ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ކުރީގެ ރައީސް ބައްސާމް އަދީލް ޖަލީލަށް ކުރާ ދައުވާތަކަށް އޭނާ އިންކާރުކޮށްފިއެވެ.
ބުރާސްފަތި ދުވަހު ކްރިމިނަލް ކޯޓުގައި ކުރިއަށްގެންދިޔަ އަޑުއެހުމުގައި އޮތީ ދައުލަތުން ދައުވާ އިއްވުމާއި، ދައުވާއަށް ޖަވާބުދާރީވުމެވެ. މި މައްސަލައިގައި ކުރިން ތަޙުޤީޤު ކުރެވިފައިވާ ބައިގައި ބައްސާމު ޢަދީލް ޖަލީލްގެ މައްޗަށް ޚިޔާނާތްތެރިވުމާއި މަނީ ލޯންޑްރިންގގެ ކުށުގެ ދަޢުވާކުރުމަށް މިދިޔަ ހަފުތާގެ އަންގާރަ ދުވަހު ކްރިމިނަލް ކޯޓަށް ހުށަހަޅާފައިވެއެވެ. އަދި އޭގެ ފަހުން އައު ދައުވާތަކެއް އަނެއްކާވެސް ކޯޓަށް ހުށަހެޅިއެވެ.
މި އަޑުއެހުމުގައި ބައްސާމް ކޯޓަށް ހާޒިރުވީ އެހެން ވަކީލަކާއެކު އެވެ. އެއީ މީގެ ކުރިން ބައްސާމްގެ ދެ ވަކީލުން އެ މައްސަލައިން ތަނާޒުލްވުމުންނެވެ. އައު ވަކީލް ވަނީ ދައުވާއަށް ޖަވާބުދާރީވުމަށް ލިޔުންތައް ދިރާސާކުރަން އިތުރު ވަގުތު ބޭނުންވާކަމަށް ވިދާޅުވެފައެވެ. ނަމަވެސް މައްސަލަ ބައްލަވާ ގާޒީ އިސްލާއިމް ޝަފީއު ވަނީ މިއަދު ދައުވާތަކަށް ޖަވާބުދާރީވާން ޖެހޭނެ ކަމަށް ބުނެފައެވެ.
އެއާއެކު ބައްސާމްގެ ވަކީލު ވިދާޅުވީ ދެ ދައުވާއަށްވެސް އިންކާރުކުރާ ކަމަށެވެ. އަދި އެއީ ކަން ހިނގާފައިވާ ގޮތް ނޫންކަމަށްވެސް ވަނީ ބުނެފައެވެ.
ޕީޖީން ހުށަހެޅި އައު ދައުވާތަކުގެ ތެރޭގައި ޚިޔާނާތްތެރިވުމުގެ ކުށުގެ ދަޢުވާ ހިމެނެއެވެ. އެ ދައުވާ އުފުލާފައިވަނީ ބައްސާމު އަމީން ކޮންސްޓްރަކްޝަންގެ އަމީން އެވެނިއުއިން އެޕާޓްމަންޓެއް ގަތުމަށް ފައިސާ ޖަމާކުރުމަށްޓަކައި ފުޓްބޯލް އެސޯސިއޭޝަން އޮފް މޯލްޑިވްސްގެ 1,200,000 (އެއް މިލިއަން ދެ ލައްކަ އެމެރިކާ ޑޮލަރު) އަށް ޚިޔާނާތްތެރިވެފައިވާ ކަމަށް ތުހުމަތު ކުރެވޭތީއެވެ.
މި ކުށުގެ އަދަބަކީ 1 އަހަރާއި 7 މަހާއި 6 ދުވަހުގެ މުއްދަތަކަށް ޖަލަށް ލުމެވެ. މީގެކުރިން ކޮށްފައިވާ ދެ ދައުވާއަށް ބައްސާމް އިންކާރު ކޮށްފައިވާތީ، ޝަރީއަތް ފެށުމުގެ ކުރީގެ ހުށަހެޅުންތަކަށް 10 ދުވަހުގެ ފުރުސަތެއް ގާޒީ ދެއްވި އެވެ. އެހެންވެ، ދެން އަޑުއެހުމެއް ބާއްވާނީ އެ ހުށަހެޅުންތައް ހުށަހެޅުމަށެވެ.
މައްސަލާގައި އިތުރު ދަޢުވާތައް ކޯޓަށް ހުށަހަޅަމުން ގެންދާނެކަމަށް ޕީޖީ އޮފީހުން ވަނީ މީގެކުރިން ބުނެފައެވެ.