އައިސްލޭންޑް ބަލިކޮށް ޔޫރޯ ފުޓްބޯޅަ މުބާރާތުގެ ސެމީ ފައިނަލުން މުބާރާތް ބާއްވާ ޤައުމު ފްރާންސް ޖާގަ ހޯދައިފިއެވެ. މުބާރާތުގައި މިހާތަނަށް އެންމެ ހައިރާންކުރަނިވި ނަތީޖާތަށް ނެރެމުން އައި އައިސްލޭންޑްގެ މައްޗަށް ފްރާންސް ކުރިހޯދީ ފަސްލަނޑު ދެލަނޑުންނެވެ.
މިމެޗަކީ މިފަހަރުގެ މުބާރާތުގައި އެންމެ ގިނަ ގޯލް ފެނިގެންދިޔަ މެޗެވެ. މެޗްގެ ފުރަތަމަ ހާފް ފްރާންސުން ނިންމާލީ ހަތަރު ލަނޑު ސުންލަނޑުންނެވެ. މެޗްގައި ފްރާންސްގެ ފަސްލަނޑުގެ ތެރެއިން ދެލަނޑު ކާމިޔާބުކޮށްދިނީ މެޗްގެ މޮޅު ކުޅުންތެރިޔާގެ މަޤާމް ހޯދި އޮލިވިއޭ ޖިރޫއެވެ. އަނެއް ތިންލަނޑު ކާމިޔާބުކޮށްދިނީ ޕޮގްބާ، ޑިމިޓްރީ ޕަޔޭޓް އަދި ގްރީޒްމަންއެވެ. މިއީ ގްރީޒްމަން މިފަހަރުގެ ޔޫރޯގައި ޖެހި ހަތަރު ވަނަ ގޯލެވެ. އައިސްލެންޑްގެ ދެލަނޑު މެޗްގައި ކާމިޔާބުކޮށްދިނީ ސިތޯސަން އަދި ޔަނާސަންއެވެ.
އައިސްލޭންޑް މުބާރާތުގެ ކުއާޓަރ ފައިނަލަށް ދަތުރުކުރީ އިންގްލެންޑް ކަޓުވާލުމަށްފަހުއެވެ. މެޗުން މޮޅުވެ ފްރާންސް ސެމީފައިނަލުން ޖާގަ ހޯދިއިރު، ސެމީފައިނަލްގައި ފްރާންސް ވާދަކުރަން ޖެހޭނީ އިޓަލީ ކަޓުވާލުމަށްފަހު ސެމީފައިނަލުން ޖާގަ ހޯދި ޖަރުމަނާއެވެ.
ސެމީ ފައިނަލް ފުރަތަމަ މެޗްގައި ވާދަކުރާނީ ރޮނާލްޑޯގެ ޕޯޗްގަލްއާއި ބޭލްގެ ވޭލްސްއެވެ.