މޮޅަދޫގެ އާބާދީ ކުޑަނަމަވެސް އާބާދީ ބޮޑެތި ރަށްރަށާ އެއްވަރަށް ތަރައްޤީކޮށްދޭނަން: ރައީސް

ތިލަދުންމަތީ އުތުރުބުރީ މޮޅަދޫގެ އާބާދީ ކުޑަނަމަވެސް، އެންމެ ބޮޑެތި އާބާދީތަކާ އެއްވަރަށް ތަރައްްޤީކޮށްދޭނެކަމުގެ ޔަޤީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވައިފިއެވެ.. އެމަނިކުފާނު މި ޔަޤީންކަންދެއްވީ މޮޅަދޫގެ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ. މޮޅަދޫއަކީ 412 މީހުންގެ އާބާދީއެއް ދިރިއުޅެމުންދާ ރަށެކެވެ.

ހއ. މޮޅަދޫ ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ މޮޅަދޫގެ އާބާދި ކުޑަނަމަވެސް، އެންމެ ބޮޑު އާބާދީތަކުގެ ރައްޔިތުންނާ ހަމަހަމަކަމަށެވެ. އެ ރައްޔިތުންނަށްވެސް ހުރިހާ ހައްގުތަކާއި ޚިދުމަތްތައް މުހިންމުކަމަށް ވިދާޅުވަމުން ރައީސް ވަނީ މޮޅަދޫގެ ރައްޔިތުން އުންމީދުކުރާގޮތަށް ވަރަށް އިސްކަންދީގެން ބާރު ސްޕީޑުގައި ކަންކަން ކުރުމަކީ ސަރުކާރުގެ ސިޔާސަތުކަމަށް ހާމަކުރައްވާފައެވެ.

އެގޮތުން ރައްޔިތުން ބޭނުންވާގޮތަށް ކަންކަން ފުރިހަމަކޮށްދެއްވާނެކަމުގެ ޔަޤީންކަން ދެއްވަމުން ރައިސް ވަނީ މޮޅަދޫގައި ބައެއް މަޝްރޫޢުތައް ހުއްޓިފައި ހުރިކަން ފާހަގަކުރައްވާފައެވެ. އެގޮތުން އެންމެ މުހިންމު އެއް މަޝްރޫޢުއަކީ ފެނާއި ނަރުދަމާކަމަށާއި، އެއީ މިދިޔަ ސަރުކާރުން ވެފައިވާ އިހުމާލެއްގެ ގޮތުގައި ސިފަކުރައްވަމުން ރައީސް ވަނީ އެ މަޝްރޫޢު އަވަސްކޮށް ނިންމައިދެއްވާނެކަމުގެ ޔަޤީންކަން ދެއްވާފައެވެ.

މޮޅަދޫގައި ފެނާއި ނަރުދަމާ ނިޒާމު ޤާއިމްކުރުމުގެ މަސައްކަތް ފަށާފައިވަނީ 2021 ވަނަ އަހަރުއެވެ. ނަމަވެސް، އެ މަސައްކަތް މިހާތަނަށް އޮތީ މަޑުޖެހިފައެވެ. ރައީސް ވަނީ ހުއްޓިފައިވާ މަޝްރޫޢުތައް ކުރިއަށް ގެންދެވޭނެ ގޮތްތަކެއް ހޯދިފައިވާކަން ފާހަގަކުރައްވާފައެވެ.

"ހުއްޓިފައިމިއޮތް ފެނާ ނަރުދަމާ އަޅުގަނޑު މި ނިންމިގޮތަށް އަލުން ފަށައި، ތިބޭފުޅުންނަށް ބާރު ސްޕީޑުގައި ހިންގައި ނިންމާދޭނެކަމުގެ ޔަޤީންކަން ދެން. ހަމަމިއާއެކު މިރަށަކީ އިޤްތިޞާދީ ނަޒަރަކު ބިޔަ ހިތްފަސޭހަ ރަށެއް. ލޯކަލް ޓޫރިޒަމަށް ފީސިބަލް ރަށެއް. ރަށު ކައުންސިލުން އެކަމަށް ހުޅުވާލާފައިވާއިރު ފެނާ ނަރުދަމާ މަޝްރޫއުގައި ނެތް އެ ހިސާބަށް އެކްސްޓެންޝަން ހިމަނާފައެއް. ބޮޑު ޚަރަދެއް އެއީ އެކަންކުރުން. އަޅުގަނޑުމެން އެކަމަށް ހައްލު ގެނެސްދޭނަން. ކަރަންޓާ ފެނާ ނަރުދަމާ ތަރުތީބެއްގެ ތެރެއިން އަޅުގަނޑު މިދަތުރަށްފަަހު ވަޒީރުންނާ ކައުންސިލާ މަޝްރާކުރާނަން ކުރިއަށްދާނެގޮތެއް. ވީހާވެސް އަވަހަށް ހައްލު ގެނެވޭނެ ގޮތް ހޯދައިދޭނަން." ރައީސުލްޖުމްހޫރިއްޔާ ވިދާޅުވިއެވެ.

ރައީސް ވިދާޅުވީ ފުރަތަމަ އިސްކަންދެއްވަނީ ފެނާ ނަރުދަމާ ނިންމައި ރައްޔިތުންނަށް ޚިދުމަތް ދިނުމަށްކަމަށެވެ. އަދި އެއަށްފަހު ލޯކަލް ޓޫރިޒަމް ސަރަހައްދަށް އެ ޚިދުމަތް ފުޅާކޮށްދޭނެކަމަށް އެމަނިކުފާނު ވިދާޅުވިއެވެ.

