ތަކަންދުއަކީ ތާރީޚާއި ސަގާފަތުގެ ޓޫރިޒަމް ކުރިއެރުވޭނެ ރަށެއް، އެކަމަށް އިސްކަންދޭނަން: ރައީސް

ހއ. ތަކަންދޫއަކީ ތާރީޚީ ބިނާތައް ހިމާޔަތްކޮށް، ތާރީޚާއި ސަގާތުގެ ދާއިރާއިން ޓޫރިޒަމް ކުރިއެރުވޭނެ ރަށެއްކަމަށާއި، އެހެންކަމުން އެރަށުގެ ތާރީޚާއި ސަގާފަތާއި ޤައުމިއްޔަތު ކުރިއަރުވަން ޚާއްޞަ ސަމާލުކަމެއް ދެއްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ތަކަންދޫ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.

ހއ. ތަކަންދޫއަކީ ތާރީޚީ ބިނާތަކެއް ހުރި ރަށެކެވެ. އެގޮތުން އެންމެ ފާހަގަކޮށްލެވޭ އެއް ބިނާއަކީ އުތީމު އަލިތަކުރުފާނުގެ ޒިޔާރަތެވެ. އަދި އެރަށުގައި ހިރިގަލުގެ ގަބުރަސްތާނެއްވެސް އޮވެއެވެ. އަދި އިހުގެ ވެވުވެސް ތަކަންދޫގައި ހުރެއެވެ.

ހއ. ތަކަންދޫއަށް ވަޑައިގެން ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، ތަކަންދޫއަކީ ތާރީޚީ ގިނަ ބިނާތަކެއް ހުރި ރަށެއްކަމާއި، ޤައުމިއްޔަތު ކުރިއެރުވުމުގައިވެސް މުހިންމު ރަށެއްކަމަށެވެ. ޤައުމީ ދުވަސް ނިސްބަތްވެވަޑައިގަންނަވާ އުތީމު ތިންބެއިންނާ ގުޅުންހުރި ބައެއް ތާރީޚީ ބިނާތައް ތަކަންދޫގައި ހުރިކަން ފާހަގަކުރައްވަމުން ރައީސް ވަނީ ތަކަންދޫގެ ހިރިގަލުގެ ގަބުރަސްތާނަކީ ރާއްޖޭގެ އެފަދަ އެންމެ ބޮޑު ގަބުރަސްތާނަށްވުން އެކަށީގެންވާކަމަށް ވިދާޅުވެފައެވެ. އެފަދަ ތާރީޚީ ގިނަ ބިނާތަކެއް ހުރުމުން، ޤައުމީ ވިސްނުމުގައި ސަމާލުކަން ދޭންޖެހޭ ރަށަކަށް ތަކަންދޫ ކަނޑައަޅާފައިވާކަމަށް ރައީސް ވިދާޅުވިއެވެ.

ތަކަންދޫއަކީ ރަށުގައި މަދު ރައްޔިތެއް ދިރިއުޅުނުނަމަވެސް ތަރައްޤީއާއެކު ތާރީޚު ރައްކާކުރުމުގައިވެސް ޚާއްޞަ ސަމާލުކަން ދޭންޖެހޭ ރަށެއްކަން ފާހަގަކުރައްވާ ރައީސް ވިދާޅުވީ ޤައުމިއްޔަތު ފުޅާކުރުމުގެ މަސައްކަތާއި، ޤައުމީ ދުވަސް ފާހަގަކުރުމާއި، ޤައުމިއްޔަތު ރައްކާތެރިކުރުން ހިމެނޭހެން ޤައުމީ މަޝްރޫޢެއް އުތީމުގައި ހިންގަން އިއުލާންކޮށްފައިވާއިރު، އެކަން ކުރާނީ ތަކަންދޫވެސް ހިމެނޭގޮތަށްކަމަށެވެ.

"މި ތާރީޚީ ތަންތަނަށް ބަޖެޓުން ޚަރަދުކޮށް، ސަލާމަތްކޮށް، ހަގީގީ އައިޑެންޓިޓީ ހިމާޔަތްކޮށް، ކުރިއަށް އޮތް ޖީލަށް ރައްކާތެރިކޮށްދީ، ތާރީޚު ދިރާސާކުރާ ކުދިންނާ ރައްޔިތުންނަށް ނަފާ ލިބޭނެގޮތަށް ހިމާޔަތްކުރުމަކީ އަޅުގަނޑުގެ ސިޔާސަތެއް. އެހެންކަމުން ޤައުމީ މަޝްރޫޢުގައި މިރަށުގެ ތާރީޚީ ތަންތަން ރައްކާކުރުން ހިމެނޭ. ނަތީޖާއަކީ ދުރު ރާސްތާއަށް ރައްކާތެރިވާނެގޮތަށް ކުރުން. އޭގެ އިތުރަށް ވަރަށް މުހިންމު ސިޔާސަތެއް ޓޫރިޒަމް ފުޅާކުރުމުގެތެރެއިން ވިޒިޓަރ އިކޮނޮމީ ފުޅާކުރުން. ތާރީޚާއި ސަގާފަތަށް ލޯބިކުރާ ޓޫރިސްޓުން ދުނިޔޭގައި ވަރަށް ގިނަ. މިފަދަ ރަށްރަށުގެ މިތަންތަން ހިމާޔަތްކުރެވުނީމަ، އެތަންތަން ބަލައި އިންސްޕަރޭޝަން ހޯދަން ބޭނުންވާ ފަތުރުވެރިންނަށް ދެވޭ ފުރުޞަތަކަށްވާނެ. އެއާއެކު ލޯކަލް ފަތުރުވެރިކަން ފެށިއްޖެނަމަ ފީސިބަލްކަމަކަށްވާނެ. ސަރުކާރުން އިސްނަގައިގެން ކަންތައްތަކެއް ކޮށްދީފިނަމަ އެކަންވާނެ. ސަރުކާރުން އެކަން ކުރަން ވިސްނުންހުރީ". ރައީސުލްޖުމްހޫރިއްޔާ ވިދާޅުވިއެވެ.

ރައީސް ވިދާޅުވީ އެކަން ކުރުމަށް ރައްޔިތުންގެ އެއްބާރުލުން ލިބޭނެކަމަށް އުންމީދުކުރައްވާކަމަށާއި ޤައުމިއްޔަތު ކުރިއަރުވަން ތަކަންދޫއަށް އިސްކަންދެއްވާނެކަމަށެވެ.