޭނުންވާ ކަންކަމާ ގުޅޭގޮތުން ރައީސުލްޖުމްހޫރިއްޔާ މަޝްވަރާކުރައްވައިފި

މުރައިދޫގެ ތަރައްޤީއަށް ބޭނުންވާ ކަންކަމާ ގުޅޭގޮތުން ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، މަޝްވަރާކުރައްވައިފިއެވެ.

މިމަޝްވަރާތައް ކުރެއްވީ ރައީސުލްޖުމްހޫރިއްޔާ މުރައިދޫ ކައުންސިލާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީއާއި މުއައްސަސާތަކުގެ އިސްވެރިންނާ ބައްދަލުކުރައްވައެވެ. މި ބައްދަލުކުރެއްވުން އޮތީ މިއަދު ހެނދުނު މުރައިދޫ ސްކޫލުގައެވެ.

މި ބައްދަލުކުރެއްވުމުގައި މުރައިދޫ ކައުންސިލުން ވަނީ، ރަށުގެ ގިރާ ސަރަޙައްދުގެ މައްސަލައާއި، ނެރާއި ބޭރުތޮށްޓާއި ބަނދަރުގެ މައްސަލައިގެ ސަބަބުން ލަފާފުރުމަށް ދިމާވެފައިވާ މައްސަލައަށް އެދެވޭ ހައްލެއް ހޯދުމަށާއި، ރަށު ސްކޫލާއި ސިއްޙީ މަރުކަޒުގެ ތަރައްޤީއަށް ބޭނުންވާ ކަންތައްތައް ހިއްސާ ކުރައްވާފައެވެ. މީގެ އިތުރުން މުރައިދޫގެ މަގުތަކުގެ ހާލަތާއި، ކަރަންޓުގެ ހާލަތު ހިއްސާ ކުރައްވައި، ފުޓްސަލް ދަނޑެއް ބޭނުންވާކަން ކައުންސިލު މެންބަރުން ފާހަގަކުރެއްވިއެވެ.

ރައީސުލްޖުމްހޫރިއްޔާ ވަނީ މިބައްދަލުކުރެއްވުމުގައި ބައިވެރިވެވަޑައިގެންނެވި ވަޒީރުން މެދުވެރިކުރައްވައި ކައުންސިލުން ފާހަގަކުރެއްވި ކަންކަމުގެ އެންމެ ފަހުގެ މަޢުލޫމާތުތައް ހިއްސާކުރައްވާފައެވެ. ތަޢުލީމީ ދާއިރާގެ ތަރައްޤީއަށްޓަކައި ކައުންސިލާއި ސްކޫލާއި ތަޢުލީމީ ވުޒާރާ ގުޅިގެން ތަރައްޤީގެ ޕްލޭނެއް އެކުލަވާލައިގެން ރަށު ސްކޫލަށް ބޭނުންވާ ކަންކަން އެންމެ އިސްކަންދޭ ތަރުތީބަކުން ބަހާލައިގެން ކޮށް ނިންމުމަށާއި ސިއްޙީ މަރުކަޒަށް ބޭނުންވާ ކަންކަން ހައްލުކުރުމަށް މަސައްކަތް ކޮށްދެއްވުމަށް ރައީސުލްޖުމްހޫރިއްޔާ އިރުޝާދު ދެއްވިއެވެ.