ތަކަންދޫގެ ބަނދަރު ތަރައްޤީކޮށް ރޯދައިގެ ކުުރިން އާރްޓީއެލް ދަތުރުތައް ފަށަނީ

ތަކަންދޫގެ ބަނދަރު ތަރައްޤީކޮށް ރޯދައިގެ ކުރިން އާރްޓީއެލް ދަތުރުތައް ފެށޭނެގޮތް ހައްދަވައި ދެއްވާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިހެން ވިދާޅުވީ އެމަނިކުފާނު ތިލަދުންމަތީ އުތުރުބުރިއަށް ކުރައްވަމުން ގެންދަވާ ދަތުރުފުޅުގެތެރެއިން ތަކަންދޫއަށް ވަޑައިގެން އެރަށުގެ ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުންނެވެ.

ތަކަންދޫގެ ރައްޔިތުންނާ ބައްދަލުކުރައްވައި އެރަށުގެ ތަރައްޤީއާ ގުޅޭގޮތުން ވާހަކަފުޅުދައްކަވަމުން ރައީސުލްޖުމްހޫރިއްޔާ ވިދާޅުވީ އެމަނިކުފާނު އެރަށުގެ ވަޑައިގެންނެވި ހިސާބުންވެސް ރަށުގެ ބަނދަރުގެ ޖާގައިގެ މައްސަލަ ފާހަގަކުރެއްވުނު ކަމަށެވެ. ރައީސް ވިދާޅުވީ އެމަނިކުފާނު ރައްޔިތުން ގާތަށް ވަޑައިގަންނަވަނީވެސް ކަންކަން ގާތުން ބެއްލެވުމުގެ ބޭނުންފުޅުގައި ކަމަށެވެ. މިމޭރުމުން ވާހަކަފުޅުދައްކަވަމުން ރައީސުލްޖުމްހޫރިއްޔާ ވިދާޅުވީ ތަކަންދޫ ބަނދަރުގެ ޖާގައިގެ ދަތިކަން ހައްލުކުރުމުގެ ޢަމަލީ މަސައްކަތް އޭޕްރީލް މަހުގެތެރޭގައި ފަށްޓަވާނެކަމަށެވެ. އަދި އެމަސައްކަތްކުރިއަށް ގެންދަވާނީ ރަށްގިރުމުގެ މައްސަލައަށް ޙައްލު އަންނާނެގޮތަށް އަދި ރަށުގެ ގުދުރަތީ ރީތިކަންވެސް ނުގެއްލޭނެގޮތަށްކަމަށް ރައީސް ވިދާޅުވިއެވެ.

" މިރަށަށް ދޭން ބޭނުންވާ އެންމެ މުހިންމު މެސެޖަކީ ބަނދަރުގެ ޖާގައިގެ ދަތިކަން ހައްލުކޮށްދިނުމަށްޓަކައި ފަށަންޖެހި ނުފެށި އޮތް މަޝްރޫޢު އިރާދަކުރެއްވިއްޔާ ކުރިއަށް އޮތް ދެ ތިން މަސްތެރޭގައި ފެށޭނެ" ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ ތަކަންދޫގެ އަބާދީގެ ތެރެއިން ރާށުގައި ދިރިއުޅޭ އާބާދީ މަދުނަމަވެސް އެމަނިކުފާނުގެ ސިޔާސަތަކީ ހުރިހާ ރައްޔިތުންނަށްވެސް ހަމަގޮތެއްގައި ޚިދުމަތް ދެއްވުންކަމަށެވެ.

ތަކަންދޫގައި ދަތުރުފަތުރުކުރުމުގެ ޚިދުމަތަށް އަލިއަޅުއްވާލައްވަމުން ރައީސް ވިދާޅުވީ އަންނަ ރަމަޟާންމަހުގެ ކުރިން އާރުޓީއެލް ފެރީ ތަކަންދުއާއި މާރަންދޫއަށްވެސް ދަތުރުކުރާ ގޮތް ހައްދަވާދެއްވާނެކަމަށެވެ.

މީގެ އިތުރުން ތަކަންދޫ ސްކޫލަށް ވަސީލަތް ހޯދައިދިނުމާއި، ސިއްޙީ މަރުކަޒުގެ ޖާގަ އިތުރުކޮށް ވަސީލަތްތައް ހަމަކޮށްދެއްވާނެކަމުގެ ޔަޤީންކަންވެސް ރައީސް ދެއްވިއެވެ. އަދި ތަކަންދޫގެ ރައްޔިތުންނަށް ހުރި ދަތިތައް ހައްލުކޮށް، ރައްޔިތުންނަށް ހިތްފަސޭހަ ރަށަކަށް ތަކަންދޫ ހަދައިދެއްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.