ރައީސް ވަނީ މޮޅަދޫގައިވެސް ތަޢުލީމީ ދާއިރާއިން ހައްލުކުރަންހުރި މައްސަލަތައް އެބަހުރިކަމަށް ވިދާޅުވެފައެވެ. ކުޑަ އާބާދީއެއް ނަމަވެސް ކޮންމެ ކުއްޖަކު މޮޅަށް ކިޔަވައި، އެންމެ ރަނގަޅު ޚިދުމަތް ތަޢުލީމީ ދާއިރާއިން ފޯރުކޮށްދިނުމަކީ ސަރުކާރުގެ ސިޔާސަތުކަމަށް ރައީސް ވިދާޅުވިއެވެ. އެކަމަށް ސަރުކާރުގެ ބަޖެޓުން ހަމަޖައްސައިދޭނެކަމަށާއި، އެގޮތުން ފެށިފައިވާ ސްކޫލްގެ އައު މަޝްރޫޢު ނިންމުމާއި އައު ވަސީލަތް ހޯދައިދިނުން ހިމެނޭކަމަށް ރައީސް ވިދާޅުވިއެވެ.

މޮޅަދު ސްކޫލުގެ އައު ޢިމާރާތުގެ މަސައްކަތް 2021 ވަނަ އަހަރު ފެށުނުނަމަވެސް އެ މަސައްކަތްވެސް އޮތީ މަޑުޖެހިފައެވެ. ރައީސް ވަނީ އެކަން ހައްލުކޮށްދޭނެކަމުނުގެ ޔަޤީންކަން ދެއްވަމުން ސިއްޙީ ދާއިރާއަށްވެސް ވަސީލަތް ހޯދައިދީ، މުވައްޒަފުންނާ ޢިމާރާތުގެ ގޮތުންވެސް ހުރި މައްސަލަތައް ހައްލުކޮށްދޭނެކަމަށް ވިދާޅުވެފައެވެ. ރައީސް ވަނީ އެކަންކަން މިއަހަރުގެ ބަޖެޓުން ފުރިހަމަކޮށްދޭނެކަމަށް ވިދާޅުވެފައެވެ.

ކުނީގެ މައްސަލައަށް އިޝަރާތްކުރައްވާ ރައީސް ވަނީ ބޭރުގެ ފަންޑުން 21 ރަށެއްގެ ކުނި މެނޭޖުކުރުމަށް އެޑްވާންސް ފައިސާ ދީ، އެކަން ހުއްޓިފައި އޮތްކަމަށް ވިދާޅުވެ އެކަމުގައިވެސް ހައްލު ހޯދިފައިވާކަމަށް ވިދާޅުވެފައެވެ. ކުރީ ސަރުކާރުން ނުހިންގާ މަޑުޖައްސާފައިވާ އެ 21 ރަށޫގެ ތެރޭގައި މޮޅަދޫވެސް ހިމެނެއެވެ. އެހެންކަމުން މޮޅަދޫގައި ޒަމާނީ ކުނި ކޮށްޓެއް ޤާއިމްކޮށް ކުޅިވަރުގެ ވަސީލަތްތައްވެސް އެރަށުގައިޤާއިމްކުރައްވާނެކަމަށް ރައީސް ވިދާޅުވިއެވެ.

ދުޅަހެޔޮ ސިއްހަތަކަށް ކުޅިވަރު މުހިންމުކަމަށާއި، ރާއްޖޭގައި ފެތުރޭ ގިނަ ބަލިތަކަކީ ހެލިފެލިވެ ނޫޅުމުން ފެތުރޭ ބަލިތައްކަމުން، ރަށްރަަށުގައި ކުޅިވަރުގެ ވަސީލަތްތައް ޤާއިމްކުރުމުގެ މަސައްކަތުގެ ދަށުން ހުރިހާ ވަސީލަތާއެކު ފިޓްނަސް އެންޑް ރެކްރިއޭޝަން ސެންޓަރެއް މޮޅަދޫގައި ތަރައްޤީކޮށްދޭނެކަމަށް ރައީސް ވިދާޅުވިއެވެ. އަދި ފުޓްސަލް ދަޑާއި ވޮލީ ކޯޓެއް ޤާއިމްކޮށްދޭނެކަމުގެ ޔަޤީންކަންވެސް ރައީސް ދެއްވިއެވެ.

ރައީސްގެ ވާހަކަފުޅުގައި މޮޅަދޫއަކީ ބިން ބޮޑު ރަށެއްކަމުން ކައުންސިލުން ބޭނުންވާ ގޮތަށް ގޯތި ދޫކުރުން ކުރިއަށް ގެންދިއުމުގައި ސަރުކާރުގެ އެއްބާރުލުންދޭނެކަން ފާހަގަކުރެއްވިއެވެ. އަދި ގެދޮރު ބިނާކުރުމަށް ސަރުކާރުން ހުޅުވާލާފައިވާ ފަހި ލޯންގެ ފުރުޞަތުގެ ބޭނުންހިފުމަށްވެސް އެދިވަޑައިގެންނެވިއެވެ.

ރައީސްގެ ވާހަކަފުޅު ނިންމަވާލައްވަމުން ވަނީ މޮޅަދޫގެ ތަރައްޤީގެ ގިނަ މަޝްރޫއު މިއަހަރު ކުރިއަށްގެންދަވާނެކަމުގެ ފުރިހަމަ ޔަޤީންކަން ރައްޔިތުންނަށް ދެއްވާފައެވެ.