އިހަވަންދޫ ފުޓްބޯޅަ ދަނޑު ތަރައްގީކުރުމުގެ އެއްބަސްވުމުގައި ސޮއިކޮށްފި
-
މި މަޝްރޫޢުގެ މަސައްކަތް ހަވާލުކޮށްފައިވަނީ އާރުޑީސީއާ
-
މިއަހަރުގެ ތެރޭގައި ޢަމަލީ މަސައްކަތް ފެށޭނެ
ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ރިޔާސީ ވައުދުފުޅުތަކުގެ ތެރޭގައި ހިމެނޭ ހއ.އިހަވަންދޫ ހުރަވީ ދަނޑު ޒަމާނީ ފެންވަރަށް ތަރައްގީކުރުމުގެ މަޝްރޫޢުގެ އެއްބަސްވުމުގައި ސޮއި ކުރައްވައިފިއެވެ.
ރޯޑް ޑިވެލޮޕްމަންޓު ކޯޕަރޭޝަން (އާރުޑީސީ)އާ ހަވާލުކޮށްގެން ކުރިއަށް ގެންދާ މި މަޝްރޫޢުގެ އެއްބަސްވުމުގައި ސޮއިކުރައްވާފައިވަނީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ހއ.އިހަވަންދޫގެ ރައްޔިތުންނާ ބައްދަލުކުރައްވުމަށް ބޭއްވެވި ޖަލްސާގައެވެ. މި އެއްބަސްވުމުގައި ސަރުކާރުގެ ފާރާތުން ސޮއިކުރެއްވީ ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢެވެ. އާރުޑީސީގެ ފަރާތުން ސޮއިކުރެއްވީ އެކުންފުނީގެ މެނޭޖިން ޑިރެކްޓަރ ބްރިގޭޑިއާ ޖެނެރަލް (ރިޓެޔަޑް) އަލީ ޒުހައިރެވެ.
މިއީ މިއަހަރުގެ ބަޖެޓުގައި ހިމަނައިގެން ކުރިޔަށްގެންދާ މަސައްކަތެކެވެ. މި ފުޓްބޯޅަ ދަނޑުގެ އަމަލީ މަސައްކަތް މިއަހަރުތެރޭގައި ކުރިޔަށްދާނެކަމަށް ކުޅިވަރާ ބެހޭ ވުޒާރާއިން މައުލޫމާތުދެއްވައެވެ.
ރައީސުލްޖުމްހޫރިއްޔާ މިހާރު ހއ.އޮތޮޅު ރަށްތަކަށް ކުރައްވަމުން ގެންދަވާ ދަތރުރުފުޅުގައި ވަނީ ރަށްރަށުގައި ކުޅިވަރު ވަސީލަތްތައް ގާއިމުކޮއްދެވުމަށް އެމަނިކުފާނު ވެވަޑައިގެންފައިވާ ވައުދުފުޅުތައް ފުއްދަވައިދެއްވާނެ ކަމުގެ ޔަޤީންކަން ދެއްވާފައެވެ.
އޭގެތެރޭގައި ފުޓްބޯޅަ، ފުޓްސެލް، ހޭންޑްބޯޅަ ދަނޑުތަކާއި ވޮލީބޯޅަ ކޯޓާއި ރަށްރަށުގެ ރެކްރިއޭޝަން ސެންޓަރުތައް ހިމެނެއެވެ.