ދައުރު ނިމުމުގެ ކުރިން މުރައިދޫ ފުޓްސެލް ދަނޑާއި ވޮލީކޯޓުގެ މަސައްކަތް ނިންމައިދޭނަން: ރައީސް
މިއަހަރު ހއ.މުރައިދޫ ފުޓްބޯޅަ ދަނޑު އެއްކޮށް ނިންމައިދެއްވުމަށްފަހު މި ދައުރު ނިމުމުގެކުރިން ފުޓްސެލް ދަނޑާއި ވޮލީކޯޓުގެ މަސައްކަތް ވެސް ނިންމަވައިދެއްވާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއުޒް ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ ހއ.އަތޮޅުތަކަށް ކުރައްވަމުން ގެންދަވާ ދަތުރުފުޅުގައި މުރައިދޫގެ ރައްޔިތުންނާ ބައްދަލުކުރައްވާ ވާހަކަފުޅުދައްކަވަމުންނެވެ.
ސަރަކާރުން މުރައިދޫގައި ތަރައްގީކުރުމަށް ހަމަޖެހިފަވަނީ ފުޓްބޯޅަ ދަނޑަކާއި ފުޓްސަލް ދަނޑަކާއި ވޮލީ ކޯޓެކެވެ. މުރައިދޫގެ އެންމެ ފުރަތަމަ ތަރައްގީ ކުރުމަށް ހަމަޖެހިފަވަނީ ބޮޑު ފުޓްބޯޅަ ދަނޑެކެވެ.
މިއީ ރައީސް ޑރ.މުޢިއްޒު ރިޔާސީ ކެމްޕޭނުގައި އެރަށަށް ވެވަޑައިގެންނެވި ވައުދުފުޅުތެރޭގެ ހިމެނޭ މުހިންމު އެއްކަމެވެ.
ސަރުކާރުން ވަނީ މަސައްކަތް ހުއްޓި، ކުރިއަށްނުގެންދެވި ހުރި މަސައްކަތްތައް އަލުން ފައްޓަވައި ދެ އަހަރުގެ ތެރޭގައި ނިންމަވާނެކަމަށް ވިދާޅުވެފައެވެ. މީގެ ކުރިންވެސް މިސަރުކާރުން ވަނީ ނުނިމިހުރި މިފަދަ މަސައްކަތްތައް އަލުން ފައްޓަވައި ނިންމަވާފައެވެ.